Փաստ ինֆո

«Իրավատեր կապանցիներ» բնապահպանական ՀԿ-ն ահազանգում է՝ պատկան մարմինների թողտվության պայմաններում Սյունիքը վերածվել է հանքավայրի

Երրորդ օրն է՝ «Զանգեզուրի պղնձամոլիբդենային կոմբինատ»-ի թափոնաջրերն այնքան են լցվել Ողջի գետը, որ ջրի աղտոտվածությունը Քաջարան քաղաքից պարզ տեսանելի է նաև անզեն աչքով։ Խնդրի մասին այսօր ահազանգել է «Իրավատեր կապանցիներ» բնապահպանական ՀԿ-ն։

«Փաստինֆո»-ի հետ հեռախոսազրույցում ՀԿ նախագահ Արմեն Փարամազյանը հայտնեց, որ դա առաջին դեպքը չէ և, որ խնդրի մասին բարձրաձայնել են բազմիցս, ավելին՝ հարցումներով դիմել են բնապահպանության տեսչական մարմնին ու Զանգեզուրի պղնձամոլիբդենային կոմբինատին, բայց հարցումներն անպատասխան են մնացել։

«Տեսչական մարմնի մարզային վարչություն ինչքան դիմում ենք, պատասխան չեն տալիս։ Ուզում ենք հասկանալ՝ նմուշառում արվե՞լ է, պարզվե՞լ է, թե էդ թափոնների հետ ինչ ռեագեններ են լցվում գետը։

Ի վերջո, այդ գետը հոսում է նաև Սյունիք գյուղի տարածքով և, այնտեղի բնակիչները, փաստացի, զրկված են գյուղատնտեսությամբ զբաղվելու հնարավորությունից։ Անասնապահությամբ էլ չեն կարողանում զբաղվել, քանի որ արոտավայրերի մի մասը թշնամին է գրավել, մյուս մասն էլ հանքահեններն են զավթել ու պոչամբարներ կառուցել։ Ի՞նչ անի գյուղացին հիմա, ինչո՞վ զբաղվի։ Ինչպե՞ս կարելի է սահմանապահ գյուղի հետ այդպես վարվել»,-ասում է Փարամազյանը։

ՀԿ նախագահը նաև շեշտում է՝ եթե որևէ մեկի տնտեսական գործունեության հետևանքով տուժողներ են լինում, ապա պետք է առնվազն փոխահտուցում տրվի տուժողներին, բայց դա էլ չի արվում։

Տեսչական մարմնի անտարբերության պայմաններում, ինչպես նշեց Փարամազյանը, ՀԿ-ն որոշել է, որ իրենք կանեն նմուշառում՝ պարզելու, թե պնղձամոլիբդենային կոմբինատի թափոնաջրերի մեջ մարդկանց առողջությանը սպառնացող նյութերի ինչ քանակություններ կան։

Ասում է՝ եթե պատկան մարմիններն աչք են փակում այս ամենի վրա, նշանակում է, որ այս պետության թշնամին են։

«Սահմանապահ գյուղի բնակիչները կանգնում ու նայում են թշնամու շարժին, որն ընդամենը 100-200 մետր հեռավորության վրա է, պատկան մարմիններն էլ չտեսնելու են տալիս այս անօրինությունը։

Այստեղից արդյոք չի՞ հետևում, որ էս հող ու ջրի թշնամին են։ Լուրեր են տարածվում, որ ՀՀ կառավարությունը 40 մլն տոննա հանքաքարի վերամշակման թույլտվություն է տվել Քաջարանի պղնձամոլիբդենային կոմբինատին: Դիմել ենք ԶՊՄԿ գլխավոր տնօրեն պարոն Ն. Խուդոլինին՝ հերքելու կամ հաստատելու այս տեղեկատվությունը. ոչ հերքում են, ոչ՝ հաստատում»,-ասում է Փարամազյանը և հավելում, որ եթե դա, իրոք, ճիշտ լինի, ապա նշանակում է, որ ՀՀ կառավարությունը Սյունիքը դիտարկում է բացառապես որպես հանքավայր։

Աղբյուր` Փաստինֆո