Փաստ ինֆո

Արցախում հիմա ավելի քան լարված է, նորից նոյեմբերի 9-ից հետո ստեղծված իրավիճակն է այստեղ: Գրեթե ամեն օր կրակոցներ են լինում, ադրբեջանցիներն ագրեսիվացել են, անընդհատ լարված վիճակ է: Տևական ժամանակ է՝ նման ագրեսիվ պահվածք չէին դրսևորում, բայց հիմա, երևի, ինչ-որ բան ունեն ստանալու:«Փաստինֆո»-ի հետ զրույցում հայտարարել է Արցախի ԱԺ պատգամավոր Մետաքսե Հակոբյանը՝ հավելելով, որ եթե այն ժամանակ թշնամին կրակում էր դիրքերի ուղղությամբ, այժմ հատուկ թիրախավորում է գյուղատնտեսական աշխատանքներ կատարող քաղաքացիներին:

Ադրբեջանցիների սադրանքների հետևանքով շփման գծում մոտ գտնվող բնակավայրերում հնարավոր չի լինում գյուղատնտեսական աշխատանքով զբաղվել.

«Թույլ չեն տալիս աշնանացան անել, շատ տեղերում մարդիկ հողը վարել են, բայց չեն կարողանում ցանք անել, բերքահավաքն էլ անասելի դժվարությամբ են անում, բերքը փչանում է, այգու տերերը ստիպված են լինում ավելին վճարել աշխատողներին՝ հավելյալ աշխատանքի համար»,-հավելեց Հակոբյանը:

Ըստ արցախցի պատգամավորի՝ ադրբեջանցիներին չի հաջողվում ստանալ «խաղաղության պայմանագիրը » այն բովանդակությամբ, ինչպես իրենք են ցանկանում, դրա համար էլ ագրեսիվ պահվածք են դրսևորում և փորձում են սադրանքների միջոցով հասնել իրենց ուզածին.

«Բացի սա՝ Ադրբեջանի բնակչության մոտ հարց է առաջանում, եթե իրենք պատերազմով Արցախի հարցը լուծել են կամ փակել են, ինչպես ներկայացնում են իրենց իշխանությունները, ինչո՞ւ են Արցախում հայեր ապրում: Բնականաբար, Ադրբեջանի իշխանությունը պետք է այնպես անի, որ հանրությանը այս հարցերի պատասխանը կարողանա տալ: Այսինքն՝ ադրբեջանցիները սադրանքների են դիմում, երբ հայտնվում են փակուղում »,-ասաց Հակոբյանը:

Պատգամավորի խոսքով՝ թեև բնակչության շրջանում կան մարդիկ, ովքեր իրենց և իրենց երեխաների ապագան այլևս չեն տեսնում Արցախում,բայց բնակչության մասը չի պատրաստվում լքել Արցախը և շարունակում է ապրել և արարել այնտեղ.
«Բնակիչները մինչ այս չէին հասկանում, որ, ի վերջո, ադրբեջանիցին չի կարող մտնի Արցախ և մինչև վերջին հայ բնակիչը հանի այստեղից: Հիմա արդեն հասկանում են, որ դա ինչ-որ տեղ անհնար է, քանի որ այստեղ են մեր ՊԲ-ն և ռուս խաղաղապահները :
Մեծ դեր ունի նաև մեր ինքնորոշման իրավունքը, որի վրա միջազգային հանրությունը չի կարող աչք փակել: Ադրբեջանում սա ևս հասկանում են և փորձում են մարդկանց խուճապի մատնել»,-հավելեց զրուցակիցը:

Արցախում անվտանգային լուրջ խնդիրներին գումարվել են նաև սոցիալական շատ խնդիրներ:

Մետաքսե Հակոբյանի փոխանցմամբ՝ գործարկությունն Արցախում ահռելի մասշտաբների է հասել.
«Մարդիկ աշխատանք են փնտրում և տեսնում են, որ աշխատանքի կարող են տեղավորվել միայն ծանոթի միջոցով, հաստիքներ են ստեղծվում այն մարդկանց համար, ովքեր իշխանական շրջանակներին են մոտ, իսկ այն մարդիկ էլ, ովքեր աշխատանք ունեն, դժվարանում են ապրել, քանի որ այն աշխատավարձը, որն իրենք են ստանում, այլևս չի բավարարում ծախսերը հոգալու համար: Արցախում չեք հանդիպի մեկին, բացի իշխանական շրջանակներից, ովքեր սոցիալական հոգսերի տակ կքած չլինեն »,-ասաց պատգամավորը:

Արցախում վերջերս կառավարության կազմը գրեթե ամբողջությամբ փոխվեց: Ռուբեն Վարդանյանի պետնախարար նշանակվելուց հետո կառավարության գրեթե բոլոր անդամները ազատվեցին պաշտոններից և նոր ԺՊ-ներ նշանակվեցին:
Ըստ Մետաքսե Հակոբյանի՝ սա անսովոր իրավիճակ է Արցախում, քանի որ նման կտրուկ փոփոխություններ չեն եղել այնտեղ.
«Ռուբեն Վարդանյանը հիմա ասում է այն ամենը, ինչ մեր քաղաքական ուժը երկու տարի շարունակ ասել է՝ սկսած ֆինանսական բաշխումներից, ընտանիքների կարիքների գնահատումից, սոցիալական անարդարությունից,վերջացրած՝ անվտանգային խնդիրները:
Այս գործընթացներն իրականացնելու համար պետք է նոր կառավարություն, կային նախարարներ, որոնք կարող էին շարունակել պաշտոնավարումը, ամեն դեպքում, դա պետնախարարի որոշելունն է »,-ասաց Մետաքսե Հակոբյանը:
Պատգամավորի խոսքով՝ այս փոփոխությունների պատճառով շատ տարօրինակ իրավիճակում է հայտնվել Արցախի ԱԺ-ն, այնտեղ քննարկվում է 2023թ-ի բյուջեն, բայց չկան բյուջեն կազմողները, կառավարության աշխատողներն ազատված են աշխատանքից:
Բացի սա՝ հազարավոր արցախցիներ դիմումներին չի լինում ընթացք տալ, քանի որ չգիտեն՝ ով պետք է ընթացք տա դրանց.

«Հարցեր կան, որոնք պետք է հրատապ լուծվեն, բայց այսօր աշխատանքը այս առումով դադարել է, քանի որ չգիտես՝ ով պետք է աշխատի, ով պետք է ընթացք տա դիմումներին, բոլորը նշանակումներին են սպասում»,-ասաց Հակոբյանը;

Աղբյուր` Փաստինֆո