Փաստ ինֆո

«Այդ տեղեկությունը, նախ պետք է ճշտվի, բայց ես չեմ բացառում, որ այդպիսի բան տեղի ունեցած լինի, որովհետեւ նման բան արդեն իսկ եղել է Դավոսի համաժողովին, որտեղ նույն Զելենսկու ելույթի ժամանակ դահլիճում ոտքի էր կանգնել Հայաստանի պսեվդոնախագահ Վահագն Խաչատուրյանը»,- «Փաստինֆո»-ի հետ զրույցում ասաց իրավապաշտպան, Հայաստանի Հելսինկյան կոմիտեի նախագահ Ավետիք Իշխանյանը՝ անդրադառնալով մամուլի տեղեկությանը, թե Վարշավայում ընթացող ԵԱՀԿ Խորհրդարանական վեհաժողովի աշնանային նստաշրջանի պլենար առաջին նիստի ժամանակ Ուկրաինայի նախագահ Վլադիմիր Զելենսկին բավականին կոպիտ որակումներով է հանդես եկել Ռուսաստանի ու ՌԴ նախագահ Վլադիմիր Պուտինի հասցեին, որից հետո դահլիճում գտնվողների մի մասը, այդ թվում՝ Հայաստանի պատվիրակության ՔՊ-ական պատգամավորներ Էդուարդ Աղաջանյանը, Մարիա Կարապետյանը և Հռիփսիմե Գրիգորյանը, ոտքի են կանգնել:

Ավետիք Իշխանյանի խոսքով, եթե մամուլի տեղեկութունը ճիշտ է, ապա հասկանալի է, որ դա արվել է Նիկոլ Փաշինյանի հրահանգով, որովհետեւ ՔՊ-ական պատգամավորներն առանց վարչապետի ցուցումի չէին համարձակվի նման քայլի դիմել։ «Դա նշանակում է, որ Հայաստանի իշխանությունն է այդպիսի դիրք բռնում՝ հակառուսական դիրք»,-ընդգծում է Իշխանյանը։

Ի դեպ, Հայաստանի եվրոպական կուսակցությունը, որը մաս է կազմում Նիկոլ Փաշինյանի հետ արտախորհրդարանական ուժերի գործակցության ձեւաչափին եւ Հայաստանի եվրաինտեգրմանը, միաժամանակ ՀԱՊԿ-ից եւ ԵԱՏՄ-ից Հայաստանի դուրս գալու օրակարգով է հանդես գալիս, նոյեմբերի 21-ին «Փաստինֆո»-ի հարցին, թե արդյո՞ք իրենց աշխարհաքաղաքական մոտեցումներն Փաշինյանի հետ հանդիպումներին ներկայացնում են եւ ինչպիսի՞ արձագանք են ստանում, ասել էր․ «Ես կարող եմ մի քանի օրինակներ բերել, Հայաստանը հիմա այլ կերպ է քվեարկում ՄԱԿ-ում եւ եվրոպական ատյաններում, այլեւս ՌԴ-ին կողմ եւ Ուկրաինային դեմ չի քվեարկում։ Սա մեր պահանջներից մեկն էր։ Երկրորդը՝ օգտագործվում են այն քաղաքական գաղափարները, որ մենք առաջարկել ենք եւ չտեսնել, դա անհնար է»։

Իշխանյանն այս դիտարկմանն արձագանքեց, թե իրականում Փաշինյանի հավաքները հակառուսական ուժերի հետ հետապնդում են մեկ նպատակ՝ իրականացնել հակառուսական քարոզչություն։ «Վարչապետն է նրանց հրահանգներ տալիս, թե ինչ անել, որովհետեւ, եթե նրանցից որեւէ մեկը փորձի իր կարծիքով առաջարկ անել վարչապետին, ապա վարչապետ կոչեցյալը շատ խիստ արձագանք կտա եւ այդ անձն այլեւս չի հրավիրվի։ Նրանք ո՞վ են, որ խորհուրդներ տան։ Այդ հավաքների ժամանակ վարչապետ կոչեցյալը նրանց հանձնարարում է, թե ինչ հակառուսական քայլեր անեն, որպեսզի ցույց տան, թե հայ հասարակությունն այդպես է տրամադրված։ Եվ, ամեն մի նման հանդիպումից հետո այդ արտախորհրդարանական մարդ-կուսակցությունները սկսում են տարբեր հարթակներով հակառուսական հիստերիա բարձրացնել, ցույցեր անել»,-ասաց Իշխանյանը՝ հավելելով, որ այդ ձեւաչափին ձեւական չի մասնակցում ԱԺԲ -ն, որը, Իշխանյանի համոզմամբ, ներքին կապեր ունի Փաշինյանի հետ եւ հենց նրա ցուցումով է հակառուսական ակցիաներ իրականացնում։

Իշխանյանը հարցնում է՝ այս ամենից հետո որպես հզոր պետական փորձ ունեցող երկիր, արդյո՞ք Ռուսաստանի հետախուզությունը համապատասխան տեղեկություններ չի հաղորդում եւ չի տեսնում , թե ինչ է կատարվում Հայաստանի րերին օղակներում։

«Այսքանից հետո նրանք հույս ունեն, որ Ռուսաստանը՝ որպես դաշնակից չի՞ փոխի վերաբերմունքը Հայաստանի նկատմամբ։ Ի վերջո, երբ ասում ենք որեւէ երկիր եւ քաղաքականություն, նկատի ունենք տվյալ երկրի իշխանությանը՝ անկախ նրանից, թե ինչպես է մտածում Հայաստանի հասարակության գերակշիռ մասը եւ նույն Ռուսաստանի վերաբերմունքը ձեւավորվում է ըստ Հայաստանի իշխանության վարած քաղաքականության»,-շեշտում է իրավապաշտպանը։

Աղբյուր` Փաստինֆո