Փաստ ինֆո

Ոստիկանությունը պահանջում է վարչական պատասխանատվության ենթարկել Արցախյան երրորդ՝ 44-օրյա պատերազմում զոհված և անհետ կորած զինծառայողների երկու տասնյակից ավելի ծնողների, որոնց նկատմամբ սեպտեմբերի 21-ին՝ «Եռաբլուր» զինվորական պանթեոնում ուժ էին կիրառել հենց իրենք՝ ոստիկանները, իսկ իրավապահները երկու ամիս է՝ չեն կարողանում նույնականացնել նրանց։ «Փաստինֆո»-ի տեղեկություններով՝ ՔԿ-ն միայն օրերս է հարցաքննել ոստիկանության մի քանի ծառայողի, սակայն դատավարական կարգավիճակ նրանց դեռևս չի տրվել։

Հիշեցնենք, որ սեպտեմբերի 21-ին՝ ՀՀ Անկախության օրը՝ վաղ առավոտյան ոստիկանության ծառայողներն անհամաչափ բռնի ուժի գործադրմամբ «Եռաբլուր»-ից բերման են ենթարկել 37 քաղաքացու՝ զոհված զինծառայողների ծնողներին, որոնք ցանկանում էին թույլ չտալ Նիկոլ Փաշինյանին՝ մուտք գործել պանթեոն՝ նշելով, որ նա իրենց որդիների մահվան մեղավորը։

Ոստիկանությունից հայտնել են, որ նրանք բերման են ենթարկվել՝ Վարչական իրավախախտումների վերաբերյալ օրենսգրքի 182-րդ հոդվածի հիմքով՝ ոստիկանների օրինական պահանջը չկատարելու համար, թեեւ տեսանյութերում պարզ երեւում է, որ ոստիկանները որեւէ պահանջ չեն ներկայացրել, նախ ուժի գործադրմամբ բերման են ենթարկել հայրերին, ապա նաեւ՝ մայրերին։ Ոստիկանների գործողությունների հետևանքով զոհված զինծառայողների մայրերից մի քանիսը ստացել են տարբեր աստիճանի մարմնական վնասվածքներ, որը հետագայում հաստատվել է նաև դատաբժշկական փորձաքննության եզրակացությամբ։

Դեպքի առթիվ նախաձեռնվել է քրեական վարույթ՝ ՀՀ քրեական օրենսգրքի 441-րդ հոդվածի 2-րդ մասի 1-ին կետի հատկանիշներով, այն է՝ պաշտոնատար անձի կողմից իշխանական կամ ծառայողական լիազորությունները կամ դրանցով պայմանավորված ազդեցությունը չարաշահելը կամ լիազորություններն անցնելը, որը կատարվել է բռնություն գործադրելով։

Արդեն երկու ամիս է՝ ՔԿ-ում նախաքննություն է իրականացվում, սակայն առ այս պահը դեռևս որևէ ոստիկանի մեղադրանք առաջադրված չէ, փոխարենը, օրերս հայտնի դարձավ, որ ոստիկանությունն է դիմել Վարչական դատարան՝ պահանջելով պատասխանատվության ենթարկել ծնողներին։ Զոհված և անհետ կորած զինծառայողների ծնողների ներկայացուցիչ, փաստաբան Վահան Հովհաննիսյանը «Փաստինֆո»-ի հետ զրույցում արձանագրեց՝ այս իշխանությունների պայմաններում ոչինչ պատահական չի լինում, ըստ այդմ, փաստաբանը զուգադիպություններ, պատահականություն չի տեսնում, որ հայցադիմումները ներկայացվել են զոհված զինծառայողների ծնողների ակցիայի հենց հաջորդ օրը։

«Երևի պլանավորված գործողություն, արձագանք էր՝ կազմակերպված ակցիային»,- ասաց փաստաբանը՝ հավելելով, որ նույն առարկայի վերաբերյալ չի կարող համատեղ գործ քննվել և՛ ՔԿ-ում, և՛ Վարչական դատարանում, հետևաբար, միջնորդություն է ներկայացվելու՝ Վարչական դատարանում ընթացող գործի վարույթը կասեցնելու մասին՝ մինչև ՔԿ-ում վերջնական ակտի կայացումը։ Ինչ վերաբերում է ՔԿ-ում իրականացվող քրեական վարույթին, փաստաբանը հայտնեց, որ այն ապացույցների ձեռքբերման փուլում է, ծնողները իրավական պահանջ են ներկայացրել՝ մի քանի հարցից բաղկացած՝ ակնկալելով հարցերի պատասխանները, դեռևս գրավոր պատասխան չի ստացվել, սակայն փաստաբանը գտնում է, որ ծնողների հետևողական, հետամուտ լինելը կհանգեցնի արդյունքների և շուտով գործով մեղադրյալներ կլինեն։ Վարույթի շրջանակներում այս պահին արդեն տուժողի կարգավիճակ ունեն ավելի քան 20 ծնող։

Նշենք, որ երեկ զոհված զինծառայողների ծնողները վարույթն իրականացնող մարմնին փոխանցել են իրենց նկատմամբ բռնություն գործադրած ոստիկանների լուսանկարները՝ օգնելով իրավապահներին «նույնականացնել» նրանց։ Այս հանգամանքին անդրադառնալով՝ Վահան Հովհաննիսյանը նշեց, որ իրենք իրենց կողմից ամեն ինչ անում են, զուգահեռ նաև իրենք են նախաքննություն իրականացնում, քանի որ տեսնում են, որ ՔԿ-ն անգործության է մատնված։ Իսկ թե ի՞նչ բարդություն էր ներկայացնում ոստիկանության ծառայողներին նույնականացնելը, եթե առկա են տեսանյութեր, որոնցում հստակ երևում են ծնողների նկատմամբ առերևույթ բռնություն գործադրած ոստիկանները, փաստաբանը նշեց՝ հարցն իրենք էլ են ուղղել և հիշեցրել Գալեյան եղբայրների դեպքը։

«Գալեյանների դեպքում, երբ չկային տեսախցիկներ, ձայնագրող սարքեր, ընդամենը մի քանի ժամ պահանջվեց, որ Գալեյան եղբայրները կարողանան նույնականացվել և նրանց մեղադրանք առաջադրվեց, իսկ այս պարագայում, երբ բազմաթիվ են տեսանյութերը, ապացույցները, արդեն երկու ամիս է՝ չեն նույնականացնում, հետևաբար, այստեղ միտում կա»,- ասաց փաստաբանը՝ հավելելով, որ ծնողների հետևողական աշխատանքն արդյունքներ կտա։

Հեղինակ՝ Իզաբել Սահակյան

Աղբյուր` Փաստինֆո