Փաստ ինֆո

«Հայաստանի պետական հետաքրքրությունների ֆոնդը» չի հերքում, որ Տիգրան Ավինյանը շարունակում է մնալ տնօրենների խորհրդի նախագահ, սակայն շտապել է նշել, թե դա վճարովի աշխատանք չէ, թեեւ մինչ հրապարակումը «Փաստինֆո»-ի բանավոր հարցմանն ի պատասխան դժվարացել էին ասել՝ խորհրդի անդամներն աշխատավարձ ստանում են, թե ոչ։

Մենք արդեն նշել ենք, որ Երևանի փոխքաղաքապետի պաշտոնում սեպտեմբերի 23-ին նշանակվելուց հետո Ավինյանը շարունակում է զբաղեցնել Հայաստանի պետական հետաքրքրությունների ֆոնդի (ԱՆԻՖ-խմբ), տնօրենների խորհրդի նախագահի պաշտոնը՝ այդպիսով միևնույն ժամանակ պաշտոնավարելով երկու անհամատեղելի պաշտոններում։

Երևան քաղաքում տեղական ինքնակառավարման մասին ՀՀ օրենքի 48-րդ հոդվածի 8-րդ կետի համաձայն՝ քաղաքապետի տեղակալները չեն կարող զբաղվել ձեռնարկատիրական գործունեությամբ, զբաղեցնել այլ պաշտոն պետական կամ տեղական ինքնակառավարման մարմիններում կամ առևտրային կազմակերպություններում, կատարել այլ վճարովի աշխատանք, բացի գիտական, մանկավարժական և ստեղծագործական աշխատանքից: Ինչպես հայտնի է՝ «Հայաստանի պետական հետաքրքրությունների ֆոնդ» ՓԲԸ-ն ՀՀ կառավարության ներքո գործող ընկերություն է, որի գործունեությունը միտված է խոշորագույն ներդրողների և գործընկերների հետ համատեղ լայնածավալ նախագծերի իրականացմանը։ Ֆոնդը ստեղծվել է 2019թ՝ կառավարության որոշմամբ, իսկ Տիգրան Ավինյանը հանդիսանում է նշված ՓԲԸ-ի տնօրենների խորհրդի նախագահ, ինչի մասին փաստում է «Հայաստանի պետական հետաքրքրությունների ֆոնդ»-ի պաշտոնական կայքէջը։ Ավելին՝ նա օժտված է ղեկավարման գործառույթներով, ինչի մասին եւս փաստում է «Հայաստանի պետական հետաքրքրությունների ֆոնդ»-ի կայքէջը, որի հրապարակած տեղեկատվության համաձայն՝ հենց տնօրենների խորհուրդն է ղեկավարում ԱՆԻՖ-ը։

Նախքան հրապարակումը «Փաստինֆո»-ն փորձել էր ԱՆԻՖ-ից ճշտել՝ արդյոք տնօրենների խորհրդի անդամները ստանում են աշխատավարձ ու որքան է կազմում այն, սակայն մեր բանավոր հարցմանը պատասխան այդպես էլ չէր տրվել՝ առաջարկելով դիմել գրավոր հարցմամբ։ Այն ուղարկել ենք նոյեմբերի 25-ին ու դեռ պատասխան չենք ստացել։

Նոյեմբերի 28-ին մեր հրապարակած «Տիգրան Ավինյանի պաշտոնավարումը քաղաքապետի տեղակալի պաշտոնում ապօրինի է. նա միաժամանակ զբաղեցնում է երկու անհամատեղելի պաշտոն » վերտառությամբ նյուծից հետո ԱՆԻՖ-ը հանկարծ ցուցաբերում է «օպերատիվություն» ու պատասխանում այլ լրատվականի հարցմանը՝ պնդելով, որ Ավինյանը ԱՆԻՖ-ում չի կատարում վճարովի աշխատանք,թեեւ «Փաստինֆո»-ն իր հարցման պատասխանը դեռ չի ստացել։

Նկատենք, որ Երևան քաղաքում տեղական ինքնակառավարման մասին ՀՀ օրենքի 48-րդ հոդվածի 8-րդ կետը հստակ ամրագրում է ոչ միայն վճարովի աշխատանք կատարելու արգելքը, այլ քաղաքապետի տեղակալի պաշտոնի հետ անհամատեղելի է համարում նաեւ այլ պաշտոն զբաղեցնելը՝ պետական կամ տեղական ինքնակառավարման մարմիններում կամ առևտրային կազմակերպություններում, իսկ ԱՆԻՖ-ը, ինչպես նշեցինք փակ բաժնետիրական ընկերություն է՝ ստեղծված կառավարության կողմից, իսկ ղեկավարումն իրականացնում է տնօրենների խորհուրդը, որի ղեկավարն է Տիգրան Ավինյանը։

Ակնհայտ է՝ որ փոխքաղաքապետը ղեկավարում է փակ բաժնետիրական ընկերության տնօրենների խորհուրդը՝ ի հեճուկս օրենքի։

Շարունակելի

Աղբյուր` Փաստինֆո