Փաստ ինֆո

Տավուշի տարածաշրջանում արքայանարնջի բերքը փչանում է։ Գյուղացիները փաստի առաջ են կանգնել. բերքը մնացել է ծառի վրա, անգամ կես գնով մթերող չկա, որ իրացնեն։

«100-150 տոննա կարալյոկ կա ծառերի վրա։ 1 կգ էլ չենք կարողացել վաճառել։ Ամեն տարի գալիս էին ֆուռերով տանում, էս տարի չկա, չեն առնում։ Ասում են՝ ֆուռերը կանգնեցված են, չեն կարողանում ապրանքը հասցնեն Ռուսաստան։ Թուզը կազմակերպված ձևով իրացվեց. 450 տոննա միայն Ռուսաստան է ուղարկվել։ Թե կարալյոկը ինչու չեն առնում, չգիտեմ»,,-«Փաստինֆո»-ի հետ զրույցում ասում է Այգեձորի վարչական ղեկավար Լորիս Միրզոյանը։

Եթե նախորդ տարիներին արքայանարնջի 1 կգ-ը գյուղացին վաճառում էր 250-300 դրամով, հիմա անգամ կես գնով չի կարողանում վաճառել։ Մի երկու օր առաջ մեկը եկել էր, ասում էր՝ 80 դրամով տվեք, առնեմ։ Մարդկանց ձեռ են առնում, ինչ է։ Գոնե 150-180 դրամով որ մթերեին, գյուղացին կտա, քանի որ ծառերի վրա փչանում է բերքը։ Եթե ձյուն եկավ կամ ցուրտ արեց, ամբողջ բերքը կփչանա»,-նշում է Այգեձորի վարչական ղեկավարը։

Միրզոյանը նշում է՝ ինքն անձամբ բերքի իրացման խնդրով մարզպետարան չի դիմել, բայց այնտեղ հնարավոր չէ՝ տեղյակ չլինեն խնդրի մասին, քանի որ ամեն ամիս հաշվետվություն է ներկայացնում, թե որ մթերքից որքան է իրացվել։ Այն, որ արքայանարինջ ընդհանրապես չի վաճառվել, հաշվետություններից երևում է։

Նույն խնդիրը նաև հարևան Չինարիում է։ Գյուղի վարչական ղեկավար Սամվել Սաղոյանի խոսքով՝ եթե 10 օր էլ բերքը չիրացվի, ապա ապրանքային տեսքը կկորցնի և իրացնել այլևս հնարավոր չի լինի։

«Մարդիկ կան, որ տոննաներով կարալյոկ ունեն ծառի վրա. տերևները թափվել են, ծառերը տոնածառի պես ՝ կարալյոկով ծանրաբեռնված, կանգնած են։ Ամեն տարի կարողացել ենք իրացնել. այս տարի, չգիտեմ ինչու, չեն տանում։ Բացի այն, որ գրեթե բոլորը տնամերձ այգիներում կարալյոկի ծառեր ունեն և մի 2-3 տոննա բերք կա հիմա, նաև գյուղացիներ կան, որ մեծ պլանտացիա ունեն կարալյոկի. իրենք էլ են փաստի առաջ կանգնել»,-ասում է Չինարիի վարչական ղեկավարը։

Սաղոյանը ևս շեշտում է՝ թզի ու խաղողի մթերումը նորմալ իրականացվել է, իսկ արքայանարինջը՝ ոչ։

Նշենք, որ «Փաստինֆո»-ի հետ զրույցում նույն խնդրի մասին բարձրաձայնել էին նաև Այգեպար, Վազաշեն, Բերքաբեր, Կոթի գյուղերի վարչական ղեկաավարները։

Հիշեցնենք նաև, որ Լարսի անցակետի թողունակության կրճատման պատճառով բեռնափոխդրող ընկերությունների բեռնատարները, որոնք բեռնված են նաև գյուղմթերքով, ամսից ավելի է՝ կանգնեցված են Վրաստանի տարածքում և Ռուսաստանի տարածք անցնել չեն կարողանում։ Իսկ հայկական գյուղմթերքի արտահանման հիմնական շուկան Ռուսաստանն է։ Էկոնոմիկայի նախարարությունը խնդիրը կարգավորելու ուղղությամբ գործնական քայլեր առայժմ չի ձեռնարկել։

Աղբյուր` Փաստինֆո