Փաստ ինֆո

Մեր զինվորների պաշտպանությունը ճիշտ չի կազմակերպվել, փաստացի անպաշտպան վիճակում են հայտնվել բազմաթիվ զինծառայողներ, բայց արդյո՞ք դիվիզիոնի պաշտպանության կազմակերպման պատասխանատուն ՊԲ հրամանատարն է։ Դիվիզիոնի պաշտպանությունը պետք է կզմակերպվեր դիվիզիոնի հրամանատարի կողմից։ Այս մասին լրագրողների հետ հանդիպման ժամանակ ասաց Ջալալ Հարությունյանի պաշտպան Արսեն Սարդարյանը՝ անդրադառնալով Ջալալ Հարությունյանին առաջադրված մեղադրանքի երկրորդ դրվագին։

Նշենք, որ Ջալալ Հարությունյանին առաջադրված մեղադրանքը բաղկացած է երկու դրվագից, որոնցից առաջինը վերաբերում է 2020թ հոկտեմբերի 7-ին կատարված հակահարձակման օպերացիային, երկրորդը՝ 2020թ հոկտեմբերի 12-ին դիվիզիոններից մեկում հակառակորդի հարձակման հետևանքով կորուստներին։

Պաշտպանը հայտնեց, որ 2020թ հոկետմեբրի 12-ից օրեր առաջ ՊԲ հրամանատարի կողմից հրաման է արձակվել, որը հստակ նշում է, որ մեր տարածք կա ներթափանցած հակառակորդի ուժեր, բոլոր այդ հատվածներում կարող է լինել դիվերսիոն խմբերի հարձակում, ուստի՝ յուրային զորքերի անցնել շրջանաձև պաշտպանության։

«Այս հրամանը եղել է։ Այս հրամանի առկայության պայմաններում ինչու՞ խրամատ չեն փորել, ինչու՞ երեխեքին չեն դիրքավորել, ինչու չեն պատշաճ պաշտպանություն կազմակերպել, ինչու են մարտկոցներն իրարից անկախ գործել, որակապես մի քանի անգամ ավել տեխնիկա ունենալու պայմաններում ինչու՞ կրակ չեն բացել հակառակորդի ուղղությամբ»,- ասաց Սարդարյանը՝ հավելելով, որ դիվիզիոնի հրամանատարությունը դիտակետում, որը մարտկոցների տեղակայման վայրից 1 կմ հեռավորության վրա, լսել են հակառակորդի խոսակցությունը և հասկացել, որ թշնամի է։

«Եթե լսում ես խոսակցությունները՝ 1 կմ-ի վրա, ինչու այդ ժամանակահատվածը չես օգտագործում՝ հրանոթներն ուղղելու համար, որ դիտակետից խփեիք ջարդեիք, դրա փոխարեն տագնապ է դրվել ու սկսել է խառը փախչել։ Տեսանյութեր կան, նայում ենք՝ մեր երեխեքի դիակները՝ ավտոմեքենաների կողքն են, այսինքն, փորձել են պաշտպանվել մեքենաների կողքը, որովհետև խրամատներ չի եղել, որ մտնեն մեջը պաշտպանվեն։ Հիմա ՊԲ հրամանատարը պե՞տք է գար այդտեղ խրամատ փորելով զբաղվեր»,- ասաց Սարդարյանը։

Աղբյուր` Փաստինֆո