Փաստ ինֆո

Թուրքիան և Ադրբեջանը «թքած ունեն» միջազգային հանրության հայտարարությունների վրա: Նրանք գիտեն, որ հայտարարություններից բացի՝ որևէ պատժամիջոց չի կիրառվելու իրենց նկատմամբ: Իրենք հրաշալի հասկանում են նաև, որ իրենց քայլերով սպասարկում են հավաքական Արևմուտքի շահերը, դրա համար էլ Արևմուտքը շատ դեպքերում աչք է փակում նրանց արածների վրա: «Փաստինֆո»-ի հետ զրույցում նման դիտարկում է արել ռազմական փորձագետ Հայկ Նահապետյանը:

Նշենք, որ թեև արդեն տևական ժամանակ է՝ ԵՄ պատվիրակությունը դիտորդական առաքելություն է իրականացնում հայ-ադրբեջանական սահմանին, իսկ Արցախում էլ ռուս խաղաղպահներ են, բայց ո՛չ ԵՄ դիտորդական առաքելության, ո՛չ էլ ռուս խաղաղապահների ներկայությունը չի կանգնեցնում Ադրբեջանին: Թշնամին գրեթե ամեն օր կրակ է արձակում հայկական բնակավայրերի ուղղությամբ և թիրախավորում թե Արցախի, թե ՀՀ դիրքերը, անգամ՝ խաղաղ բնակիչներին:

Հայկ Նահապետյանի խոսքով՝ Ադրբեջանը միտումնավոր խախտում է Արցախի և ՀՀ սահմանամերձ գյուղերի բնակչների ապրելու, աշխատելու, սեփականություն ունենալու իրավունքը, որպեսզի մարդիկ ստիպված դուրս գան իրենց բնակավայրերից.
«Որ պահին սահմանամերձ բնակավայրերի բնակիչները դուրս գան իրենց բնակավայրերից, այդ տարածքները դյուրին կերպով կարող են դառնալ ռազմական գործողությունների թատերաբեմ: Բացի սա, երբ մարդիկ դուրս են գալիս, այդ բնակավայրերը գրավելն ավելի հեշտ է դառնում, քանի որ բնակիչներն անհրաժեշտության դեպքում կանոնավոր բանակի հետ միասին, զենքները ձեռքին իրենց տունն են են պաշտպանում»,-ասաց նա:

Հայկ Նահապետյանը թերահավատորեն է մոտենում ԵՄ դիտորդական առաքելության աշխատանքի արդյունավետությանը, վստահ է, որ նրանց ներկայությունը չի կանխելու թշնամու սադրանքները.

«Կան Հայաստան եկած միջազգային դիտորդներ, մի քանի տասնյակ անձինք են, ի՞նչ եք կարծում, հայ-ադրբեջանական սահմանի ամբողջ գծով այդ մի քանի տասնյակ անձինք կարո՞ղ են մոնիտորինգ անել, հատկապես այն դեպքում, երբ մոնիտորինգը սահմանի միայն մի կողմից է արվում: Սովորաբար, մոնիտորինգը երկու կողմից է արվում, որպեսզի վերջնարդյունքում դրա գնահատականը ճիշտ լինի, բայց Ադրբեջանը մոնիտորինգի ցանկացած արդյունք կարող է բոյկոտել ՝ ասելով, որ միայն հայկական կողմին են լսել դիտորդները, բայց Ադրբեջանն իր սահմանին թույլ չի տալիս մոնիտորինգ անել, որովհետև նախահարձակ ինքն է մշտապես լինում: Այսինքն՝ մոնտորինգ խմբի աշխատանքի արդյունավետությունը զրոյական է »,-ասաց Նահապետյանը:

Ավելին՝ փորձագետը պնդեց, որ Հայաստանի և Ադրբեջանի միջև կայուն խաղաղություն ապահովելու համար՝ բոլոր այն հատվածներում, որտեղից Ադրբեջանը կարող է նախահարձակ գործողությունների դիմել, պետք է ռուսական խաղաղապահ ուժեր տեղակայվեն։

«Ռուս խաղաղապահաները, ի տարբերություն մոնիտորինգային խմբի, որն իմիտացիա է անում, ապահովում է բնակիչների անվտանգությունը »,-հայտարարեց Նահապետյանը:

Ադրբեջանի նախագահը երեկ հերթական սադրիչ հայտարարությունն է արել, ասելով, թե Ադրբեջանը ՀԱՊԿ-ում ավելի շատ ընկերներ ունի, քան՝ Հայաստանը:

Ալիևը հերթական անհիմն մեղադրանքն էր ներկայացրել Հայաստանին՝ այս անգամ էլ մեղադրելով իբրև ՀԱՊԿ անդամ երկրներին «իրար դեմ հանելու» մեջ:

Հայկ Նահապետյանի՝ դիտարկմամբ Ադրբեջանը ռուս խաղաղապահների և ՀԱՊԿ-ի դեմ տեղեկատվական գրոհ է սկսել՝ Սոչիի եռակողմ հանդիպման արդյունքում ընդունված հայտարարությունից հետո, քանի որ այն, ըստ զրուցակցի, որևէ կերպ չի բխում ադրբեջանական կողմի պետական շահից:

Ավելին՝ փորձագետը նկատում է, որ Սոչիի հայտարարությունից հետո սահմանին կրակոցներն ինտենսիվացել են, ադրբեջանական իշխանամերձ լրատվամիջոցները սկսել են մեղադրել ռուս խաղաղապահներին, թե Հայաստանի տարածքով, Լաչինի միջանցքով զենք են տեղափոխում և զինում Արցախի հայերին.

«Սոչիի հանդիպումից հետո Ալիևի հայտարարություններն այս տրամաբանության մեջ են:
Երբ Պրահայում պայմանավորվածություններ էին ձեռք բերվել առանց Ռուսաստանի, Ալիևը և Էրդողանը երանության մեջ էին, մեկ էլ եկավ Սոչիի հայտարարությունը և բոլոր պայմանավորվածություններն աղբանոցը նետեց, այսինքն, սա Ադրբեջանի ղեկավարության համար ամբողջությամբ ձախողում էր»,-ասաց Նահապետյանը:

Աղբյուր` Փաստինֆո