Փաստ ինֆո

Խորհրդարանում վաղը քննարկվելիք հայտարարության նախագիծը կարող է ինչ-որ առումով ամրապնդել Հայաստանի դիրքերը բանակցային գործընթացում: Եթե ինչ-որ զիջումներ պարտադրվեն, ապա Փաշինյանը կարող է ասել, որ չի ստորագրելու փաստաթուղթը, քանի որ Հայաստանի խորհրդարանն արդեն իր դիրքորոշումն է հայտնել: «Փաստինֆո»-ի հետ զրույցում ասել է քաղաքական վերլուծաբան Արմեն Բաղդասարյանը:

Ինչպես հայտնել ենք, վաղը խորհրդարանում տեղի է ունենալու արտահերթ նիստ:
Օրակարգում «Հայաստան» խմբակցության հեղինակած ՀՀ Ազգային ժողովի հայտարարության նախագիծն է՝ Ադրբեջանի խորհրդարանի 2022 թվականի նոյեմբերի 8-ի հայտարարությանն ի պատասխան:

ՔՊ-ն հայտարարել է, որ մասնակցելու է արտահերթ նիստին: Սակայն հայտնի չէ՝ կողմ է քվեարկելու նախագծին, թե՝ ոչ: Ինչպես ԱԺ արտաքին հարաբերությունների հանձնաժողովի նախագահ Էդուարդ Աղաջանյանն է հայտնել, նախագծում կան կետեր, որոնց հետ իրենք համաձայն չեն, ուստի որոշ փոփոխություններ են առաջարկել նախագծում:

Մեզ հետ զրույցում Արմեն Բաղդասարյանը վստահություն հայտնեց, որ ՔՊ-ն կողմ է քվեարկելու ընդդիմության հայտարարության նախագծին.

«Նախագծին կողմ քվեարկելով՝ ՔՊ-ն ոչինչ չի կորցնում, միևնույնն է, երկրի արտաքին քաղաքականությունը Փաշինյանն է իրականացնում, իսկ դեմ քվեարկելով՝ քարոզչական առումով շատ լուրջ կորուստներ կունա: Ընդդիմությունը կարող է ասել՝ տեսեք, մենք ասում ենք Արցախը չի կարող լինել Ադրբեջանի կամում, իսկ իշխող ուժը չհամաձայնվեց դրա հետ:Ուստի տրամաբանությունը հուշում է, որ կողմ կքվեարկեն:

Ի վերջո, ինչի՞ համար է ընդդիմությունն այս նախագիծը դրել շրջանառության մեջ, եթե ոչ զուտ ներքաղաքական քարոզչական նկատառումներով, նրանք հասկանում են, որ Արցախի հարցը ԱԺ հայտարարություններով չի լուծվի: Եթե ընդդիմությունը քարոզչական նպատակով նման նախագիծ է դրել շրջանառության մեջ, ՔՊ-ն էլ քարոզչական նկատառումներով պետք է չդիմադրի, որպեսզի քարոզչական կորուստներ չունենա »,-ասաց Բաղդասարյանը:

Եթե ամեն դեպքում չընդունվի հայտարարությունը, Արմեն Բաղդասարյանի խոսքով, սա Նիկոլ Փաշինյանին փայլուն հնարավորություն կտա, որպեսզի հետագա ձախողումների մեղքը բարդի խորհրդարանի վրա.

«Նիկոլ Փաշինյանը կարող է իր պարտվողական քաղաքականության մեղքը բարդել խորհրդարանի վրա և ասել՝ ես ի՞նչ անեմ, խորհրդարանը չհամաձայնվեց այդ դիրքորոշման հետ »,-հավելեց զրուցակիցը:

Աղբյուր` Փաստինֆո