Փաստ ինֆո

Այսօր մեր տարածաշրջանում և, համարձակվում եմ ասել, ամբողջ աշխարհում տեղի է ունենում մինչ 2020 թվականը գոյություն ունեցած աշխարհակարգի վերափոխում և եթե դիտարկենք այս տեսանկյունից, ապա լոկալ հակամարտություններն այդ փոփոխության մասնակի դրսևորումներն են: Նման դիտարկում է արել ՀՀ նախագահ Վահագն Խաչատուրյանը՝ SpecialEurasia -ին տված հարցազրույցում։

Պատասխանելով լրագրողի այն հարցին, թե՝ ինչպե՞ս եք տեսնում Հայաստանի ապագան և ի՞նչ ուղի կընտրի Ձեր երկիրն այս փոփոխվող աշխարհում, ՀՀ նախագահը նշել է, որ 2020 թվականի 44-օրյա պատերազմը ծանր փորձություն էր մեր ժողովրդի համար, ընդհանրապես պատերազմների ավերիչ հետևանքները դժվար է ամբողջական կերպով գնահատել։

«Անշուշտ, առկա միջազգային իրադրության լարվածության և փոփոխությունների ֆոնին հարկ է, որ ցանկացած պետություն ընտրություն կատարի, բայց այդ ընտրությունը կարծում եմ ավելի շատ արժեքների դաշտում է: Հայաստանն այս տեսանկյունից իր միանշանակ որոշումը կայացրել է, այն է՝ անշեղորեն առաջնորդվել ժողովրդավարության սկզբունքներով և գնալ ժողովրդավարական ինստիտուտների կայացման ուղիով»,-նշել է ՀՀ նախահգահը՝ հավելելով, որ մենք փոքր հնարավորություններով երկիր ենք՝ նկատի ունենալով, որ Հայաստանը հարուստ չէ օգտակար հանածոներով, էներգակիրներով, նավթով ու գազով, իսկ նման պայմաններում ժողովրդավարությունը, մշակույթը, գիտությունը դառնում են Հայաստանի առաջնային ռեսուրսն աշխարհին ներկայանալու և մոլորակի վրա մեր ուրույն տեղն ու դիմագիծն ունենալու համար:  

Ինչպես նշել է ՀՀ նախագահը՝ այս ամենի համար անհրաժեշտ է խաղաղություն:

«Հայաստանի համար վերջինս այլընտրանք չունի, քանի որ խաղաղությունն ամենակարևոր նախապայմանն է ինչպես առանձին վերցրած քաղաքացու, այնպես էլ պետությունների կայացման, զարգացման ու քաղաքակրթական վերելքի համար: Եթե փորձենք ձևակերպել շատ հակիրճ, ապա Հայաստանն աներկբա կերպով ընտրել է խաղաղ, ժողովրդավար և մարդակենտրոն զարգացման ուղին»,-ասել է Խաչատուրյանը:

Աղբյուր` Փաստինֆո