Փաստ ինֆո

Լույս աշխարհ է եկել Արցախյան երրորդ՝ 44-օրյա պատերազմում նահատակված պահեստազորային Վահե Կարապետյանի եղբայրը։ Փոքրիկը՝ Վանը, լույս աշխարհ է եկել նոյեմբերի 17–ին «Էրեբունի» բժշկական կենտրոնում կեսարյան հատմամբ։

Մայրը՝ 49–ամյա Անահիտ Մկրտչյանը, լրագրողների հետ զրույցում պատմեց, որ Վահեն ծառայության ընթացքում զանգում էր իրեն, խնդրում, որ իրեն եղբայր կամ քույր պարգևեն։

«Հիմա Վահես երկնքից տեսնում է, որ ես ու ամուսինս իրականացրել ենք իր ամենակարևոր նպատակներից մեկը։ Ես ուզում եմ, Վանը հպարտ լինի, որ Վահեի եղբայրն է։ Աննկարագրելի է, Վանը փոխեց մեր ընտանիքի մթնոլորտը, հնարավորություն տվեց, որ մեր դեմքին մի փոքր ժպիտ գա»,-պատմում է տիկին Անահիտը։

Վահե Կարապետյանը մասնագիտությամբ դեղագետ էր, աշխատում էր «News.am»-ում՝ որպես օպերատոր և մոնտաժող։ Պատերազմի ժամանակ, որպես կամավոր, Վահեն, թողնելով աշխատանքը, մեկնել է Արցախ, թեև հնարավորություն եղել է՝ մարտադաշտ չմեկնելու։ Մայրը պատմում է, որ խնդրել են՝ չմեկնել, քանի որ մայրն այդ ժամանակ կորոնավիրուսով էր վարակված, կարող էր որպես կոնտակտավոր չմեկնել, ինչպես նաև, աշխատանքային վայրում տնօրենն էր ասել, որ կարող են դիմում գրել՝ հետաձգելով, սակայն Վահեն հրաժարվել է։
«Իր ասած բառերն են՝ ես փալաս չեմ, որ փողոցում քայլեմ, ինձնից փոքր տղաները, իմ ախպերներն առաջնագծում՝ կռվեն։ Մամ ջան, ես փալաս չեմ։ Իր բառերն են՝ վերջին օրերին։ Լուրջ խոսակցություն ունեցանք, ասեց՝ մամ ջան, եթե ինձ կանչեն, ես գնալու եմ, հանկարծ չհամարձակվես խաբես, ասես, որ չեն կանչել»,-պատմում է մայրը։

Վահեն մասնակցել է Մատաղիսի, ապա Շուշիի մարտերին, նոյեմբերի 6-ին Շուշիում ծանր վիրավորում է ստացել, վիրահատվել ու տեղափոխվել Երևանի հիվանդանոցներից մեկը, որտեղ, գիտակցության չգալով, մահացել է նոյեմբերի 9-ին՝ պատերազմի ավարտից մի քանի ժամ առաջ։

Աղբյուր` Փաստինֆո