Փաստ ինֆո

Իրանի ԶՈՒ-ն սկսել է անցկացնել հակաահաբեկչական գործողություններ, և ստացված տեղեկությունների համաձայն, Իրանի այս գործողությունների հիմնական թիրախը  իրանական Քուրդիստանն է և Իրանի հյուսիսում գտնվող ադրբեջանցիներով բնակեցված հատվածը։ Այս մասին «Փաստինֆո»-ի եթերում ասաց միջազգայնագետ Գրիգոր Բալասանյանը։

«Անցած շաբաթ տեղեկություններ տարածվեցին, որ Իրանը որոշել է ցամաքային օպերացիա սկսել Իրաքի տարածքում և սրան միջազգային լրատվամիջոցները, կարծես թե,  այնքան էլ մեծ կարևորություն չտվեցին, բայց Թուրքիան իր հերթին առաջ անցնելով Իրանից, ռազմական գործողություններ սկսեց հյուսիսային Իրաքում և նաև Սիրայի սահմանին»,-նշեց միջազգայնագետը՝ հավելելով, որ ակնհայտ է դառնում, որ Ստամբուլի ահաբեկչության թիկունքում կանգնած ուժերն են պատճառը, որ այսօր Թուրքիան այդպիսի վարքագիծ է դրսևորում։ 

Եվ այն, որ  Թուրքիան և Իրանը մի գուցե իրարից անկախ պլանավորում են գործողություններ  իրականացնել Իրաքյան Քուրդիստանում, ապա՝ ըստ միջազգայնագետի, ակնհայտ է դառնում, որ պայթյունների համար Թուրքիան մեղադրում է Իրաքյան Քուրդիստանին։

«Այս լարվածությունը լավ բանի չի կարող հանգեցնել, քանի որ Իրաքյան Քուրդիստանը կանգնելու է բավականին լուրջ խնդրի առջև՝ ոչ միայն Թուրքիայի հետ առճակատման, այլև Իրանի հետ առճակատման պարագայում»,-կարծում է Գրիգոր Բալասանյանը։

Նրա դիտարկմամբ՝ տարածաշրջանում լարվածության այս ֆոնին  Ադրբեջանը փորձելու է ամեն ինչ անել հայ-ադրբեջանական սահմանին կրակոցներն ավելացնելու, ինչու չէ նաև լարվածության որոշակի օջախներ ստեղծելու համար։

«Եթե Թուրքիա-Իրաք հարաբերություններին այլ կոնտեքստով նայենք, ապա կնկատենք, որ վերջին շրջանում շատ ջերմ էին այդ հարաբերությունները և Թուրքիան Իրաքյան Քուրդիստանից բավականին մատչելի գնով նավթամթերք էր գնում, ինչն օգտագործվում է Թուրքիայի տնտեսության զարգացման համար, բայց ահա  ևս մեկ անգամ համոզվում ենք այն ճշմարտության մեջ, որ չկան հավերժական դաշնակիցներ, այլ կան հավերժական շահեր»,-նշեց միջազգայնագետը՝ շեշտելով, որ թվում էր, թե նրանց միջև խնդիրներ չէին կարող լինել, սակայն  Թուրքիան ինչպես միշտ գնաց  կրկին իրավիճակի լարման։

«Սա նաև պետք է մեզ համար դաս լինի, որ Թուրքիայի հետ, այո, պետք է հարաբերություններ հաստատել, բայց պետք չէ գլխապատառ նետվել Թուրքիայի գիրկը կամ փորձել այդ հարաբերությունները հաստատելու համար գնալ ցանկացած զիջումների, որովհետև Թուրքիան այն պետությունը չէ, որի հետ կարելի է անշահախնդրորեն բարեկամանալ՝ մոռանալով անգամ այն կարմիր գծերի մասին, որոնք այսօր կարող են լինել Հայաստան-Թուրքիա հարաբերություններում»,-կարծում է Բալասանյանը։

Նա «Փաստինֆո»-ի եթերում ևս մեկ անգամ շեշտեց, որ  Թուրքիայի գործողությունները՝ և՛ Սիրիայում, և՛ Իրաքյան Քուրդիստանում, նաև մեզ համար շատ լավ ապացույց է, որ Թուրքիայի հետ տարվող բանակցությունները պետք է տարվեն այնքանով, որքանով, և զիջումների մասին խոսելիս, միայն պետք է խոսել փոխադարձ զիջման մասին։ 

Մանրամասները՝ տեսանյութում։

Աղբյուր` Փաստինֆո