Փաստ ինֆո

Արցախի կարգավիճակը քննարկելու միակ ընդունելի ձևաչափը Մինսկի խումբն է, և Ալիևի հետ կարելի է բանակցել միայն այդ ձևաչափով լիարժեքորեն ներկայացված լինելով։ Այդ մասին «Փաստինֆո»-ի հետ զրույցում ասաց Արցախի ԱԺ պատգամավոր Դավիթ Գալստյանը։

«Ալիևը և բոլոր նրանք, ովքեր մտածում են, թե Արցախի հարցը քննարկումը ենթադրում է նրա որևէ ներկայացուցչի հետ շփում, ապա չարաչար սխալվում են։ Արցախի հանրապետությունը կայացած հանրապետություն է՝ իր բոլոր ինստիտուտներով, և Արցախի հետ պետք է խոսել ինստիտուցիոնալ մակարդակով։ Մեզ համար ընդունելի է սուբյեկտայնության մակարդակով ներկայացվածությունը, և այդ կերպ պետք է նստենք բանակցային սեղանի շուրջ»,-ասաց պատգամավորը։

«Բանակցություններին, ամեն դեպքում, Հայաստանը պետք է ներկա լինի՝ որպես Արցախի անվտանգության երաշխավոր։ Արցախն ու Հայաստանը մեկ անվտանգային գոտի են։ Եթե այսօր ՀՀ իշխանությունները չեն ուզում առաջ տանել Արցախի հարցը, ապա պարտավոր են գոնե կանգնել Արցախի կողքին։ Եթե այդ, այսպես կոչված, խաղաղության պայմանագիրը շրջանցի Արցախի հարցը, ապա ոչ մի խաղաղություն չի լինելու։ Ի վերջո, Հայաստանի և Ադրբեջանի հարաբերություններում առկա խնդիրն Արցախն է։ Արցախը Հայաստանից տարանջատելը հենց թշնամու նպատակն է և հենց հասնեն այդ նպատակին, կկործանվեն թե՛ Հայաստանը, թե՛ Արցախը»,-շեշտեց Արցախի ԱԺ պատգամավորը։

Գալստյանի արձանագրմամբ՝ Հայաստանը երբեք Արցախից չի հրաժարվել ու չի հրաժարվելու. խնդիրը իշխանությունն է, և եթե վերջինս հրաժարվում է առաջ տանել հայ ժողովրդի մի հատվածի՝ արցախահայության ինքնորոշման իրավունքը, ապա ամենաճիշտ տարբերակը հայկական շահը պաշտպանող ու առաջ տանող ազգային իշխանություն ձևավորելն է։

«Հայաստանի ու Արցախի խնդիրները մեկ միասնության մեջ պետք է դիտարկել. դրանք չի կարելի առանձնացնել։ Արցախը միայն արցախաբանկներինը չէ, Հայաստանն էլ՝ հայաստանաբնակներինը։ Որ պահին թշնամական պետություններին հաջողվեց քանդել Հայաստան-Արցախ-Սփյուռք եռամիասնությունը, որպես ազգ կորչելու ենք»,-նկատում է Գալստյանը։

Արցախի ԱԺ պատգամավորը մտավախություն, ամեն դեպքում, ունի, որ ՀՀ իշխանությունները թշնամական կողմից ասպարեզ նետված, այսպես կոչված, խաղաղության օրակարգին կուլ կգնան, ինչին էլ կհաջորդի Արցախը Հայաստանի ու արտաքին աշխարհի հետ կապող միակ միջանցքի վրա ադրբեջանական անցակետի տեղադրումը։

Աղբյուր` Փաստինֆո