Փաստ ինֆո

ՀՀ ԶՈՒ ԳՇ պետի նախկին տեղակալ Ստեփան Գալստյանի նկատմամբ ընտրված խափանման միջոց կալանավորումը գրավով փոխարինելու մասին միջնորդություն է ներկայացվել դատարան, որի քննությունը հետաձգվել է՝ մինչև դատաբժշկական փորձաքննության եզրակացություն ստանալը։ Այս մասին «Փաստինֆո»-ի հետ զրույցում հայտնեց պաշտպան Անդրանիկ Մանուկյանը։

Ինչպես արդեն տեղեկացրել ենք՝ ԶՈՒ ԳՇ պետի նախկին տեղակալ Ստեփան Գալստյանը կալանավորված է 2021թ հոկտեմբերի 2-ին՝ ՊՆ նախկին նախարար Դավիթ Տոնոյանի, ԳՇ նախկին պետ Արտակ Դավթյանի, «Պատրոն Դավո» մականունով հայտնի Դավիթ Գալստյանի և մյուսների վերաբերյալ հայտնի գործի շրջանակներում։

Ստեփան Գալստյանի առողջական վիճակը կտրուկ վատթարացել է, ինչի հետևանքով նոյեմբերի 9-ին վերջինս տեղափոխվել է «Էրեբունի» ԲԿ։

Պաշտպան Անդրանիկ Մանուկյանը «Փաստինֆո»-ի հետ զրույցում հայտնեց, որ Ստեփան Գալստյանի վիճակը շարունակում է գնահատվել անբավարար, նա գտնվում է բժշկական կենտրոնում։ Առողջական վիճակի վատթարացմամբ պայմանավորված Ստեփան Գալստյանի պաշտպանը միջնորդություն է ներկայացրել՝ նրա նկատմամբ ընտրված խափանման միջոց կալանավորումն անազատության հետ կապ չունեցող խափանման միջոցով, այդ թվում՝ գրավով փոխարինելու մասին՝ գրավի չափը թողնելով դատարանի հայեցողությանը, սակայն, Հակակոռուպցիոն դատարանը՝ դատավոր Վահե Դոլմազյանի նախագահությամբ, հետաձգել է միջնորդության քննությունը։ Դատարանը որոշում է կայացրել Գալստյանի նկատմամբ դատաբժշկական հանձնաժողովային փորձաքննություն նշանակելու մասին՝ պարզելու, թե արդյո՞ք Գալստյանի մոտ առկա հիվանդություններն անհամատեղելի են կալանքի հետ։ Հանձնաժողովը դեռևս ձևավորված չէ, ձևավորման փուլում է, պաշտպանն ակնկալիքներ ունի առ այն, որ հանձնաժողովի ձևավորումը և փորձաքննությունը հնարավորինս սեղմ ժամկետներում իրականացվի։ Հանձնաժողովը կձևավորվի կառավարության որոշման համաձայն։ Նշենք, որ Ստեփան Գալստյանի առողջական խնդիրների մասին հայտնի էր ավելի վաղ, պաշտպանները միջնորդություններ էին ներկայացրել՝ պահանջելով փոխել նրա խափանման միջոցը, սակայն դատարանը մերժել է դրանք, այժմ, փաստաբանի փոխանցմամբ, առկա են նոր ի հայտ եկած հանգամանքներ, հիվանդություններ։ Բժշկական գաղտնիք չհրապարակելու համար փաստաբանը զերծ մնաց մանրամասնել, թե ինչ հիվանդություններ են առկա Ստեփան Գալստյանի մոտ, բայց այդ նշել, որ Գալստյանն էլ չի ցանկանում այն շահարկման թեմա դարձնել, թեև դրանց բարձրաձայնման դեպքում, փաստաբանի հավաստմամբ, բոլորի համար ակնհայտ կդառնա, որ այդ հիվանդությունների պարագայում անձը չի կարող մնալ կալանավորված։ Ճշգրտող հարցին՝ արդյո՞ք Գալստյանի մոտ առկա հիվանդությունները ներառված են կառավարության որոշմամբ սահմանված՝ անազատության հետ անհամատեղելի հիվանդությունների ցանկում՝ պաշտպանը պատասխանեց՝ «Այո, կան»։

Միևնույն ժամանակ, Անդրանիկ Մանուկյանն ընդգծեց, որ Ստեփան Գալստյանի և գործով անցնող մյուս մեղադրյալների նկատմամբ ընդհանրապես խափանման միջոց կիրառելու անհրաժեշտություն առկա չէ։

«Ես սա ասում եմ ոչ թե որպես պաշտպան, այլ՝ իրավաբան։ Եթե այնուամենայնիվ խափանման միջոց կիրառելու անհրաժեշտություն կա, ապա այն չի կարող լինել և չպետք է լինի ամենածանրը՝ կալանավորումը։ Ավելի մեղմ՝ անազատության հետ կապ չունեցող խափանման միջոցները լիարժեք, ոչ թե 100, այլ՝ 101%-ով փարատել և՛դատախազի, և՛ դատարանի մտավախությունները»,- նշեց փաստաբանը։

Հեղինակ՝ Իզաբել Սահակյան

Աղբյուր` Փաստինֆո