Փաստ ինֆո

2022թ. հոկտեմբերի 27-ին հայկական կողմին փոխանցված ժամկետային զինծառայող Աբրահամ Սարգսյանի դիակի դատաբժշկական փորձաքննության եզրակացությունն ընտանիքը դեռ չի ստացել։

«Մոտ մեկ ամիս առաջ է եղել, որ տղայիս մարմինը ճանաչել եմ, բայց առայսօր փորձաքննության եզրակացության հետ կապված ոչ մի բան չեն ասել մեզ, էդ եզրակացությունը մեզ չեն տվել։ Ասել են՝ երբ դատաբժիշկն իր գործն ավարտի, ամեն ինչ այդ ժամանակ պարզ կլինի։ Բայց թե ինչն է պատճառը, որ մինչև հիմա չեն տվել մեզ էդ թուղթը, չգիտեմ»,- «Փաստինֆո»-ի հետ զրույցում ասաց Աբրահամի հայրը՝ Արթուրը։

Եզրակացությունը ստանալու ժամկետների մասին ևս Աբրահամի հարազատներին ոչինչ չեն ասել։ Այդուհանդերձ, հայրը պնդում է, որ որդուն թշնամին սպանել է գերության մեջ՝ Ադրբեջանում։

«Համոզված եմ, որ իմ տղան չի մահացել վիրավորումից, իրեն տարել են ադրբեջանցիներն ու այնտեղ էլ տանջամահ արել։ Ես իմ տղային լավ եմ ճանաչում, գիտեմ, որ էնտեղ պարտադրած կլինեին, որ ասեր Ղարաբաղը Ադրբեջան է ու նման բաներ, իսկ ինքը երբեք նման բան չէր ասի, Հայաստանի ու Արցախի անվան հետ չէր խաղա։ Դրա համար էլ համոզված եմ, որ տղայիս տանջամահ են արել ադրբեջանցիները՝ իրենց չենթարկվելու համար»,-նշեց զոհված զինծառայողի հայրը։

Հիշեցնենք, որ Աբրահամը վիրավորվել էր սեպտեմբերի 13-14-ին Հայաստանի դեմ Ադրբեջանի իրականացրած հարձակման ժամանակ։ Ավելի վաղ «Փաստինֆո»-ի հետ զրույցում Աբրահամի հայրն ասել էր, որ որդու հետ՝ նրա հետ կապն ընդհատվելուց առաջ, նաև մի պայմանագրային է եղել, ում մարմինն Ադրբեջանը փոխանցել էր սեպտեմբերի 20-ին։

Առայժմ պարզ չէ, թե ռազմական ագրեսիայի ավարտից շուրջ 1,5 ամիս անց միայն զինվորի մարմինը փոխանցվել հայկական կողմին։ Արդյոք սա ապացույց չէ, որ զինվորը ողջ է եղել գերեվարման ժամանակ եւ սպանվել է հենց գերության մեջ։ Այս հարցի պատասխանը կտա փորձաքննության եզրակացությունը. Նախ, թե որն է եղել մահվան պատճառը ու թե երբ է այն վրա հասել՝ սեպտեմբերի 13-14-ին, թե ավելի ուշ։

Աղբյուր` Փաստինֆո