Փաստ ինֆո

ՀՀ ԶՈՒ ԳՇ պետի նախկին տեղակալ Ստեփան Գալստյանը «Կենտրոն» ՔԿՀ-ից տեղափոխվել է «Էրեբունի» ԲԿ։ Նրա վիճակը խիստ անբավարար է։ Այս մասին «Փաստինֆո»-ի հետ զրույցում հայտնեց պաշտպան Անդրանիկ Մանուկյանը։

Հիշեցնենք, որ ԶՈՒ ԳՇ պետի նախկին տեղակալ Ստեփան Գալստյանը կալանավորված է 2021թ հոկտեմբերի 2-ին՝ ՊՆ նախկին նախարար Դավիթ Տոնոյանի, ԳՇ նախկին պետ Արտակ Դավթյանի. «Պատրոն Դավո» մականունով հայտնի Դավիթ Գալստյանի և մյուսների վերաբերյալ հայտնի գործի շրջանակներում։

Ստեփան Գալստյանի առողջական վիճակը կտրուկ վատթարացել է, ինչի հետևանքով նոյեմբերի 9-ին վերջինս տեղափոխվել է «Էրեբունի» ԲԿ և այժմ գտնվում է այնտեղ։ Պաշտպանն առայժմ զերծ մնաց մանրամասնելուց, թե ինչ հիվանդություն է՝ նշելով, որ չունի Գալստյանի համաձայնությունը և, որ դա բժշկական գաղտնիք է։ Պաշտպանը տեղեկացրեց, որ առաջիկայում պատրաստվում է միջնորդություն ներկայացնել՝ առողջական վիճակով պայմանավորված Գալստյանի նկատմամբ ընտրված խափանման միջոց կալանավորումն անազատության հետ կապ չունեցող խափանման միջոցով փոխարինելու մասին։ Իսկ թե արդյո՞ք Գալստյանի նկատմամբ հանձնաժողովային դատաբժշկական փորձաքննություն նշանակելու միջնորդություն ևս կներկայացվի՝ պաշտպանը նշեց, որ դեռևս նման անհրաժեշտություն չկա, դատաբժշկական փորձաքննություն պետք է իրականացվի այն պարագայում, երբ դատարանը ԲԿ փաստաթղթերը համարի անարժանահավատ կամ կասկածի տակ դնի և փորձի դատաբժշկական փորձաքննությամբ ստուգել։

Դիտարկմանը, որ Գալստյանի առողջական խնդիրների մասին ավելի վաղ էր հայտնի, արդյոք այդ հիմքով արդեն միջնորդություններ ներկայացվել են՝ խափանման միջոցի փոփոխման նպատակով, Մանուկյանն արձագանքեց՝ նշելով, որ Գալստյանը նախորդիվ ևս ունեցել է առողջական լուրջ խնդիրներ, բացի այդ՝ կրկնվել են այդ խնդիրները.«Մինչ օրս ունենք այն, ինչ ունենք»։ Մանուկյանի փոխանցմամբ՝ առողջական վիճակով պայմանավորված Գալստյանի խափանման միջոցը փոխելու վերաբերյալ բազմաթիվ միջնորդություններ են ներկայացվել Երևանի ընդհանուր իրավասության դատարան, որոնք մերժվել են, Հակակոռուպցիոն դատարանում դեռևս նման միջնորդություն չի ներկայացվել։ Իսկ թե արդյո՞ք նոր ի հայտ եկած հանգամանքներ առկա են, այսինքն, նոր հիվանդություններ կա՞ն, պաշտպանը նշեց, որ այնքանով, որքանով ինքն է հասկանում՝ կան այլ և նոր առողջական խնդիրներ։ Ըստ փաստաբանի՝ Գալստյանի առողջական վիճակն անհամատեղելի է կալանքի հետ։

Նշենք, որ Հակակոռուպցիոն դատարանում Դավիթ Տոնոյանի և մյուսների գործով դատական նիստը նշանակվել է նոյեմբերի 22-ին։

Հեղինակ՝ Իզաբել Սահակյան

Աղբյուր` Փաստինֆո