Փաստ ինֆո

Որոշ տելեգրամ ալիքներով երեկ տեղեկատվություն տարածվեց, թե իբր Թուրքիայի պայթյունի պատասխանատվությունն իր վրա է վերցրել հայկական ազատագրական գաղտնի բանակը՝ ԱՍԱԼԱ-ն, սակայն սա որևէ տրամաբանության մեջ չի տեղավորվում, քանի որ ինչպես գիտենք այդ կազմակերպությունը նվազեցրել է իր գործունեությունը և սա՝ ինչպես «Փաստինֆո»-ի եթերում հայտարարեց միջազգայնագետ Գրիգոր Բալասանյանը, ակնհայտորեն Թուրքիայի կողմից տարածվող տեղեկատվական դիվերսիա է Հայաստանի և հայ ժողովրդի հանդեպ։

«Սրանով՝ ինչպես Իրաքյան Քուրդիստանի պարագայում, Թուրքիան հող է նախապատրաստում Հայաստանի դեմ որևէ գործողություն կատարելու՝ այդ թվում նաև հատուկ ռազմական գործողության մասին կարող է խոսք լինել, որպեսզի հիմնավորի իր քայլերը և նշի, որ եթե հայկական կազմակերպությունն է իր վրա վերցնում պատասխանատվությունը, նշանակում է Թուրքիան ունի սուվերեն իրավունք հակաահաբեկչական գործողություն սկսելու ինչպես Հայաստանի, այնպես էլ արտերկրում՝ հայկական կազմակերպությունների նկատմամբ»,-նշեց Բալասանյանը՝ հավելելով, որ ակնհայտորեն սա քարոզչական նպատակներով է արվում, որն իրականության հետ որևիցե կապ ունենալ չի կարող։

Սակայն, այդուհանդերձ հայկական կողմը պետք է լրջորեն զբաղվի տեղեկատվական այս դիվերսիայով և, ըստ Բալասնյանի՝ փորձի գտնել տեղեկատվության իրական աղբյուրն ու քայլեր ձեռնարկի Թուրքիային զգուշացնելու, որ ահաբեկչությունը հայկական կողմի հետ որևէ կապ չունի, և Հայաստանը նման մեթոդներով չի աշխատում։  Այդ գործելաոճը հարևան հայտնի երկու պետություններին է հատուկ։

Աղբյուր` Փաստինֆո