Փաստ ինֆո

Չկա որևէ երաշխիք, որ նույնիսկ խաղաղության պայմանագրի ստորագրումից հետո պատերազմ չի լինի։ Այս մասին Խորհրդարանական ճեպազրույցներում ասաց ԱԺ «Պատիվ ունեմ» խմբակցության պատգամավոր Տիգրան Աբրահամյանը՝ անդրադառնալով Նիկոլ Փաշինյանի երեկվա հայտարարությանը, համաձայն որի՝ Հայաստանն առաջարկել է Ադրբեջանին՝ խաղաղության շրջանակային պայամանագիր ստորագրել։

«Մարտավարական առումով կարելի է քննարկել՝ գնալ միանգամից խաղաղության պայմանագրի, թե շրջանակայինի։ Օրինակ՝ նույն Մադրիդյան փաստաթղթի վրա հիմնված գործընթացը, երբ ընթանում էր, կրկին երկու փուլից էր բաղկացած։ Առաջինը ենթադրում էր՝ սկզբունքների շուրջ փաստաթղթի համաձայնեցում, երկրորդ փուլում, որտեղ, ի դեպ, նախատեսված էր Արցախի ներգրավվածությունը, արդեն ենթադրում էր դետալացված պայմանագրի մշակում և հետագայում ստորագրում։ Այս իրավիճակում ամենակարևոր հարցը կախված է նրանից՝ ինչ սկզբունքների հիման վրա է գործընթացն ընթանում։ Եթե պայմանական, մեր ամենակարևոր սկզբունքներից մեկը, որը տարիներ շարունակ եղել է, Արցախի ինքնորոշման իրավունքի սկզբունքը արձանագրված չէ՝ ո՛չ շրջանակայինում, ո՛չ՝ հետագայում խաղաղության պայմանագրում, ապա գործընթացն այս տեսանկյունից արդեն որևէ նշանակություն չունի և Հայաստանի, Արցախի շահերը որևէ կերպ չի շոշափում»,- նշեց Աբրահամյանը՝ հավելելով, որ այս պահին ինքնորոշման իրավունքի սկզբունքը, որը գլխավորն է Արցախի հետ կապված գործընթացում, որևէ կերպ չի շոշափվում և որևէ կերպ չի արձանագրվում։

Անդրադառնալով Փաշինյանի՝ անկլավների վերաբերյալ հայտարարությանը, թե Ադրբեջանը մեզ մեղադրում է ադրբեջանական տարածքներ օկուպացնելու մեջ՝ նշելով, որ եթե դուրս գան, մենք էլ պետք է դուրս գանք և, պատրաստ է լսել Ադրբեջանին՝ Աբրահամյանը նշեց, որ հարցը պետք է դիտարկել Ադրբեջանի հնչեցրած այն հայտարարության համատեքստում, որ նրանք Հայաստանի հետ դեմարկացիայի և դելիմիտացիայի գործընթացը տեսնում են 1919-20թթ քարտեզներով։ Նրա խոսքվ՝ այդ ժամանակահատվածում կոնկրետ որոշումներ չկան՝ սահմանային խնդիրների կարգավորման առումով, սակայն, այդ ընթացքում երեք ամիսը մեկ իրավիճակ էր փոխվում։

«Ադրբեջանի իրական նպատակը, ինչն էլ այսօր հնչեցվում է Հայաստանից, իր համար ստեղծված իրավիճակը, այսինքն՝ Հայաստանի իշխանությունների այս պահին թուլությունը, պատրաստակամությունը, շատ ուղղություններով հակազդեցություն չապահովելու այս գործոնն օգտագործելն է և դիրքավորվելն է այն դիրքերում, որոնք այս պահին իրենք համարում են բարենպաստ»,-ասաց Աբրահամյանը՝ նշելով, որ Ադրբեջանի նպատակն է վերցնել դելիմիտացիայի և դեմարկացիայի համար այնպիսի ժամանակահատված, որը հեղհեղուկ է և լեգիտիմացնել՝ ՀՀ-ից բռնազավթված տարածքների հարցը։ Նրա խոսքով՝ Ադրբեջանի նպատակը բռնազավթված տարածքների մասով լեգիտիմացում ստանալն է։

Աղբյուր` Փաստինֆո