Փաստ ինֆո

ՀԱՊԿ-ի ներսում կան խնդիրներ, որոնք պետք է լուծում ստանան: Այնպես չէ, որ մեզ, որպես ընդդիմություն, ՀԱՊԿ-ում ամեն ինչ դուր է գալիս: Որոշումների ընդունման ընթացակարգեր կան, որոնք կարելի է ավելի արագ իրականացնել: Այս մասին այսօր ԱԺ-ում լրագրողների հետ զրույցում հայտարարել է «Հայաստան» խմբակցության ղեկավար Սեյրան Օհանյանը:

ՊՆ նախկին նախարարի խոսքով՝ ՀԱՊԿ-ը չպետք է զբաղվի, օրինակ, Ադրբեջանի հետ հարաբերություններով, սահմանային իրավիճակով, սահմանային պաշտպանության ստեղծումով կամ ինժեներական սարքավորումներով ու խրամատավորմամբ.
«Այս ամենով պետք է զբաղվի ՀՀ ռազմաքաղաքական ղեկավարությունը, որը չի իրականացրել այս ամենը: Մենք մի կողմից համայն աշխարհին ասում ենք՝ դե բարձունքներ են, որոնք պետք չի, ձնանծածկ ինչ-որ սարեր են, Սև լճի համար հո չենք գնալու կռվենք, մյուս կողմից ասում ենք՝ եկեք ադրբեջանցիներին հանեք մեր տարածքներից: Հասկանալի է, որ մենք պետք է քաղաքական ուղղությամբ աշխատանքներ տանենք, բայց ինձ համար, որպես զինվորականի, հարց է ծագում՝ ի՞նչ ես դու արել, որ քո սահմանների պաշտպանությունն իրականացնես արդեն նոր ձևաչափում»,-ասաց նա:

Սեյրան Օհանյանը շեշտեց՝ հայ զինվորն ինքն ունակ է պաշտպանել իր հայրենիքի սահմանները.

«Ես հիմա էլ գտնում եմ, որ ՀՀ սահմանին պետք է կանգնի հայ զինվորը, հայ հրամանատարը, որոնք ցույց են տվել, որ այնտեղ, որտեղ ունեցել են ժողովրդի և իշխանությունների աջակցությունը, հերոսաբար կռվել են: Ո՛չ նավեր են բարձրանալու մեր սարերը, ոչ էլ եվրոպական դիտորդները կամ ՀԱՊԿ-ի որևէ երկրի զինվոր է գալու է ու մեզ համար խրամատներ փորի։ էլ ՀԱՊԿ-ի որևէ երկրի զինվոր չի գալու մեզ համար խրամատներ փորի: Պետք է կատարյալ անտեղյակ լինես, որ չհասկանաս, որ քո սահմանները ինքդ պետք է պաշտպանես»,-ընդգծեց նա:

Աղբյուր` Փաստինֆո