Փաստ ինֆո

Մնացական Մարտիրոսյանի թեկնածությանը 6 հոգու կողմ քվեարկելը ցույց է տալիս, որ լուրջ բարոյական խնդիր ունենք, խոսքն անգամ իրավական կողմի մասին չէ, այլ՝ բարոյականության ի սպառ բացակայության մասին, որովհետև ԲԴԽ վեց անդամ համարել են, որ իրենք հարցեր չունեն տալու Մնացական Մարտիրոսյանին։ Սա շատ ողբերգական է։ Նշանակում է, որ այն ամենն, ինչ ներկայացվում էր իբրև բարեփոխում, ինչպես տարբեր ժամանակների նախարարներ ասում էին, որ շտապում են իրավապաշտպանները, իրենց աշխատանքների արդյունքները կտեսնենք ապագայում, այսօր դա իրենց արած կամ չարած աշխատանքի արդյունք է։ Լրիվ բարոյազրկում է։ Այս մասին «Փաստինֆո»-ի հետ զրույցում ասաց իրավապաշտպան Նինա Կարապետյանցը։

Ինչպես արդեն տեղեկացրել ենք՝ ԲԴԽ-ն կոռուպցիոն հանցագործությունների քննություն իրականացնող դատավորների կազմում ընդգրկվելու համար ընտրել է դատավոր Մնացական Մարտիրոսյանին՝ 6 կողմ, 3 դեմ ձայնով, ինչը բավականին մեծ աղմուկ է բարձրացրել մասնագիտական, իրավապաշտպան գործունեություն իրականացնող հանրությունում։ Խնդիրն այն է, որ դատավոր Մնացական Մարտիրոսյանը, որը հայտնի է նաև որպես «Մացո», համարվում է թերևս ամենակոռումպացված և կառավարելի դատավորներից մեկը, ասել է թե՝ յուրաքանչյուր իշխանությունների «սրտի» դատավոր, որը մշտապես պատրաստակամ է կատարել դատախազաքննչական մարմինների և իշխանության կամքը։ Ընդ որում, ԲԴԽ-ն ընտրել է Մնացական Մարտիրոսյանին այն դեպքում, երբ նրա բարեվարքության վերաբերյալ բացասական եզրակացություններ են տրվել ինչպես Կոռուպցիայի կանխարգելման հանձնաժողովի, այնպես էլ՝ փորձագետների կողմից։

Նինա Կարապետյանցը «Փաստինֆո»-ի հետ զրույցում ասաց, որ շատ է շահարկվում 6 կողմ, 3 դեմ ձայները, հատկապես հաշվի առնելով, որ փակ քվեարկություն է եղել և փաստացի հայտնի չէ, թե ով ինչպես է քվեարկել, սակայն արձանագրեց, որ իշխանությունները ԲԴԽ-ում բազմաթիվ փոփոխություններ էին արել՝ ամեն անգամ նոր մարդ նշանակելիս բոլորին համոզում էին, որ սա դրական փոփոխությունների համար է, հասարակությունն էլ՝ դրանով կերակրվում էր։

Դիտարկմանը, որ Դանիել Իոաննիսյանի փոխանցմամբ՝ թե՛ փորձագետները, թե՛ ԿԿՀ-ն բացասական եզրակացություն են տվել բարեվարքությանը, այսինքն, ԲԴԽ-ի համար միևնույն էր եզրակացությունները, Կարապետյանցն արձագանքեց՝ հարց բարձրացնելով, թե տեղեկատվությունը փակ և գաղտնի է, որտեղից է ամենաիրազեկ մարդը ՀՀ-ում այդքան մանրամասն ինֆորմացիայի տիրապետում, ինչը ևս նշանակում է, որ համակարգը լավ չի աշխատում, արտահոսք է լինում։ Բացի այդ, իրավապաշտպանն արձանագրեց, որ այն բոլոր հիմքերը, որոնք անգամ կարիք չկար ներկայացնելու եզրակացությունների, զեկույցների տեսքով, հայտնի են անգամ դատական համակարգի հետ առնչություն չունեցող անձանց։

«Մնացական Մարտիրոսյանն այն կերպարներից էր, որոնց գործունեության մասին անգամ դատական համակարգի հետ երբեք չշփվող մարդը գիտեր, գոնե մեկ անգամ՝ լսել են։ Եթե նման քվեարկություն է լինում և վեց հոգի կողմ են քվեարկում, դա խոսում է միայն կառույցի ներսում տոտալ բարոյազրկման մասին »,- ասաց Նինա Կարապետյանցը։

Դիտարկմանը, որ ԲԴԽ-ն բոլորովին վերջերս այնքան ձգձգեց Մարտիրոսյանին կարգապահական պատասխանատվության ենթարկելու մասին գործի քննությունը՝ մինչև եռամսյա ժամկետների սպառված լինելու հիմքով կարճվեց վարույթը, դատավորի դեմ հարուցված վարույթը գուցե հենց ազդակ էր՝ «կոմպրոմատները» նրան հիշեցնելու և «ձգած» պահելու համար, արդյո՞ք սա չի նշանակում, որ դատավորին գործուղում են Հակակոռուպցիոն դատարան՝ ինչ-որ կոնկրետ գործերի համար ՝ Նինա Կարապետյանցն արձանագրեց. «Պատկերացնում եք՝ մի համակարգ, որը ստեղծված է ամբողջ դատական համակարգի պաշտպանվածությունը և պատասխանատվության հարցը լուծելու համար, և այդ կառույցում աշխատում են 9 դատավորի կարգավիճակ ունեցող մարդիկ, որոնք պրոֆեսիոնալ են և համարվում են փորձագետ՝ իրենց ոլորտում և այդ 9 հոգուց ոչ ոք չի տեսնում, որ Մնացական Մարտիրոսյանին պատասխանատվության ենթարկելու ժամկետը բաց են թողել։ Հարց ունեմ՝ ինչ արժե Մնացական Մարտիրոսյանին պատասխանատվության չենթարկելը։ ԲԴԽ բոլոր 9 անդամներին, այդ թվում՝ նորանշանակ նախագահին եմ հարցս ուղղում»։

Կարապետյանցի դիտարկմամբ՝ նմանատիպ կառույցներում կառավարելի մարդկանց ունենալը երանելի վիճակ է ցանկացած իշխանության համար, որովհետև կարողանում են լծակներն օգտագործել, այդ թվում, նախկինում իրենց կատարած հանցագործությունները՝ արդարադատության դեմ, նրանց ավելի կառավարելի դարձնելու համար։

«Դա է այն գործիքակազմը, որն օգտագործում էր հանցավոր ռեժիմը, որը պատվերով մի քանի գործերի դիմաց թույլ էին տալիս ինչ-որ կոռուպցիոն գործարքների գնալ։ Հիմար չէին նախորդ իշխանությունները, իրենք այդ կոռուպցիոն դեպքերը պահում էին որպես մահակ՝ կառավարելի դարձնելու, անհնազանդությունը կանխելու համար։ Հիմա, երբ նշանակվում է մարդ, որն իր քաշով մեկ փաստեր ունի իր վերաբերյալ, պարզ է, որ ինքը տոտալ կառավարելի է լինելու։ Այնպես չէ, որ ինքը դիմադրում է կառավարելի լինելու դեմ։ Ինքը նախորդ իշխանությունների ժամանակ չի դիմադրել, հիմա էլ՝ չի դիմադրում»,- ասաց նա՝ հավելելով, որ Մարտիրոսյանի նշանակումը համարում է որպես սեփական ժողովրդի, Հեղափոխության նվաստացում։

Հիշեցնենք, որ Մնացական Մարտիրոսյանի վարույթում մշտապես եղել են քաղաքականապես զգայուն, աղմկահարույց գործեր, ինչպիսիք են՝2008թ մարտի 1-ի վերաբերյալ «Յոթի գործը», որով ամբաստանյալները մեղավոր էին ճանաչվել և դատապարտվել ազատազրկման, ազատազրկման էր դատապարտվել նաև այսօր վարչապետի պաշտոնը զբաղեցնող Նիկոլ Փաշինյանը, «Առագաստ» սրճարանի՝ «Պրիվետ Ռոբ»-ի կամ «Կուկու»-ի հայտնի գործը, որով անցնում էր ՀՀ երկրորդ նախագահ Ռոբերտ Քոչարյանի թիկնախահ Աղամալ Հարությունյանը դատապարտվել էր, սակայն պատիժը պայմանականորեն չէր կիրառվել, Ժիրայր Սեֆիլյանի և Վարդան Մալխասյանի գործը, Յուրի Վարդանյանի վերաբերյալ գործը։ Հետհեղափոխական Հայաստանում Մնացական Մարտիրոսյանը շարունակեց քննել աղմկահարույց գործերը, նրա վարույթում են եղել գեներալ Մանվել Գրիգորյանի գործը, որով մինչ վճռի հրապարակումը Մանվել Գրիգորյանը մահացավ, սակայն Մարտիրոսյանը համառորեն չէր փոխում Գրիգորյանի խափանման միջոցը, թույլ չէր տալիս մեկնել արտերկիր՝ բուժվելու համար, Գրիգորյանի խափանման միջոցը փոխվեց միայն դատախազի՝ հրատապ նիստ հրավիրելու միջնորդությունից հետո, ինչից կարճ ժամանակ անց Գրիգորյանը մահացավ։ Հենց Մարտիրոսյանն է քննել Քաղաքաշինության կոմիտեի նախկին նախագահ Վահագն Վերմիշյանի և մյուսների, ՀՀ նախկին գլխավոր դատախազ Աղվան Հովսեփյանի, հասարակական-քաղաքական գործիչ Ավետիք Չալաբյանի վերաբերյալ քրեական գործերը։ Նրա վարույթում է եղել նաև պրոդյուսեր Արմեն Գրիգորյանի գործը, սակայն Գրիգորյանը հանկարծամահ է եղել հենց նիստերի դահլիճում։ Բացի բուն գործերի քննությունից՝ մինչև մինչդատական վարույթի գործերի քննության դատարանի ստեղծումը՝ Մարտիրոսյանի որոշմամբ կալանավորվել են մի շարք հասարակական-քաղաքական գործիչներ, անգամ դեպք է եղել, երբ «Ավան» նստավայրի հերթապահության ժամանակ կալանքի հարցը, միևնույնն է, քննել է «Կենտրոն» նստավայրի դատավոր Մնացական Մարտիրոսյանը՝ կալանավորման որոշում կայացնելով։ Խոսքը «Բավրայի» անցակետի հայտնի գործի մասին է, ինչի մասին Կառավարության նիստին հայտարարել էր հենց Նիկոլ Փաշինյանը։

Հեղինակ՝ Իզաբել Սահակյան

Աղբյուր` Փաստինֆո