Փաստ ինֆո

Որովայնի ճարպից ազատվելու համար հարկավոր է ավելի քիչ նյարդայնանալ և նվազեցնել ալկոհոլի օգտագործումը, կարծում է բժիշկ Մարկ Բոլը․ Նա «Eat This, Not That» նյութում թվարկել է հինգ պարզ եղանակ՝ նիհարելու համար:

Բոլը բացատրել է, որ կան ճարպային կուտակումների տարբեր տեսակներ, և որովայնի շրջանում հաճախ առաջանում է ներքին օրգանների ճարպ: Այն կուտակվում է որովայնի օրգանների շուրջ և կարող է առաջացնել սրտի հիվանդությունների, հիպերտոնիայի և այլ վտանգավոր հիվանդությունների զարգացում:

Առաջին հերթին բժիշկը խորհուրդ է տալիս բարձրացնել ֆիզիկական ակտիվությունը և հիշել, որ սպորտի կամ դիետայի միջոցով հնարավոր չէ նիհարել միայն որոշակի հատվածում՝ լինի դա որովայն, թե ազդրեր։ Նա խորհուրդ է տվել ամենօրյա զբոսանքներ կատարել ոտքով եւ լրացուցիչ ֆիզիկական ակտիվության հնարավորություններ փնտրել, օրինակ՝ հրաժարվել վերելակի օգտագործումից։

Արդյունավետ քաշի կորստի համար Բոլը խորհուրդ է տալիս ավելացնել սննդակարգում սպիտակուցի, բանջարեղենի և մրգերի քանակը: «Սպիտակուցի որակյալ աղբյուրներ ավելացնելը նույնպես կարևոր է և կարող է օգտակար լինել։ Հնարավորության դեպքում ընտրեք ոչ յուղոտ սպիտակուցներ, ինչպիսիք են ձուկը և հավը», — բացատրել է մասնագետը:

Անհրաժեշտ է նաև նվազեցնել ալկոհոլի օգտագործումը։ Հետազոտությունները ցույց են տալիս, որ ալկոհոլը նպաստում է որովայնի շրջանում ճարպային կուտակումների առաջացմանը։ Բացի այդ, քաշի ավելացման պատճառը կարող է լինել սթրեսը և անորակ քունը: Սթրեսի մակարդակը նվազեցնելու համար բժիշկն առաջարկում է փորձել շնչառական պրակտիկա և մեդիտացիա: Եթե կա քրոնիկ անհանգստություն, ապա ավելի լավ է դիմել մասնագետի:

Եզրափակելով, բժիշկը հավելել է, որ քաշի կորստի հիմնական կանոններից մեկը կալորիականության դեֆիցիտի ստեղծումն է: «Եթե շաբաթվա սկզբին նախապես պլանավորեք (կամ նույնիսկ պատրաստեք) ձեր բոլոր կերակուրները, ապա ձեզ համար ավելի հեշտ կլինի հետևել սննդակարգին՝ առանց դրա մասին ամեն օր մտածելու», — եզրափակել է նա։

Աղբյուր` Փաստինֆո