Փաստ ինֆո

Ալիևի հայտարարությունն ամբողջությամբ համապատասխանում է այն տրամաբանությանը, որ Ադրբեջանը համարում է, թե Արցախի հարցը լուծել է: Սա ևս մեկ անգամ վկայում է, որ Ադրբեջանը չի դիտարկում և երբեք էլ չի դիտարկելու արցախահայությանը որպես լիարժեք բանակցային կողմ: «Փաստինֆո»-ի հետ զրույցում ասել է ԱԺ նախկին պատգամավոր Արման Աբովյանը՝ անդրադառնալով Ադրբեջանի նախագահի այսօր հնչեցրած հերթական հոխորտանքին առ այն, որ Ադբեջանի չի համաձայնի այսպես կոչված «խաղաղության պայմանագրում» անդրադառնալ Լեռնային Ղարաբաղին վերաբերող որևէ հարցի:

Նրա խոսքով՝ սա քաղաքական և քաղաքագիտական նշանակություն ունեցող հայտարարություն է, որով Ադրբեջանն ուզում է հերթական անգամ ցույց տալ, թե Արցախի խնդիր չկա, իրենք լուծել են այն. «Ադրբեջանը, լինելով ֆաշիստական, հակահայկական պետություն, իր վերջնական նպատակից հետ չի կանգնի, իսկ իր նպատակն այն է, որ հայակական կողմը վերջնականապես ոչնչացվի: Սա իրենց պետական դոկտրինն է, թե այդ ոչնչացումն ինչ խոսքերի տակ կքողարկեն, հայտնի չէ:

Իսկ նրանք, ովքեր կսկսեն հեքիաթներ պատմել այսպես կոչված «խաղաղության դարաշրջանի մասին», նրանց խորհուրդ կտամ զրուցել, օրինակ, հադրութցիների հետ և բոլոր պատասխանները կտրվեն»,-ասաց Աբովյանը:

Նույն իր այդ ելույթում Ալիևը ևս մեկ ուշագրավ հայտարարությունն է արել: Նա նշել է, թե պատրաստ են խոսել «Ղարաբաղում ապրող և ապրելու ցանկություն ունեցող մարդկանց» հետ, նաև պնդել է, թե պատրաստ են դրան, գործընթացը սկսել են։ Բայց, ըստ նրա, կան խանգարող երկրներ ու նշել, որ պետք է կոնսենուս Ադրբեջանի, ԵՄ-ի, ԱՄՆ-ի ու Ռուսաստանի միջեւ, այսինքն այն երկրների ու ինստիտուտների, որոնք, Ալիևի կարծիքով, կարող են այդ աշխատանքներին նպաստել։Ստացվում է՝ Ադրբեջանն աբողջությամբ հրաժարվում է Արցախի և արցախահայության հարցով բանակցել Հայաստանի հետ, ավելին՝ փորձում է դուրս մղել Հայաստանին այս գործընթացից:

Արման Աբովյանի արձանագրմամբ՝ Ալիևի այս հոխորտանքները հայկական կողմի դիրքորոշման և հայտարարությունների հետևանքն են.

«Հայաստանն ինքն է կամովին դուրս եկել գործընթացից, հայտարարել է՝ Ռուսաստան, միջազգային հանրություն, խնդրեմ՝ հեսա Ղարաբաղը, երաշխիքներ տվեք, բանակցեք, ես գործ չունեմ: Հայկական կողմն ասում է՝ Ռուսաստանն առաջարկել է, որ Արցախի հարցը մնա ապագային, և մենք համաձայն ենք այդ առաջարկի հետ, մյուս կողմից էլ ասում է՝ Ռուսաստանը թող մինչև վերջ հետամուտ լինի իր առաջարկին, կներեք, բա դուք ինչի՞ համար եք: Նիկարագուան էլ է այդ թեզն ընդունում, բայց դուք Հայաստանն եք, պարտավոր եք պաշտպանել Արցախի ինքնիշխանությունը և անկախությունը:

Այսինքն՝ Ալիևի հոխորտանքների հիմքը ՀՀ իշխանությունների հայտարարություններն են, որոնք, արդարության համար պետք է նշեմ, որ վերջին մի քանի օրվա ընթացքում 180%-ով փոխվել են, բայց հաշվի առնելով դառը փորձը՝ հնարավոր է էլի փոխվի»,-ասաց Արման Աբովյանը:

Աղբյուր` Փաստինֆո