Փաստ ինֆո

ԳԱԱ «Օրգանական և դեղագործական քիմիայի գիտատեխնոլոգիական կենտրոն»-ի աշխատանքն ամբողջությամբ խաթարվել է։ «Գրին Փրոփերթի Դիվելոփմենթ» ընկերությունը ներկա պահին Կենտրոնի տարածքը՝ Ազատության 26/1 հասցեն դարձրել է շինհրապարակ ու քանդում է ասֆալտը։ Այդ մասին «Փաստինֆո»-ին ասաց Կենտրոնի գիտական գծով փոխտնօրեն Ռոբերտ Հակոբյանը։

«Մենք բողոքարկել էինք Քաղաքապետարանի որոշումը, որով «Գրին Փրոփերթի Դիվելոփմենթ» ընկերությանը տրվել էր Ջրագծի արդիականացման թույլտվություն, բայց իրականում ոչ թե արդիականացում է արվում, այլ ջրանցքի ուղղությունն է փոխվում։ Դրա համար մտել են մեր Կենտրոնի տարածք ու ահագին տեղ արդեն քանդել են ասֆալտը, ջրագծերից մեկն էլ վնասել են։ Հիմա էլ քանդում են։ Կենտրոնի մասնաշենքերից մեկի մուտքը համարյա փակել են. աշխատակիցները շենք են մտնում մի արահետով ու, եթե հանկարծ որևէ արտակարգ պատահար լինի, մարդկանց հնարավոր չի լինի տարհանել»,-ասաց Հակոբյանը։

Գիտատեխնոլոգիական կենտրոնի փոխտնօրենի խոսքով՝ դատարանն իրենց հայցն ապահովելու որոշում ունի, բայց այն ուժի մեջ կմտնի հինգ օր անց։ Այսինքն՝ նշված ժամկետից հետո միայն կկասեցվեն շինարարական ընկերության աշխատանքները Կենտրոնի անմիջապես բակում։ Դրանից հետո էլ, թե ինչ կլինի, դեռ պարզ չէ։ Հակոբյանն ասում է՝ քանի դեռ դատական նիստը չի եղել, քաղաքապետարանի տված թույլտվությունն էլ չի չեղարկվել կամ անօրինական ճանաչվել, հուսադրող ոչինչ չկա։

«Մեր պահանջը, խնդիրը շինարարական ընկերության հետ չէ, այլ՝ պետության։ Երկրի վարչապետը խոսում է գիտության կարևորությունից, հայտարարում ֆինանսավորման ավելացման մասին, միչդեռ պետական պատկան մարմինները, փաստացի, վնասում են գիտությանը։ Պետական համակարգը պետք է հստակ դիրքորոշում ունենա ու կոնկրետ գործողություններով ցույց տա՝ գիտության կողքին է, թե գիտության դեմ»,-շեշտում է Հակոբյանը։

Այդուհանդերձ, ինչպես նշեց Հակոբյանը, «Գրին Փրոփերթի Դիվելոփմենթ» ընկերությունն իր հերթին նամակով դիմել է վարչապետին՝ բարձրացնելով հարց, թե, իբր, Կենտրոնը խանգարում է իրենց՝ իրականացնելու ներդրումային ծրագիր։

«Ի վերջո, փաստն այն է, որ ռազմավարական նշանակություն ունեցող Կենտրոնի գործունեությունը, որը լուրջ անվտանգային խնդիրներ է լուծում, այսօր խաթարված է։Եվ գիտնականը, իր գործը թողած, հիմա պայքարում է, որ թույլ տան իրեն աշխատել, չխանգարեն»,-ասում է Կենտրոնի գիտական գծով փոխտնօրենը։

Հիշեցնենք, որ մոտ մեկ շաբաթ առաջ՝ նոյեմբերի 22-ին՝ աշխատանքային օրվա ավարտից հետո «Գրին Փրոփերթի Դիվելոփմենթ» ընկերության ներկայացուցիչները՝ ոստիկանության ներկայացուցչի ուղեկցությամբ, կոտրել էին Կենտրոնի դարպասն ու գցել մի կողմ։

Խնդիր այն է, որ Կենտրոնի օտարված տարածքում՝ Ազատության 26/1 հասցեում գտնվող ջրավազանի տեղում նշված ընկերությունը մտադիր է բարձրահարկ բազմաֆուկցիոնալ համալիր կառուցել։ Քանի որ տարածքով անցնում է դեռևս ուրարտական ժամանակներից հայտնի Աբու Հայաթ ջրանցքը, իսկ օրենքը թույլ չի տալիս, փաստացի, ջրանցքի վրա շենք կառուցել, շինարարական ընկերությունը որոշել է տեղափոխել ջրանցքը։ Դա իրականացնելու համար շինարարական ընկերությունը քանդման աշխատանքներ է կատարում նաև Կենտրոնի տարածքում։

Նշենք նաև, որ ԳԱԱ «Օրգանական և դեղագործական քիմիայի գիտատեխնոլոգիական կենտրոն» -ի գիտաշխատողները բազմիցս են ահազանգել, որ կողք կողքի անհամատեղելի են քիմիական վտանգավոր նյութերի արտադրությամբ և պահմամբ զբաղվող կենտրոնն ու բազմաֆունկցիոնալ բնակելի համալիրը։

Աղբյուր` Փաստինֆո