Փաստ ինֆո

ՀՀ զինված ուժերում ատեստավորման հետ կապված նախագիծն ունի բազմաթիվ ռիսկեր։ Նման գնահատականով է հանդես եկել ԱԺ «Պատիվ ունեմ» խմբակցության քարտուղար Տիգրան Աբրահամյանը։

Նրա խոսքով՝ նախագծում սահմանված չէ կառավարության այն որոշումը, որը կարգավորում է ատեստավորման գործընթաց՝ ինչ չափորոշիչների հիման վրա է կատարվելու, ինչ սկզբունքներով է իրականացվելու։ Սա, ըստ Աբրահամյանի, կարևոր է նրանով, որ այս գործընթացի ցանկացած խափանում Զինված ուժերում բերելու է շատ ավելի ծանր վիճակի, քան այսօր ունենք։ Ըստ պատգամավորի՝ նույնիսկ ամենաարդարացի մեխանիզմների ներդրման պարագայում էլ խրախուսման համակարգը պետք է դրվի այն ժամանակ, երբ բազային աշխատավարձը հասցված է համապատասխան մակարդակի, ու մարտական հերթապահության համար նախատեսված հավելավճարներն ունեն համապատասխան վիճակ, այսինքն՝ չկան այնպիսի ցածր թվեր, որոնք այսօր կան։

Անդրադառնալով «Պաշտպան Հայրենյանց» նախագծին՝ Աբրահամյանն ասաց, որ որոշակի խնդիրներ կան այդտեղ, ու ծրագրի արդյունավետությունը, մեծ առումով, կախված է նրանից, թե իրականության մեջ ինչքանով է պետությունը տվյալ իրավիճակում թիկունք զինծառայողին։ Նրա խոսքով՝ շատ կարևոր է հասկանալ, թե ինչ միջավայր է ստեղծված Զինված ուժերի ներսում՝ սկսած բարոյահոգեբանական վիճակից, կարգապահական խնդիրներից, և այլն։

«Այս պահին ԶՈՒ-ում ստեղծված իրավիճակի առումով բազմաթիվ խնդիրներ եմ տեսնում, բայց, որպես պայմանագրային զինծառայությանը աջակցող ծրագիր, կողմ ենք քվեարկել նախագծին. սա համարում ենք շանս բոլոր այն երիտասարդների համար, ովքեր ցանկութուն կունենան վեց ամիս հետո ընտրել պայմանագրային զինծառայությունը»,- նշեց նա։

Աղբյուր` Փաստինֆո