Փաստ ինֆո

«Ընդդիմության որոշ ներկայացուցիչների՝ մանդատները վայր դնելու կապակցությամբ ոգեւորությունը, որը նաեւ ընդդիմադիր հայացքներով հատվածի մոտ է նկատելի, իրավիճակին էմոցիոնալ արձագանք է։ Այդ թեման թեժացնում է հենց Նիկոլ Փաշինյանի քարոզչամեքենան»,-կարծում է ռազմական փորձագետ Կարեն Վրթանեսյանը։

Նշենք, որ «Հայաստան» դաշինքի մաս կազմող «Վերածնվող Հայաստան» կուսակցությունն այսօր հայտարարեց, որ դադարեցնում է գործունեությունը ՀՀ Ազգային ժողովում ու իր երեք պատգամավորները վայր են դնում մանդատները։ Ավելի վաղ՝ մանդատը վայր դնելու մասին հայտարարել էր նաեւ «Հայաստան» խմբակցության պատգամավոր Արամ Վարդեւանյանը։

«Փաստինֆո»-ի հետ զրույցում Վրթանեսյանն ասաց՝ որքան էլ Փաշինայնն այսօր վերահսկում է ԱԺ-ն, միեւնույն է, կգերադասի ունենալ իրեն առավել հնազանդ ու պակաս ռիսկային խորհրդարան, ուստի, խորհրդարանական ընդդիմության թիվ մեկ խնդիրը պետք է լինի ԱԺ-ում առավել ակտիվանալը։

Վրթանեսյանը շեշտում է, որ միայն քվեարկությամբ եւ խորհրդարանում ունեցած ձայների քանակով չի որոշվում խորհրդարանական գործիքակազմը, որը ունեն ընդդիմադիր պատգամավորները։ «Այո, ՔՊ-ն այսօր կարող է , առանց հաշվի նստելու ընդդիմության հետ, ընդունել օրենքներ, բայց ըդդիմությունը ունի այլ գործիքներ, որոնք կարող է օգտագործել՝ սկսած ձերբակալված ցուցարարներին բանտերում այցելելուց, մինչեւ հարցապնդումներ իրականացնելը, որոնց իշխանությունը պարտավոր է պատասխանել, մինչեւ միջազգային հարթակներում հայ ժողովրդի շահերը ներկայացնելու հնարավորությունը։ Օրինակ, նույն ԵԽԽՎ-ում, այլ կառույցներում, օտարերկրյա դեսպանների հետ կամ Հայաստան ժամանած լուրջ քաղաքական գործիչների հետ հանդիպումներում ընդդիմությունը կարող է բարձրացնել հայ ժողովրդին հուզող խնդիրները։ Օրինակ, նույն Նենսի Փելոսիի այցի ժամանակ միայն ընդդիմությունն էր բարձրացրել անվտանգության հետ կապված հարցեր, ինչն արտացոլվել էր Փելոսիի պաշտոնական կայքում, մինչդեռ նիկոլական չինովնիկները խոսում էին տարածաշրջանային բարգավաճումից։ Այո, այս պահին մենք գիտենք, որ Նիկոլ Փաշինյանն է ուղղորդում խորհրդարանական մեծամասնությանը, բայց մենք պետք է հասկանանք, որ ցանկացած պահի կարող են շրջադարձային զարգացումներ լինել եւ հենց միայն ԱԺ-ում ներկայության շնորհիվ, ընդդիմությունը օրինական գործիքներ է ստանում նոր թեկնածու առաջ քաշելու»,-ընդգծում է Վրթանեսյանը։

Նա համաձայն չէ, որ այօսր խորհրդարանում ընդդիմության ներկայությունը լեգիտիմացնում է Փաշինյանի իշխանության գործողությունները։ «Եթե օրինակ, որեւէ փաստաթղթի ստորագրման-վավերացման հարց առաջանա, բոլորը կարող են մանդատները վայր դնել, թեեւ , կրկնում եմ՝ դա կլինի էմոցիոնալ քայլ, գուցե լավ շոու, բայց որեւէ կերպ օգուտ չի տա՝ Հայաստանն այս աղետից փրկելու գործին։ Ավելին, Նիկոլը չի ընդդիմությանը խորհրդարան տարել եւ նա պարտավոր է այնտեղ ներկայացնել ժողովրդի շահերը։ Ես՝ որպես ընդդիմության ընտրողներից մեկը, չեմ կարծում , որ ընդդիմությունն ԱԺ-ում այլեւս անելիք չունի եւ սպառել է իր բոլոր հնարավորությունները»,-նշում է Կարեն Վրթանեսյանը։

Նրա խոսքով, արտահերթ ընտրություններին ընդդիմության մասնակցությունն, այն ժամանակ ինչ-որ առումով, լեգիտիմացրեց Փաշինյանի ընտրությունը, առնվազն արտաքին աշխարհի աչքերում, բայց, այնպես չէ, որ ընդդիմության տարբեր շերտեր գնացին այդ ընտրությանը հեշտությամբ կամ Նիկոլ Փաշինյանին լեգիտիմացնելու նպատակով։

Վրթանեսյանը կարծում է՝ դա ամենաքիչ ցնցումներով իշխանափոխության հնարավորություն էր, բայց այլ խնդիր է, որ այդ թվում իր սխալների պատճառով, ընդդիմությունն այդ հնարավորությունը չկարողացավ օգտագործել։

«Հեշտ է ասել՝ լեգիտիմացրիք Նիկոլին, բայց պարզ է, որ նպատակը նրան անցնցում հեռացնելն էր, որովհետեւ հակառակ դեպքում էլ, լինելու էր խորհրդարան, որտեղ նստած էին լինելու տիգրանխզմալյաններն ու էդմոնմարուքյանները։ Ընդ որում, նույն Մարուքյանն ինքն է խոստովանել, որ անգամ պատերազմից հետո ինքն սպասարկել է Փաշինյանի օրակարգը, իբր որպես ընդդիմության ներկայացուցիչ քննադատում էր , ամբիոնից հայտարարություններ անում, բայց նա դա խոստովանեց՝ անունը դնելով, թե ամեն ինչ արեցին պետական հեղաշրջումը կանխելու համար, բայց իրականում դա նշանակում է՝ օգնել Փաշինյանին, որ պատերազմից հետո իշխանությունը պահպանի։ Ա՛յ, այսպիսի գրպանային ընդդիմադիր կերպարների Փաշինյանը պահում է, որ երբ հերթական ճգնաժամը հրահրի ու հաջորդ արտահերթ ընտրությունները լինեն, նրանց համար գործ գտնվ»,-բացատրում է Կարեն Վրթանեսյանը՝ նկատելով, որ երբ գործող խորհրդարանական ընդդիմությունն էր արտախորհրդարանական, չգիտես ինչու, արտախորհրդարանական ուժերի հետ քննարկումների ֆորմատ չէր ստեղծվում։

Կարեն Վրթանեսյանն ընդգծում է՝ այսօր Հայաստանում Նիկոլ Փաշինյանը պառլամենտական համակագի տակ քողարկված բռնապետություն է հաստատվել։

Աղբյուր` Փաստինֆո