Փաստ ինֆո

«Բազմաթիվ դեպքեր են եղել, այս անընդունելի տերմինն օգտագործեմ, նախկին իշխանությունների օրոք, երբ անգամ ենթադրաբար, ոստիկանի կողմից քաղաքացուն ինչ-որ թթու խոսք է ասվել՝ պայմանավորված բարձրաստիճան պաշտոնատար անձանց շարասյան հետ, եւ այսպես կոչված իրավապաշտպան համայնքի կողմից հսկայական աղմուկ է բարձրացվել։ Հիմա ունենք ահազանգ, որ պայմանավորված Նիկոլ Փաշինյանի շարասյան հետ, երեք անձ է ծեծի ենթարկվել եւ նրանք հիվանդանոցում են գտնվում, սակայն, այժմ, ոչ միայն այդ աղմուկը չկա, այլեւ այդ, այսպես կոչված , քաղհասարակության ամենակարկառուն ներկայացուցիչներից մեկը՝ Դանիել Իոաննիսյանը հրապարակավ հանդես է գալիս պարեկների պաշտպանության դիրքերից՝ վկայակոչելով ինչ-որ ձայնագրություններ ու տեսագրություններ»,- «Փաստինֆո»-ի հետ զրույցում ասաց իրավապաշտպան, Իրավական ուղի ՀԿ համահիմնադիր Ռուբեն Մելիքյանը՝ անդրադառնալով Լոռու մարզում արձանագրված խայտառակ միջադեպին, երբ Նիկոլ Փաշինյանի ավտոշարասյան համար ճանապարհ բացելու արդյունքում պարեկները ուժ են գործադրել քաղաքացիների նկատմամբ՝ այն պատճառով, որ տարեց քաղաքացին պահանջել է հարգանքով խոսել։

Իրավապաշտպանի գնահատմամբ, այդ փաստը վկայում է երկրում հետզհետե վատացող վիճակի մասին, ինչի պատճառներից մեկը, ըստ Մելիքյանի, ամիսներ առաջ արձանագրված մահվան ելքով միջադեպի՝ պատշաճ կերպով արձագանքի բացակայութունն էր, երբ սրընթաց սլացող Փաշինյանի ավտոշարասյունը օրը ցերեկով վրաերթի ենթարկեց հղի Սոնա Մնացականյանին, որի հետեւանքով կինը՝ դեռ չծնված երեխայի հետ մահացավ։

«Որեւէ պատշաճ արձագանք տեղի չունեցավ, ընդհակառակը իշխանությունների արձագանքը կարելի էր համարել անհարգալից վերաբերմունք զոհի եւ իրավակարգի նկատմամբ»,-ընդգծում է Մելիքյանը։

Ինչ վերաբերում է Լոռու մարզում արձանագրված դեպքի պատշաճ քննությանը, իրավապաշտպանն արձանագրեց՝ գործ ունենք մի իրավիճակի հետ, երբ օբյեկտիվ քննության նշաններ անգամ լինել չեն կարող։ Միակ բանը, որ կարող է որեւէ կերպ փոխել հանրության վերաբերմունքն այս խնդրի շուրջ, իրավապաշտպանի խոսքով, կարող է լինել առանց մոնտաժման տեսանյութի հրապարակաումը, որտեղ իսկապես իրադարձությունները երեւում են։

«Արդեն երրորդ օրն է, բայց նման բան ես չեմ տեսնում»,-շեշտում է իրավապաշտպանը։

Անդրադառնալով հարցին, թե ստացվում է , որ Հայաստանում Նիկոլ Փաշինյանի ճանապարհը բացելու համար իրավապահների համար չկա որեւէ արգելք, գործողությունների խտրականություն, անգամ բարոյականության սահմաններ, Ռուբեն Մելիքյանն ասաց․«Բարոյական տեսանկյունից մենք ունենք այնպիսի մի դեպք, ինչպիսին է Եռաբլուրում զոհվածների հարազատների նկատմամբ գործադրված բռնությունը։ Այդ կարմիր գիծն էլ է անցած, հետեւապես այդ բաղադրիչը նոր բան իրենից չի ներկայացնում, մենք գործ ունենք իշխանական համակարգի հետ, որը իրեն ոչնչով սահմանափակված չի զգում, բացի, երբեմն, նոմինալ իրավապաշտպան համակարգի որոշ նկատառումներով, որն անկողմնակալ չի, որովհետեւ ինքը մասնակցություն է ունեցել պարեկների համակարգի ներդրմանը եւ ոչ միայն այս կապակցությամբ հանրային վերահսկողի դեր չի կատարում, այլեւ ստանձնում է պետության փաստաբանի անպատվաբեր գործը»։

Ռուբեն Մելիքյանի խոսքով, այս փաստը եւս մեկ անգամ խոսում է այդ հանրույթի կողմից նախկինում բարձրաձայնված խնդիրների երեսպաշտության եւ , փաստացի, քաղաքական օրակարգ սպասարկելու մասին։

«Այդ անձի շարասյունը գնալով դառնում է , իրավաբանության մեջ այսպիսի ձեւակերպում կա, առավել վտանգի աղբյուր եւ քաղաքացիները, ինչպես պետք է զգուշանան արտաքին թշնամու հետ շփումներից, նույնքան զգուշանալու անհրաժեշտություն ունեն՝ այդ շարասյան ուղեւորության ժամանակ»,-եզրափակեց Ռուբեն Մելիքյանը։

Ըստ տեղեկությունների, Լոռու մարզում պարեկային ծառայությունը փորձել է ճանապարհն ազատել Նիկոլ Փաշինյանի շարասյան համար։ Պարեկային ծառայության մեծ թվով աշխատակիցներ բռնություն են կիրառել քաղաքացիական անձանց նկատմամբ` օգտագործելով նաև արցունքաբեր գազ: Բռնության հետևանքով երեք քաղաքացի բազմաթիվ վնասվածքներով, այդ թվում նաև կոտրվածքներով, հայտնվել են հիվանդանոցում։

Դեպքի մասին ահազանգել էին ԱԺ «Հայաստան» խմբակցության պատգամավոր Քրիստինե Վարդանյանին։

Հավելենք, որ մերձիշխանական ՀԿ-ական շրջանակները շարունակ թմբկահարում են Հայաստանում նոր Պարեկային ծառայության ստեղծմամբ ոստիկանության ծառայության նոր կերպար ձեւավորելու մասին։

Աղբյուր` Փաստինֆո