Փաստ ինֆո

ՀԱՊԿ-ի խորհրդի երեկվա նիստը հերթական անգամ ցույց տվեց, որ այն ընդամենը թղթի վրա գոյություն ունեցող կառույց է, որի ներսում կան բազմաթիվ հակասություններ, իմիտացիոն կառույց է ՀԱՊԿ-ը:

«Փաստինֆո»-ի հետ զրույցում նման դիտարկում է արել քաղաքական վերլուծաբան Արմեն Բաղդասարյանը՝ ամփոփելով Երևանում կայացած ՀԱՊԿ խորհրդի նիստի արդյունքները:

Փորձագետի խոսքով՝ այն փաստը, որ երեկ որևէ համատեղ հայտարարություն կամ փաստաթուղթ այդպես էլ չընդունվեց, փաստում է այն մասին, որ ՀԱՊԿ-ն ընդամենը բուտաֆորիկ կառույց է, որտեղ որևէ էական հարց չի լուծվում:

«Իմ տպավորությամբ՝ կազմակերպությունն ավելի շատ նրա համար է, որպեսզի պատճառաբանություններ փնտրի՝ թե ինչու այս կամ այն հարցը չի լուծվում»,-հավելեց Բաղդասարյանը:

Փորձագետն արձանագրեց նաև, որ ՀԱՊԿ-ը հրաժարվում է որևէ դերակատարում ունենալ հայ-ադրբեջանական հակամարտության մեջ.

«Իսկ եթե նրանք փորձեն մեղքը բարդել հայկական կողմի վրա, դա արդեն էական չէ, քանի որ հետագա քայլերի առումով ոչինչ չի փոխվելու, նրանք ինչպես նախկինում որևէ քայլ չէին անում, այդպես էլ շարունակելու են»,-ասաց Արմեն Բաղդասարյանը:

Նիկոլ Փաշինյանը երեկ հրաժարվեց ստորագրել Հայաստանին օգնություն ցուցաբերելու համատեղ միջոցառումների մասին ՀԱՊԿ փաստաթուղթը՝ պարզաբանելով, որ այն թերի է և լրամշակման կարիք կա:

Հարցին՝ թե սա ինչ հետևանքներ կունենա արդեն հետագա գործընթացների վրա, զրուցակիցն արձանագրեց.

«Ես չգիտեմ՝ ինչ ակնկալիքներ ուներ Հայաստանը, որոնք չարդարացան: Ալեն Սիմոնյանը թեթև ակնարկեց, որ այնտեղ քաղաքական գնահատական չկար, դրա համար էլ չի ստորագրել հայկական կողմը:

Եթե իսկապես այդպես է, ուրեմն ճիշտ է արել, որ չի ստորագրել, որովհետև գոնե քաղաքական գնահատական Ադրբեջանի ագրեսիային պետք է տրվեր, իսկ եթե անգամ այդ գնահատականը չկար, ի՞նչ իմաստ ունի ստորագրել այն»,-ասաց Բաղդասարյանը։

Աղբյուր` Փաստինֆո