Փաստ ինֆո

Արցախի տարածքային կառավարման և ենթակառուցվածքների արդեն նախկին նախարար Հայկ Խանումյանը, տևական ժամանակ ունենալով մեղադրյալի կարգավիճակ, շարունակել է պաշտոնավարել՝ ԱՀ նախագահ Արայիկ Հարությունյանի հովանու ներքո։

Հիշեցնենք, որ Հայկ Խանումյանի նկատմամբ քրեական հետապնդման մասին հայտնի էր դարձել դեռևս ապրիլի 29-ին, երբ ԱՀ գլխավոր դատախազ Գուրգեն Ներսիսյանը ԱՀ խորհրդարանում հայտարարել էր Խանումյանին որպես մեղադրյալ ներգրավելու մասին՝ նշելով, որ այդ մասին հաղորդվել է գործադիր իշխանության ղեկավարին։

Գլխավոր դատախազը հայտնել էր, որ մեղադրյալի՝ հետագա պաշտոնավարման նպատակահարմարության մասով հանրապետության նախագահին միջնորդագիր էր ներկայացվել դեռևս մարտ ամսին, որում մանրամասն ներկայացվել էր Խանումյանին մեղսագրվող արարքը։

Խանումյանին մեղադրանքն առաջադրվել է ապրիլի 13-ին։ Հայկ Խանումյանը մեղադրվում է ԱՀ քրեական օրենսգրքի 334-րդ հոդվածի 2-րդ մասով՝ պաշտոնեական անփութության համար, որն առաջացրել է ծանր հետևանք, այն է՝ պետությանը շուրջ 70 մլն ՀՀ դրամի չափով վնաս է պատճառվել։ Խոսքը վերաբերում է 2020 թվականի սեպտեմբերի 27-ից հետո Արցախի Հանրապետությունից տեղահանված, անօթևան մնացած բնակիչներին հյուրանոցայի ծառայությունների և սննդի մատակարարման ոլորտին։

Այդուհանդերձ, Նիկոլ Փաշինյանի համերկրացի և արևմտամետ հայացքներով, դրամաշնորհներից օգտվող Հայկ Խանումյանի լիազորությունները չեն դադարեցվել, թեև դատախազությունը միջնորդագիր ներկայացրել էր կառավարությանը։

Դեռեւս հունիսին՝ Արցախի նախագահի մամուլի քարտուղար Լուսինե Ավանեսյանը «Փաստինֆ»-ին հայտնել էր, որ ապրիլի 13-ից մեղադրյալի կարգավիճակ ունեցող Արցախի Տարածքային կառավարման և ենթակառուցվածքների նախարար Հայկ Խանումյանի լիազորությունները կասեցնելու որոշում առայժմ չկա։ «Որևէ որոշում լինելուն պես կհրապարակվի այդ մասին»,-նշել էր նա Ավանեսյանը։

Ասել է թե՝ Խանումյանն օգտվում էր Արայիկ Հարությունյանի հովանավորչությունից, ինչը հնարավորություն է տվել մեղադրյալի կարգավիճակում պաշտոնավարել շուրջ 7 ամիս։

Իրավիճակը, սակայն, Արցախում փոխվել է Ռուբեն Վարդանյանի՝ պետնախարարի պաշտոնը զբաղեցնելուց հետո։ Ակներև է, որ Վարդանյանը պարզապես չի հանդուրժել մեղադրյալի կարգավիճակ ունեցող «սորոսական» գործչին և, իրավապահներին, ի վերջո, հաջողվել է Հայկ Խանումյանի հետագա պաշտոնավարման նպատակահարմարության հարցը կրկին օրակարգ բերել։

ԱՀ դատախազությունից «Փաստինֆո»-ն տեղեկանում է, որ նոյեմբերի 21-ին քրեական գործը քննող քննիչի կողմից որոշում է կայացվել՝ մեղադրյալի պաշտոնավարումը դադարեցնելու մասին: Ու մինչ այդ մասին կհայտարարվեր՝ Խանումյանը շատպել էր ֆեյսբուքյան գրառմամբ հայտարարել, թե իր նախաձեռնությամբ է պաշտոնը թողել։ Մինչդեռ՝ Ռուբեն Վարդանյանն այսօր հայտարարել է, որ Արցախի նախագահի հետ պայմանավորվածություն է եղել, որ կառավարության բոլոր անդամները՝ նախարարները պետք է դադարեցնեն իրենց պաշտոնավարումը, իսկ Խանումյանի պարագայում առկա է եղել նաեւ քննիչի որոշումը, որ նա չի կարող շարունակել այլեւս պաշհոնավարումը։
Արցախում, իսկապես, հետաքրքիր զարգացումներ են սպասվում։

Հեղինակ՝ Իզաբել Սահակյան

Աղբյուր` Փաստինֆո