Փաստ ինֆո

Աշխատանքի և սոցիալական հարցերի նախարարը ֆինանսների նախարարի հետ միասին պետական բյուջեի նախագիծ է մշակել և բերել ԱԺ, որով առաջարկվում է՝ նախարարների աշխատավարձը հաջորդ տարի բարձրացնել 142 հազար դրամով, իրեց ղեկավարի՝ վարչապետի աշխատավարձը 200 հազար դրամով, իսկ աշխատող աղքատի աշխատավարձը բարձրացնել 7000 դրամով։ Այս մասին ճեպազրույցում ասաց ԱԺ «Հայաստան» խմբակցության պատգամավոր Թադևոս Ավետիսյանը։

Նրա խոսքով՝ եթե այս գնաճի տեմպերը շարունակվեն, մեկ անձի մեկ ամսվա նվազագույն սպառողական զամբյուղը 85 հազար դրամ կդառնա հաջորդ տարվա մինչև կեսերը կամ ավարտը։ Այսինքն, մենք պոսում ենք բացարձակ թվերի մասին, բայց դրանք, պատգամավորի դիտարկմամբ, ոչինչ չեն ասում։

«Ի վերջո հատկապես աշխատող աղքատների, անապահով խավի գնողունակությունը հարաբերականորեն ավելի արագ է նվազում, քանի որ իրենց եկամուտներն առանց այն էլ չեն հերիքում նվազագույն իրենց կարիքները հոգալու համար»,- ասաց նա։

Նրա խոսքով՝ իշխանությունները խոսում են տնտեսական ակտիվությունից, հույսը դրել են, որ ռուս-ուկրաինական պատերազմի հետևանքներով ձևավորված տնտեսական միջավայրի օգուտները դեռ կշարունակվեն հաջորդ տարի։

«Այսինքն, ժամանակավոր մի գործոնով՝ արտաքին գործոն, որի հետ իրենք աղերս չունեն, մեր տնտեսությունն աճում է, 14 տոկոս տնտեսական ակտիվություն կա, դրա հենքի վրա իրենք պլանավորում են հաջորդ տարվա բյուջեն՝ շատ լավ իմանալով, որ մեծ է ռիսկը, որ նման տնտեսական ակտիվություն չլինի։ Դրա համար էլ այդպես վախվորած, շատ քիչ չափերով ոչ համարժեք գնաճին որոշակի աճեր են նախատեսում հաջորդ տարվա համար»,- ասաց նա։

Պատգամավորն ընդգծեց՝ ահագնացող գնաճի բոլոր գործոնները հիմա կան, կանխատեսվում է, որ լինելու է նաև հաջորդ տարի։

«Այն բյուջեն, որ բերել են այսօրվա իշխանությունները, հետևյալի մասին է, որ ամեն հաջորդ օր, նաև հաջորդ տարի, մեր քաղաքացիները, խոսքը նախ և առաջ վերաբերում է աշխատող աղքատներին, միայնակ կենսաթոշակառուներին, ընդհանրապես աղքատ ընտանիքներին, ավելի վատ են ապրելու, որովհետև ամեն հաջորդ օր գները բարձրանում են, իրենց եկամուտներն էլ դրանց համապատասխան չեն բարձրանում»,- ասաց Թադևոս Ավետիսյանը։

Աղբյուր` Փաստինֆո