Փաստ ինֆո

Տավուշի մարզի Բերքաբեր գյուղում բերքը ծառի վրա փչանում է։ Գյուղատնտեսական անտոկոս վարկերով վերջին հինգ տարում մոտ 20 հա այգի են ստեղծել գյուղացիները՝ այն հույսով, որ իրացնելու խնդիր չեն ունենալու։ Հիմա շատերը փաստի առաջ են կանգնել։

«Մինչև 30-40 տոննա բերք կա ծառերի վրա։ Սպասում ենք, թե երբ ու ոնց կվաճառվի։ Մինչև այս տարի վաճառքի խնդիր չի եղել, տեղում վաճառում էինք, իսկ հիմա իրացման խնդիրը սրվել է։ Ե՛վ շատ դժվար է վաճառվում, և՛ բավականին էժան։ Մթերողների հետ էլ պայմանագրեր չունենք կնքած, հիմնականում մանրածախ վաճառք էինք անում»,-«Փաստինֆո»-ի հետ զրույցում ասաց Բերքաբերի վարչական ղեկավար Տիգրան Հարությունյանը։

Բերքաբերցիները գյուղին պատկանող վարելահողերի միայն 30 տոկոսն են կարողանում օգտագործել. 70 տոկոսը ադրբեջանական վերահսկողության տակ է դեռևս 1991 թվականից։

Եղած շուրջ 80 հա վարելահողերը գյուղի բոլոր տնտեսությունների միջև բաժանվել էր դեռ տարիներ առաջ։

Հարությունյանն ասում է՝ տարիներ առաջ հիմնականում ցորեն էին մշակում, հիմա՝ այգի։

«Այգեգործությունը եկամտաբեր է։ Ցորենի մշակությունը ձեռնտու չէ, քանի որ հողակտորները շատ փոքր են՝ հիմնականում 0.5 հա։ Բացի այդ, ոռոգման խնդիր էլ ունեինք։ Այս տարի նոր պոմպակայան կառուցվեց, ու հուսանք՝ մշակվող վարելահողերը կավելանան»,-նշեց գյուղի վարչական ղեկավարը։

Ներկայումս Բերքաբերի գյուղատնտեսական նշանակության հողերի մի զգալի մասը չի մշակվում. 80 հա-ից 20 հա-ն այգիներն են, մի մասի վրա ցորեն են մշակում, իսկ մնացածը որպես խոտհարք է ծառայում։ 

Հարությունյանը նկատում է՝ վաելահողերն ըստ նշանակության օգտագործելու խնդիրը միայն իրենց գյուղում չէ, որ առկա է, բայց գյուղատնտեսությունն ավելի արդյունավետ կազմակերպելու հնարավորությունները պետք է օգտագործել։

Նկատենք, որ Բերքաբերը խորհրդային տարիներին, երբ ադրբեջանցիները դեռ չէին օկուպացրել գյուղի վարելահողերի շուրջ 70 տոկոսը, մարզի մասշտաբով խաղողագործական ամենամեծ արտադրանքը տվող բնակավայրերի թվում էր։

Աղբյուր` Փաստինֆո