Փաստ ինֆո

Ջալալ Հարությունյանի կողմից նախաձեռնվել է հակահարձակման օպերացիա այն պայմաններում, երբ ուժերի հարաբերակցությունն իբր եղել է 1/5-ին՝ հօգուտ հակառակորդի, այսինքն, առերևույթ մենք հնարավորություն չենք ունեցել հաջողությամբ պսակելու այդ հակահարձակումը և իբր հակառակորդի ուժերի այդպիսի առավելության պայմաններում նման գործողությունը հակասում էր մեր գործող նորմատիվ իրավական ակտերին։ Հարությունյանի պաշտպան Արսեն Սարդարյանը լրագրողների հետ հանդիպմանը նշեց, որ հոկտեմբերի 7-ին հակահարձակման օպերացիայի գործողությունը մեր համապատասխան փաստաթղթերով նախատեսված էր, փաստաթղթերի համաձայն՝ Արաքսի ափով հակառակորդի առաջխաղացման դեպքում պետք է հակահարված կատարվի, դա Ջալալ Հարությունյանն իրենից չի հնարել։

«Այս փաստաթղթին հասանելիություն ունեցող անձանց կողմից հաստատվել է, որ ժամանակն է կատարել հակահարվածը։ Այդ ժամանակվա տվյալները, որն ունեցել է Ջալալ Հարությունյանը, եղել է այն, ինչ եղել է մինչ այդ գծագրերը կազմելիս, այսինքն՝ մեկը, երկուսը չորսի հարաբերակցությունը։ Հիմա, պատեկրացրեք, պատերազմն ավարտվել է, ամիսներ հետո փորձագետները հաշվարկներ են անում և ասում 1-ը 5-ի հարաբերակցությունը։ Շատ վիճելի է, որ այս փորձագետները ճշգրիտ տվյալ են ստացել, բայց նույնիսկ, եթե ենթադրենք, որ ճիշտ է՝ ինչպես ենք մեղադրում հոկտեմբերի 7-ի գործողության համար անձին՝ այնպիսի տվյալով, որը կարող էր հասու լինել ամիսներ անց»,- ասաց Արսեն Սարդարյանը։

Նրա փոխանցմամբ՝ հակառակորդի առավելությունը վերաբերում է ընդհանուր ուժերի հարաբերակցությանը, բայց խոսքը գնում է կոնկրետ ուղղությամբ հակահարված կազմակերպելու մասին, այդ ուղղությամբ մենք ունեցել ենք հետախուզական տվյալներ, կատարվել է անհրաժեշտ ուսումնասիրություններ, տվյալներ է ունեցել հրամանատարը, որ ունենք առավելություն։

«Այսինքն՝ մեր ռեզերվային ուժերը, որոնք կարող են ներգրավվել այդ օպերացիային, ավելի ուժեղ են, քան հակառակորդի ուժերը, որոնք այդ տարածքում են»,- նշեց փաստաբանը։

Վերջնարդյունքը, փաստաբանի խոսքով, իրականում բավականին լավ արդյունք է եղել։ Օպերացիայի ընթացքում հակառակորդը մի քանի անգամ մեծ կորուստներ է կրել և այդ հանգամանքը չի կարողանում հերքել նաև ՔԿ-ն։

Նշենք, որ Ջալալ Հարությունյանին առաջադրված մեղադրանքը բաղկացած է երկու դրվագից, որոնցից առաջինը վերաբերում է 2020թ հոկտեմբերի 7-ին կատարված հակահարձակման օպերացիային, երկրորդը՝ 2020թ հոկտեմբերի 12-ին դիվիզիոններից մեկում հակառակորդի հարձակման հետևանքով կորուստներին։

Աղբյուր` Փաստինֆո