Փաստ ինֆո

Նիկոլ Փաշինյանը հարցաքննվել է՝ Մովսես Հակոբյանի հայտարարությունների հիման վրա հարուցված քրեական գործի շրջանակներում, իսկ թե որ դրվագներով՝ իրավապահներն առայժմ չեն հայտնում։

Հիշեցնենք, որ Արցախյան երրորդ՝ 44-օրյա պատերազմի ավարտից հետո օրեր անց՝ 2020 թվականի նոյեմբերի 19-ին, Մովսես Հակոբյանն ասուլիսի ընթացքում խոսել էր 44 օրյա պատերազմի մասին՝ հայտարարելով, որ Նիկոլ Փաշինյանը պատերազմի երրորդ օրը կանգնեցրել է բանակի համալրումը` կամավորականներին ուղարկելով առաջնագիծ, նշել, որ պատերազմում պարտության ամենամեծ պատճառը ղեկավարումն է եղել, անգրագիտությունը, պատերազմի արվեստին ու ղեկավարման համակարգին չտիրապետելը, եւ որ գործող Կառավարությունը 2018 թվականին փոխել է սպառազինության ձեռքբերման ռազմական պլանը։ Նա նաեւ հայտարարել էր, որ պատերազմի ընթացքում հրամանատարական կետում է գտնվել նաեւ ՀՀ վարչապետ Նիկոլ Փաշինյանի կինը, մինչդեռ նման իրավունք նա չունի եւ հաստատել այն տեղեկությունները, որ հրամանատարական կետից հեռանալու՝ Ա.Հակոբյանին ուղղված խնդրանքից հետո, իրեն կանչել են Երեւան։

Հայտարարությունների հիման վրա ՀՔԾ-ում հարուցվել էր քրեական գործ՝ 2003թ ընդունված և այն ժամանակ գործող ՀՀ քրեական օրենսգրքի 308-րդ հոդվածի հատկանիշներով՝ պաշտոնեական լիազորությունները չարաշահելու վերաբերյալ։ Պատերազմի ընթացքում պաշտոնատար անձանց իրենց պաշտոնեական դիրքը չարաշահելու, առերևույթ պետական դավաճանություն կատարելու, ինչպես նաև՝ պատերազմին առնչվող հետագայում ներկայացված հաղորդումները հիմնականում կցվել են նշված գործին՝ դառնալով քննության առարկա հենց այդ գործի շրջանակներում։

Պատերազմից և քրեական գործի հարուցումից շուրջ երկու տարի անց՝ 2022թ ապրիլին, զոհված և անհետ կորած զինծառայողների ծնողները հանցագործության մասին հաղորդում են ներկայացրել ՀՀ գլխավոր դատախազություն՝ պահանջելով քրեական գործ հարուցել Նիկոլ Փաշինյանի հայտարարությունների հիման վրա, որը կրկին կցվել է սույն գործին և այժմ ծնողները դատական կարգով վիճարկում են հաղորդումն առանձին քննել և հարուցել քրեական գործ։ Դեռևս ապրիլին ծնողները պահանջել են՝ իրենց տալ տուժողի կարգավիճակ, ինչպես նաև՝ Նիկոլ Փաշինյանին անհապաղ հարցաքննել, ապա նրան որպես մեղադարյալ ներգրավել և ձերբակալել։ Տուժողի կարգավիճակ ծնողներին տրվել է՝ Հակակոռուպցիոն կոմիտեի (նախկինում՝ ՀՔԾ) քննիչի կողմից, իսկ Նիկոլ Փաշինյանին որպես մեղադրյալ ներգրավելու միջնորդությունը քննիչը հետաձգել էր։

Գործի նկատմամբ հսկողություն իրականացնող դատախազը մայիսին որոշում էր կայացրել՝ գործի քննչական ենթակայությունը փոխելու մասին՝ ՀԿԿ վարույթից գործը ուղարկելով ՀՀ ՔԿ ԶՔԳՎ։

«2020թ. սեպտեմբերի 27-ից նոյեմբերի 9-ն ընկած ժամանակահատվածում Ադրբեջանի ռազմաքաղաքական ղեկավարության կողմից Արցախի դեմ սանձազերծած ագրեսիվ պատերազմի ընթացքում Հայաստանի Հանրապետության բարձրաստիճան պաշտոնատար մի խումբ անձանց կողմից իրենց պաշտոնեական լիազորությունները չարաշահելու ենթադրյալ հանցագործության դեպքի առթիվ 2003 թվականի ապրիլի 18-ին ընդունված ՀՀ քրեական օրենսգրքի 308-րդ հոդվածի 2-րդ մասի հատկանիշներով հարուցված քրեական վարույթի նախաքննությունը 2022 թվականի մայիսի 4-ից շարունակվում է ՀՀ քննչական կոմիտեի զինվորական քննչական գլխավոր վարչության հատկապես կարևոր գործերի քննության վարչությունում»,- «Փաստինֆո»-ի հետ զրույցում հայտնեցին ՀՀ ՔԿ-ից՝ հաստատելով, որ սույն քրեական վարույթի շրջանակներում ՀՀ վարչապետ Նիկոլ Փաշինյանը հարցաքննվել է վկայի դատավարական կարգավիճակով՝ ՀՀ քրեական դատավարության օրենսգրքով սահմանված բոլոր պահանջների պահպանմամբ։

ՔԿ-ից չեն մանրամասնել, թե երբ է հարցաքննվել Փաշինյանը և որ դրվագների շուրջ, թեև, ինչպես արդեն արձանագրել ենք, գործը բազմադրվագ է։

Հեղինակ՝ Իզաբել Սահակյան

Աղբյուր` Փաստինֆո