Փաստ ինֆո

Երևանի ընդհանուր իրավասության դատարանը՝ դատավոր Սերգեյ Սահակյանի նախագահությամբ, մերժել է ՀՀ նախկին փոխվարչապետ, ԱԺ «Հայաստան» խմբակցության պատգամավոր Արմեն Գևորգյանի հայցն՝ ընդդեմ «Քաղաքացիական պայմանագիր» խմբակցության՝ «Գռզո» մականունով հայտնի Խաչատուր Սուքիասյանի։ Այս մասին «Փաստինֆո»-ն տեղեկանում է «Դատալեքս» դատական-տեղեկատվական համակարգից։

Հիշեցնենք, որ Արմեն Գևորգյանը հայցադիմում էր ներկայացրել՝ պահանջելով դատարանից պարտավորեցնել Սուքիասյանին՝ հերքել պատիվն ու արժանապատվությունը արատավորող տեղեկությունները։ Հայցադիմումը ներկայացնելու առիթը եղել է Սուքիասյանի՝ ԱԺ նիստի ընթացքում արված հայտարարությունները։ Մասնավորապես, Սուքիասյանը հայտարարել էր. «Լավ գիտեք՝ 2004-ի տուրուդմփոցը Բաղրամյան փողոցում ինչի համար եղավ, լավ գիտեք՝ 2016-ի ՊՊԾ գնդի պատմությունն ինչի եղավ, նորից խնդրում էին, ժամանակ էին ուզում, որպեսզի էդ փաստաթուղթը ստորագրեն մի քիչ ուշ, հիմա հարմար չի, ընտրություններ ա. էդ ընտրությունների քողարկման տակ ժամանակ էին շահում: Բայց էդ ընթացքում ի՞նչ էր լինում. հասարակությունն ունեզրկվում էր, մի քանի տասնյակ մարդիկ հարստանում էին, պարոն Գեւորգյան, Դուք կյանքում բիզնես արե՞լ եք, բիզնես չի արել, բայց մի հարյուր միլիոն դոլարի տեր ա: Մեկդ չի՞ հարցնում` որտեղի՞ց իրան դա, միայն կենտրոնում 57 սեփականության իրավունք ունի, ո՞վ ա էդ իրավունքը տվել»:

Դատարանը մերժել է հայցադիմումը՝ գտնելով, որ Սուքիասյանի հայտարարությունները ոչ թե զրպարտություն են, այլ՝ գնահատողական դատողություններ։ Դատարանը որոշման հիմնավորման մեջ, հղում կատարելով «Parlament.am» կայքին նշել է, թե Սուքիասյանը իրավաբանի կրթություն չունի, ապա ընդգծել, որ Սուքիասյանի հայտարարություններին նախորդել են ՀՔԾ տարածած հաղորդագրությունը, մամուլի հրապարակումները՝ Արմեն Գևորգյանի կողմից առանձնապես խոշոր չափերով հանցավոր ճանապարհով ստացված եկամուտներն օրինականացնելու վերաբերյալ։ Ըստ դատարանի եզրահանգման՝ պատասխանողն օբյեկտիվորեն կարող էր հիմնվել ՀՔԾ հաղորդագրության և մամուլի հրապարակումների վրա։

«Դատարանը կարևորում է, որ պատասխանողը, չլինելով իրավաբան, պարտավոր չէր գիտակցել հնչեցված արտահայտությունների իրավական բովանդակությունը։ Հետևաբար՝ պատասխանողի կողմից կատարված արտահայտությունները հանդիսացել են փաստական հիմք ունեցող գնահատողական դատողություններ հայցվորի վերաբերյալ, ուստի չեն կարող հանդիսանալ զրպարտչական բնույթ կրող «փաստացի հայտարարություններ» և թույլատրելի են խոսքի ազատության տեսանկյունից»,- դատական ակտում նշել է դատավոր Սերգեյ Սահակյանը։

Դատարանի վճռի դեմ Արմեն Գևորգյանը վերաքննիչ բողոք է ներկայացրել՝ պահանջելով բեկանել առաջին ատյանի դատարանի որոշումը։ Բողոքը կքննվի Վերաքննիչ քաղաքացիական դատարանի դատավոր Սամվել Գրիգորյանի նախագահությամբ, կազմով դատավորներ ՝ Արման Կուրեխյանի, Անի Մխիթարյանի։ Բողոքն արդեն վարույթ է ընդունվել։

Աղբյուր` Փաստինֆո