Փաստ ինֆո

Այն, որ հասարակության տրամադրությունները փոփոխվում են, դա տեսանելի է, բայց, թե որքան, դժվար է ասել՝ անկախ նրանից, թե այս կամ այն սոցիոլոգիական հարցումներն ինչ ցույց կտան։

«Փաստինֆո»-ի հետ զրույցում նման կարծիք հայտնեց քաղտեխնոլոգ Արմեն Բադալյանը՝ նկատելով, որ ժամանակին էլ այլ սոցիոլոգիական կազմակերպություններ ու սոցիոլոգներ էին տարբեր հարցումներ իրականացնում։ Քաղտեխնոլոգի կարծիքով, վերջին 30 տարվա ընթացքում Հայաստանում իրականացված սոցհարցումները ավելի շուտ պատվերով սոցիոնկարչություն են հիշեցնում, քան իրական սոցիոլոգիական հարցումներ։ Վերջին 30 տարվա ընթացքում, ըստ նրա, մեր երկրում քաղաքական համակարգը խեղաթյուրված է եւ դա արտացոլվում է նաեւ սոցհարցումների ինստիտուտի վրա։

Առավել վստահելի համարելով իրականացվող փակ հարցումները, այդուհանդերձ, անդրառնալով «GALLUP»-ի հրապարակած հարցումներին, Արմեն Բադալյանը շեշտեց․ «Այո, տեսանելի է, որ ինչպես ընդդիմության, այնպես էլ իշխանության վարկանիշներն էական անկում են ունեցել։ Քանի որ իշխանության վարկանիշը շատ ավելի բարձր էր, գուցե դրա համար, շատ ավելի մեծ է մնացել, իսկ որ ընդդիմության վարկանիշն ավելի քիչ էր, հետեւաբար անկումը ավելի շատ պիտի լիներ, դա ակնհայտ է։ Այդ մասին են վկայում նաեւ այսօրվա գործընթացները ընդդիմության ներսում»։

Միաժամանակ, քաղտեխնոլոգն ասում է՝ այլեւս Հայաստանում էական չէ վարկանիշի բարձր կամ ցածր լինելը, որովհետեւ, անգամ բարձր վարկանիշով երաշխավորված չեն ընտրությությունների ժամանակ բարձր ձայները։ «Հայաստանում ընտրությունների արդյունքները միշտ նկարվել են եւ վերջնական պատասխանը տրվել է ԿԸՀ-ի կողմից, որը հայտնի է որպես պատվերով համերգ տվող կազմակերպություն։ Հիմա՝ առավել եւս»,-ասում է Բադալյանը։

Նշենք, որ «GALLUP»-ի հարցումների համաձայն՝ հասարակության մեծ մասը չի ողջունում իշխանությունների վարած «խաղաղության» գիծը. Հայաստանի քաղաքացիների շուրջ 90 տոկոսն անընդունելի է համարում Ադրբեջանի կազմում Արցախի բնակչությանը ազգային փոքրամասնության կարգավիճակ տալը։ Հայաստանի իշխանությունների խաղաղության օրակարգին սատարում է բնակչության միայն 14 %-ը, իսկ բնակչության գերակշիռ մասը՝ մոտ 60 %-ը, գտնում է, որ պետք է զինվել ու արձագանքել Ադրբեջանի սադրանքներին: Բադալյանն ընդգծեց՝ մի բան է, երբ դու պասիվ դեմ ես, մեկ այլ բան, երբ դեմ լինելով, պատրաստ ես գործողություն իրականացնել՝ դուրս գալ փողոց։ «Սա շատ կարեւոր է, որովհետեւ, կարող է 90 տոկոսը դեմ է, բայց գործողության պատրաստ է ընդամենը 10 կամ 20 տոկոսը»։

Ինչ վերաբերում է հատվածին, որը ոչ իշխանության, ոչ էլ ընդդիմադիր գործող ուժերի կողմնակիցն է, քաղտեխնոլոգը նկատում է՝ պետք է մանրամասն վերլուծել, թե խոսքը ընդդիմության որ սեգմենտի մասին է՝ խորհրդարանական, թե՞ արտախորհրդարանական։ «Հասարակության այդ հատվածը չի տեսնում այն քաղաքական ուժին, որն իր շահերն է պաշտպանում։ Մենք տեսանք , որ «Զարթնի՛ր Լաո»-ն ընդամենը մի մասի շահերից է բխում, այդքան մարդ էր պատրաստ ակտիվ գործողություն իրականացնելու, բայց կան նաեւ սոցիալական եւ այլ խնդիրներ, որոնց շահառուները չեն գնում գործող ընդդիմության հետեւից։ Սա ցույց է տալիս, որ Հայաստանի քաղաքական դաշտում չկան այն ուժերը , որոնք կարող են ներկայացնել այս հատվածի շահերը, ինչը նշանակում է , որ պետք է լուրջ աշխատանք իրականացնել, որը մենք չենք տեսնում»-, բացատրում է Բադալյանը։

Նման պայմաններում նոր ուժի ի հայտ գալու հնարավորությունը քաղտեխնոլոգը բնական երեւույթ է համարում, միաժամանակ, ընդգծելով, որ դա չի կարող լինել արհեստականորեն, ասենք մեկ համագումարով։ «Դա բնական գործընթաց պետք է լինի, որը ժամանակի խնդիր է։ Դրա նախադրյալները կարող են լինել, որովհետեւ 47 տոկոսը ոչ իշխանությանն է համակրում, ոչ՝ ընդդիմությանը։ Չի բացառվում, որ այդ հատվածը համակրի ինչ-որ նոր ուժի, որը այս պահին դեռ չի ծնվել»։

Ինչպես արդեն տեղեկացրել ենք՝ այսօր հրապարակված «GALLUP»-ի հարցումների համաձայն՝ իշխող խմբակցությանը պատրաստ է ընտրել բնակչության միայն 17 %ը։ Նվազել է նաեւ «Հայաստան» ու «Պատիվ ունեմ« դաշինքների կողմնակիցների թիվը։ «Հայաստանի» օգտին պատրաստ է քվեարկել հարցման մասնակիցների 4,5 տոկոսը, իսկ «Պատիվ ունեմ»-ի օգտին՝ 2,2 տոկոսը։ Հարցվածների 47 տոկոսն ընդհանրապես կողմնակից չէ որեւէ մեկին։

Աղբյուր` Փաստինֆո