Փաստ ինֆո

«Բոլորիս համար պարզ է, որ որոշումները այդ հանձնաժողովը չի կայացնում, այլ կայացնում է մեկ անձ, տվյալ դեպքում Նիկոլ Փաշինյանը»,- «Փաստինֆո»-ի հետ զրույցում ասաց քաղաքագետ Ստեփան Դանիելյանը՝ անդրադառնալով Սահմանադրական բարեփոխումների խորհրդի որոշմանը՝ չգնալ կառավարման համակարգի փոփոխության,

Քաղաքագետի խոսքով, Հայաստանում ստեղծված իկրավիճակի պայմաններում նման փոփոխություններից հետո, կառավարման այլ ՝ կիսանախագահական կամ նախագահական համակարգով ընտրությունների գնալ, գործող իշխանությունը չի կարող, որովհետեւ այդ պարագայում արդեն ընտրելու են անձերին, իսկ Հայաստանում, ինչպես Դանիելյանն է ասում, կան անձինք, որոնք ունեն հեղինակություն կամ այնքան հեղինակազրկված չեն, ինչպես գործող վարչապետը։ «Այդ ընտրությունները կարող են վերածվել համաժողովրդական հուզումների, եթե նույնիսկ փորձեն դրանք կեղծել։ Սա է պատճառը, որ նրանք այդ փոփոխություններին չեն գնում»,-բացատրում է մեր զրուցակիցը։

Դանիելյանի համոզմամբ, իշխող ուժի եւ գործող վարչապետի համար խորհրդարանական կառավարման համակարգն ամենահարմար մոդելն է, որովհետեւ եթե կուսակցությունները կայացած չեն, անձերի վրա պետք է հենվել։ Պատճառը, թե ինչու իշխանությունը չի գնում կառավարման համակարգի փոփոխության, քաղաքագետը հենց այս հանգամանքով է բացատրում՝ այս որոշումը, ինչպես եւ սահմանադրական փոփոխություններն, առհասարակ, քաղաքական հաշվարկի հետ են կապված։

Նշենք, որ Արդարադատության նախարարությունն այսօր հայտարարել էր, որ Սահմանադրական բարեփոխումների խորհուրդը որոշել է կառավարման մոդելի փոփոխություն չիրականացնել։ Այսինքն՝ անցում դեպի նախագահական կամ կիսանախագահական մոդելի չի լինելու, պետական կառավարումը մնալու է խորհրդարանական:

Ինչ վերաբերում է ներկայումս գործող կառավարման խորհրդարանական համակարգի արդյունավետությանը, Ստեփան Դանիելյանը այն կարծիքին է, որ գործող Սահմանադրությունն ամենահաջողվածներից չէ, որովհետեւ ճգնաժամային իրավիճակներում չի կարողանում լուծումներ առաջարկել։ Նրա գնահատմամբ, նախորդ Սահմանադրությունն ավելի հաջողված էր։

«Երբ խոսք է գնում նախագահական, կիսանախագահական եւ խորհրդարանական կառավարման մոդելների մասին, չկա ինչ-որ մի մոդել, որը մյուս մոդելներից լավն է կամ վատն է։ Տարբեր հանգամանքներից, իրավիճակից ու տվյալ ժողովրդից է կախված, թե որ մոդելն է ավելի արդյունավետ։ Եթե վերցնենք Հայաստանի իրավիճակը, որտեղ կուսակցությունները ոչ միայն կայացած չեն, այլեւ հեղինակազրկված են, որտեղ սոցհարցումները ցույց են տալիս, որ ոչ մի կուսակցություն , առանձնապես, հեղինակություն չունի, ապա պառլամենտական կառավարման մոդելը , որտեղ մրցակցում են հենց կուսակցությունները, անարդյունավետ է դառնում, որովհետեւ կայացած կուսակցություններ չկան»,-ասում է Դանիելյանը՝ հավելելով, որ այլ պայմաններում համակարգը , գուցե, շատ լավ աշխատի, բայց մեր իրավիճակում այն ոչ միայն արդյունավետ չէ, շատ դեպքերում՝ վտանգավոր է։

Աղբյուր` Փաստինֆո