Փաստ ինֆո

Եթե մի պետության քաղաքականությունը հային վերացնելն է, նրա հետ ի՞նչ խաղաղության մասին կարող է խոսք լինել: Խաղաղության կարիք բոլորս ունենք, բայց թուրքի հետ խաղաղության գնալն անհնար է: Նույնը կատարվեց 100 տարի առաջ, այսօրվա արկածախնդիրների նմանները նախկինում ևս եղել են, ովքեր ասում էին՝ թուրքերը փոխվել են, խաղաղության գնանք , իսկ ի՞նչ եղավ արդյունքում՝ մորթվեցին, նույն պատկերը հիմա է։ Խաբելով՝ թմրեցնում են հայ ժողովրդի ինքնապաշտպանական բնազդը, որպեսզի ազգը կործանվի: «Փաստինֆո»-ի հետ զրույցում նման հայտարարություն է արել «Սև հովազ» ջոկատի հրամանատար Ռուստամ Գասպարյանի եղբայրը՝ Սերոբ Գասպարյանը՝ անդրադառնալով հայ-ադրբեջանական հարաբերությունների կարգավորման գործընթացին և այդ երկրի հետ «խաղաղության պայմանագիր» կնքելուն:

Նիկոլ Փաշինյանը մինչ այս վստահություն էր հայտնում, որ մինչև տարվա վերջ խաղաղության պայմանագիրը կկնքվի, ավելին նշում էր, որ մինչ պայմանագրի ուժի մեջ մտնելը պետք է ավարտված կլինի նաև դելիմիտացիայի գործընթացը: Վերջերս, սակայն, նա հակասեց ինքն իրեն և ԱԺ-ում հայտարարեց, որ իրատեսական չի համարում մինչև «խաղաղության պայմանագրի» կնքումը դելիմիտացիայի գործընթացն ավարտելը:

Թե՞ ինչու Փաշինյանը հանկարծ փոխեց իր տեսակետը՝ Սերոբ Գասպարյանն ասաց՝ Փաշինյանի ցանկացած խոսք հակասում է մեկը մյուսին.

«Նրա ցանկացած հարցազրույցի ու ելույթի մեջ կան քրեական հանցագործության մասնիկներ: Այս մարդիկ դագաղներով եկան իշխանության, հիշո՞ւմ եք դեպք, որ այս աստիճանի մահեր ինքնասպանություններ, հանցագործություններ լինեն Հայաստանում, երկիրը քաոսի վերածեցի: Նայում ենք մարդկանց ունեցվածքները, հետո գնում ենք առաջնագիծ, նայում ենք զինվորին, զարմանում ենք, բա խաղաղության գնացողը Երևանի կենտրում կանգնած ոստիկանին 300-400 հազար դրամ աշխատավարձ կտա՞, իսկ կամավորականին, որը կյանքի գնով երկիր է պահում 170.000 դրամ, սա՞ է խաղաղություն, սա՞ է ճշմարտությունը: Ինքնաոչնչացման մեխանիզմը միացված է, մեր ազգին տանում են ոչնչացման »,-ասաց Սերոբ Գասպարյանը:

Ինչ վերաբերում է Ադրբեջանի նախագահի կողմից հաճախակի հնչեցվող հոխորտանքներին և ՀՀ-ի նկատմամբ տարածքային նկրտումներին՝ Սերոբ Գասպարյանը նշում է.

«Ալիևը տարիներ շարունակ հոխորտում է, Ալիևի կուսակցության պատգամավորներն ասում են՝ Հայաստանի Հանրապետություն միավոր չի եղել, դրանք մեր տարածքներն են, մենք հետ ենք վերցնելու,նույն էլ ասում է՝ Ալիևը՝ Սևանը մերն է, Զանգեզուրը մերն է, Երևանը մերն է, իսկ մեր իշխանիկները ասում են՝ խաղաղության ենք գնում՝ ՀՀ-ն տալու եք Ադրբեջանին կամ Թուրքիային ու խաղաղություն ենք ձեռք բերելու։ Ալիևը հոխորտում է , բայց պատասխան չկա, որովհետև մեր սահմանները բաց են»:

«Սեւ հովազ» ջոկատը՝ Սերոբ Գասպարյանի գլխավորությամբ, այս տարվա ապրիլի վերջին անժամկետ նստացույց էր սկսել Ազատության հրապարակում, այդ նույն ժամանակ Ազատության հրապարակում միաժամանակ մի քանի նստացույցեր էին իրականացվում:
Սերոբ Գասպարյանից հետաքրքրվեցինք «Սեւ հովազի» առաջիկա քայլերի մասին, մասնավորապես՝ արդյո՞ք պայքարի որևէ գործողություն մտադիր են նախաձեռնել առաջիկայում.

«Կգա ժամանակը, տեղյակ կլինեք: Հիմա այդ ողջ ռեսուրսը գտնվում է 4-5 հոգու ձեռքին, եթե ես փորձեմ վերցնել դրոշը և հայրենասեր մարդկանց հետ դուրս գամ, հրապարակում կանգնեմ, ի՞նչ եք կարծում, նորից այդ ընդդիմությունը չի՞ հայտնվի փողոցում, ինչպես մայիսին արեց: Նույն պատկերն է, մենք դուրս եկանք փողոց, երկու օր հետո իրենք դուրս եկան ու ամեն բան վերագրեցին իրենց՝ հացով, ջրով, գունագեղ բեմերով, ժողովրդին խաբելով, փողոցները չափագրեցին ու գնացին տուն»,-ասաց Գասպարյանը:

Աղբյուր` Փաստինֆո