Փաստ ինֆո

Թաղավարդի օկուպացված հատվածում տեղակայված ադրբեջանական ստորաբաժանումները թիրախավորված կրակել են գյուղատնտեսական աշխատանքներ անող գյուղացիների ուղղությամբ՝ անտեսելով անգամ ռուս խաղաղապահների ներկայությունը։

«Դաշտում աշխատում էինք, ռուս խաղաղապահներն էլ մեզ մոտ էին, մեկ էլ ադրբեջանական դիրքերից սկսեցին կրակել։ Ժամը մոտավորապես 12-ի կողմերն էր, որ սկսեցին կրակել, եւ խաղաղապահներն անմիջապես դուրս եկան մեքենաներից, կանգնեցին մեզ մոտ, բայց 20 րոպե անց էլի վերսկսեցին կրակել։ Գնդակները մեր գլխավերևով անցնում ու մեզնից մի քիչ վերև թափվում էին։ Ստիպված թողել ենք գործը կիսատ, դուրս եկել դաշտից»,-«Փաստինֆո»-ի հետ զրույցում ասաց թաղավարդցի Կարո Ալավերդյանը, ում դաշտը մշակելու ժամանակ էլ ադրբեջանցիները կրակ են բացել։

Ալավերդյանը նշեց, որ ադրբեջանցիները գոյւղատնտեսական աշխատանքներ անող թաղավարդցիներին թիրախավորել էին նաև երեկ։
«Ամեն ինչ անում են, որ խանգարեն, թույլ չտան մեր հողը մշակենք։ Նոր ենք սկսում աշնանացանի աշխատանքները, սերմը դեռ չենք գցել։ Որ այսպես շարունակվեց, հենց մտնենք դաշտ, սկսեն կրակել, չգիտեմ էլ՝ կկարողանա՞նք սերմը գցել, թե՞ չէ»,-նկատեց Թաղավարդի բնակիչը։
Գյուղի ավագանու անդամ Ռուդիկ Բադասյանն էլ նշեց, որ համայնքին պատկանող վարելահողերի մեծ մասը 2020թ. 44-օրյա պատերազմի ընթացքում Ադրբեջանը բռնազավթել էր։

«Ավելի քան 200 հա վարելահող մնացել է գյուղի բռնազավթված հատվածում։ Մնացած մասն էլ՝ գոյւղամերձ հողերը, ձգվում են շփման գծի երկայնքով ու թշնամու ուղիղ նշանառության տակ է»,-ասաց Բադասյանը։

Հիշեցնենք, որ քիչ առաջ Արցախի ՆԳՆ ոստիկանությունը հայտնել է, որ ադրբեջանական ստորաբաժանումները հրաձգային զինատեսակներից անկանոն կրակոցներ են արձակել Թաղավարդ գյուղի վարչական տարածքի «Ծմակեն տակ» կոչվող տեղամասում «Բելառուս» տրակտորով գյուղատնտեսական աշխատանքներ կատարող գյուղացիների ուղղությամբ, ինչի հետևանքով աշխատանքները դադարեցվել են։

Աղբյուր` Փաստինֆո