Փաստ ինֆո

Մենք ՀԱՊԿ-ին անդամակցել ենք ումի՞ց պաշտպանվելու համար, երկրորդ պատասխան չկա՝ թուրք-ադրբեջանական տանդեմից։ Մեր անդամակցությունը հո որևէ այլ երկրից պաշտպանվելու համար չէ։ Երբ  եկել է ժամանակը, երբ պետք էր գոնե քաղաքական գնահատական տրվեր, դա բավարար չի եղել և Հայաստանը հրաժարվել է ստորագրել այդ փաստաթուղթը՝ ակնկալելով, որ քաղաքական գնահատականն ամեն դեպքում տեղ կգտնի։ Այս մասին լրագրողների հետ զրույցում ասաց ԱԺ նախագահ Ալեն Սիմոնյանը։

Հիշեցնենք, որ ՀՀ վարչապետ Նիկոլ Փաշինյանը հրաժարվել է ստորագրել  Հայաստանին օգնություն ցուցաբերելու համատեղ միջոցառումների մասին ՀԱՊԿ-ի որոշման նախագիծը։ Փաշինյանը կարևորել է կազմակերպության կողմից Հայաստանի դեմ Ադրբեջանի գործողությունների քաղաքական գնահատականը։

«Քաղաքական գնահատականն անհրաժեշտ է նախևառաջ բարոյական տեսանկյունից, քանի որ դա պետք է լինի դաշնակցային հարաբերությունների տրամաբանական դրսևորում։ Իհարկե, դա կարեւոր է նաեւ մեր երկրի տարածքային ամբողջականության վերականգնման տեսանկյունից, բայց այդ ձգտումն ինքնին չի նշանակում ռազմական միջամտություն», - ասել էր Փաշինյանը։

ԱԺ նախագահ Ալեն Սիմոնյանը նշեց՝ չի կարող ասել, թե Նիկոլ Փաշինյանի հայտարարությունն ինչ արձագանք կունենա, գտնում է՝ պետք է վերանայվի փաստաթուղթը, քանի որ դա տրամաբանությունն է, գործելաոճը, որը դրված է կառույցի հիմքերում։

Դիտարկմանը, որ ՀԱՊԿ-ը, ՌԴ-ն տարածաշրջանում ԶՈՒ-եր ունեն, ՀԱՊԿ-ի դեմ լարվելու դեպքում որը՞ կարող է ռուսական ռազմական ներկայության այլընտրանքը լինել, հայտնի է, որ ԵՄ դիտորդներ կան, սակայն Ադրբեջանը շարունակում է կրակել, Սիմոնյանն արձագանքեց՝ ռազմական զորք ունենալը և քաղաքացիական դիտորդները պետք չէ համեմատել։

«Փորձ կա համեմատելու, զուգահեռներ անցկացնելու, որ իբրև Հայաստան են եկել եվրոպացի զինվորականներ, ԶՈՒ-եր, նման բան չկա, կան քաղաքացիական դիտորդներ, որոնք գրանցում են և արձանագրում այն իրավիճակը, որը տեղի է ունենում սահմանին։ Ասեմ ձեզ՝ բավականին մեծ զսպող ուժ ունեն»,- նշեց Սիմոնյանը՝ հավելելով, որ փաստը մնում է փաստ՝ ռուսական կողմից ռազմական և քաղաքական մասով բավարար աջակցություն չունենք, եթե բավարար աջակցություն ունենք, ապա ինչու մինչև հիմա ունենք ռազմագերիներ, ինչրու եղավ Սև Լիճը, Խծաբերդը, Ջերմուկի ուղղությամբ ներխուժումը.

«Երբ խոսում ենք այստեղ ռուսական զորքերի ներկայության մասին, պետք է հարցերի պատասխանը ստանանք՝ ինչպես այդպես եղավ»։

Աղբյուր` Փաստինֆո