Փաստ ինֆո

Երևանի ընդհանուր իրավասության դատարանում՝ դատավոր Վահե Միսակյանի նախագահությամբ, ՀՀ երրորդ նախագահ Սերժ Սարգսյանի և մյուսների գործով դատական նիստին առանցքային վկա Սևակ Քոչարյանի հարցաքննության ժամանակ Սերժ Սարգսյանի պաշտպան Ամրամ Մակինյանը հրապարակեց դատական ակտ, համաձայն որի՝ Սևակ Քոչարյանին պատկանող ընկերությունը դեռևս 2011թ խախտել է ՊՆ-ին դիզելային վառելիքի մատակարարման ժամկետները, որից հետո դատական ակտով ընկերությունից՝ հօգուտ պետության գանձվել է 28 մլն ՀՀ դրամ գումար։

Ամրամ Մակինյանը վկային մինչ այդ հարց էր ուղղել՝ գյուղնախարարության կարիքների համար դիզվառելիքի տրամադրման վերաբերյալ մրցույթի ժամանակահատվածում՝ 2012-2013թթ որքա՞ն գումարի պարտք է ունեցել Սևակ Քոչարյանի ընկերությունը, ինչին ի պատասխան վկան հայտարարել էր, թե պարտք չի ունեցել, բիզնեսով է զբաղվել, եղել են ինչպես հաջողություններ, այնպես էլ՝ անհաջողություններ, խնդիրներ եղել են, բայց դրանք միլիոնավոր դոլարների պարտքեր չեն։ Պաշտպանն էլ հայտարարեց, որ իր ունեցած տեղեկություններով դա այդքան էլ այդպես չէ, ապա հրապարակեց դատական ակտը, համաձայն որի՝ վկան իրապես ունեցել են պարտքեր և հետաքրքրվեց՝ արդյոք այդ գումարը վճարվել է և, վկայի պնդումը, թե ինքը դաշտում մեծ խաղացող է, հիմնավորվում է այդ դրվագով։ Հարցի վերաբերյալ, սակայն, մեղադրող դատախազն առարկեց՝ արձանագրելով, որ դա կապ չունի նշված վարույթի հետ, իսկ Մակինյանն իր հերթին հակադարձեց՝ պնդելով, որ հարցը կապ ունի վարույթի հետ, քանի որ անձի նախկին գործունեությամբ են պայմանավորված նաև անձի և նրա հնարավորությունների մասին պատկերացումները, մասնավորապես, պետությունը ինչ վերաբերմունք ունի տվյալ վկայի նկատմամբ։ Ամրամ Մակինյանը հետաքրքրվեց՝ արդյո՞ք կապ կա այն իրողությունների հետ, որ երբ դիզվառելիքի մատակարարման գործով ինքը դիմում է ոստիկանություն, շատ արագ ավարտվում են իր նախկին ընկերությունների վերաբերյալ սնանկության գործով դատավարությունները և ընկերությունները շատ արագ սնանկ են ճանաչվում, իսկ իր միլիոնավոր դոլարներների պարտքերը՝ ջրվում։ Փաստաբանը նաև մասնավորեցրեց, որ խոսքը 10 մլն դոլարի մասին է և փաստաթղթերը ներկայացրեց դատարանին։

Նշենք, որ Սևակ Քոչարյանի ցուցմունքն առանցքային նշանակություն ունի գործի համար, ասել է թե՝ գործի և Սերժ Սարգսյանի մեղադրանքի մեխը հենց Քոչարյանի ցուցմունքն է։

Հիշեցնենք, որ քրեական գործով կա 3 մեղադրյալ։ Սերժ Սարգսյանից բացի մեղադրանքներ են առաջադրվել նաեւ փոխնախարար Սամվել Գալստյանին, գործարար Բարսեղ Բեգլարյանին։ Ըստ մեղադրական եզրակացության՝ ՀՀ երրորդ նախագահ Սերժ Սարգսյանի կազմակերպմամբ և Ֆլեշ ՍՊ ընկերության սեփականատեր Բարսեղ Բեգլարյանի դրդմամբ, ՀՀ նախկին գյուղատնտեսության նախարարի տեղակալ Սամվել Գալստյանի ու նույն նախարարության բուսաբուծության վարչության պետ Գևորգ Հարությունյանի օժանդակությամբ, ՀՀ նախկին գյուղատնտեսության նախարար Սերգո Կարապետյանի կողմից 2013 թվականի հունվարի 25-ից փետրվարի 7-ն ընկած ժամանակահատվածում ՀՀ կառավարության պահուստային ֆոնդից վատնվել է պետական աջակցության ծրագրերի իրականացման ընթացքում իրացված 15.391.765 լիտր դիզելային վառելիքի համար հատկացված սուբսիդիայի առանձնապես խոշոր չափերով գումարը՝ 489.160.310 ՀՀ դրամը:

Հեղինակ՝ Իզաբել Սահակյան

Աղբյուր` Փաստինֆո