Փաստ ինֆո

Բեռնափոխադրող ընկերությունների կրած վնասն օր օրի ավելանում է։ Ամսից ավել է՝ Վրաստանի տարանցիկ գոտում կուտակված բեռնատարները Լարսն անցնել չեն կարողանում. ՀՀ պատկան մարմինները խնդրից տեղյակ են, բայց լուծման ոչ տարբերակ, ոչ էլ ժամկետ են կարողանում նշել։

«Վրաստանի տարանցիկ գոտում ներկա դրությամբ միայն «Սպայկա»-ի 150 մեքենա կա կանգնած՝ 3000 տոննա բեռով։ Օրական կտրվածքով 40 տոննա փչացած միրգ-բանջարեղեն ենք դատարկում աղբանոցներում։ Ամսից ավել է՝անորոշ վիճակում ենք։ Կառավարությունը, կոմպետենտ բոլոր մարմիները տեղյակ են իրավիճակից, բայց ոչ ոք չգիտի, թե ինչ է լինելու կամ երբ է հնարավոր խնդիրը լուծվի»,-«Փաստինֆո»-ի հետ զրույցում ասում է «Սպայկա» ընկերության ներկայացուցիչ Մհեր Ղազարյանը։

Ղազարյանը նշում է՝ ահռելի վնասներ կրում և անորոշ վիճակում են շուտ փչացող ապրանք արտահանող բոլոր ընկերությունները՝ այդ թվում ծաղիկ, ձկնեղեն, կաթնամթերք և այլն։

«Արտահանումն այս ամենից ահավոր տուժել է։ Դեռ ոչ մեծ ընկերությունները տուժում են նաև նրանով, որ մեքենա չունեն, որ բարձեն, ուղարկեն պատվերները։ Ունեցած մեքենաները մնացել են ճանապարհին։ Եթե սովորաբար Ռուսաստան բեռնափոխադրումը տևում էր, միջինում, 10 օր, հիմա 1.5-2 ամիս ձգվում է։ Էլ չեմ ասում այն, որ Նոր տարվան ընդառաջ պատվերները շատացել են ու անհնար է կատարել բոլորը»,-ասում է Ղազարյանը։

Շուտ փչացող ապրանք արտահանող ընկերությունների վնասը, Ղազարյանի խոսքով, ստեղծված վիճակում կրկնապատկվել է. մի կողմից արտարժույթն է արժեզրկվել դրամի նկատմամբ, մյուս կողմից՝ ապրանքն է փչանում ճանապարհին։

«Եթե ՏՏ ոլորտը տուժում է դրամի արժևորումից, ապա ագրոոլորտը թե՛ դրանից, թե՛ Լարսում առաջացած խնդրից է տուժում։ Վրաստանով, փաստացի, Ռուսաստան բեռներ են տեղափոխվում նաև Թուրքիայից, Ադրբեջանից ու, իհարկե, հենց Վրաստանից։ Բնականաբար, վրացիների դեպքում խնդիր չկա, շուտ բաց են թողնում իրենց մեքենաները»,-նշում է Ղազարյանը։

«Սպայկա»-ի ներկայացուցչի խոսքով՝ ֆորս մաժորային իրավիճակով պայմանավորված՝ պայմանագրերում նշված ժամկետների մեջ որոշ դեպքերում, հնարավոր է, որ չտեղավորվեն, բայց այդ դեպքում էլ պատվիրատուին ուշացումը ֆորս մաժորով հիմնավորելը շատ դժվար կլինի, եթե ոչ՝ անհնար։

Համենայնդեպս, կրած վնասից զատ, տույժեր էլ կկրեն արտահանողները, թե ոչ, կախված կլինի նրանից, թե երբ կլուծվի Լարսում առաջացած խնդիրը։

Աղբյուր` Փաստինֆո