Փաստ ինֆո

Ադրբեջանական վերջին սադրանքները ևս մեկ անգամ փաստում են, որ իրենք մտադրություն չունեն նորմալ հարաբերություններ ունենալ Արցախում բնակվող հայերի հետ, նրանց պետք է միայն տարածք՝ առանց հայ բնակչության: «Փաստինֆո»-ի հետ զրույցում նման դիտարկում է արել քաղաքական մեկնաբան Հայկ Խալաթյանը՝ հավելելով, որ սրա մասին են վկայում ոչ միայն պարբերաբար տեղի ունեցող սահմանային սադրանքները, այլ նաև հայկական պատմական և մշակութային ժառանգության ոչնչացումը, որը տեղի է ունենում Ադրբեջանի կողմից օկուպացված տարածքներում:

Նշենք, որ որ վերջին օրերին Ադրբեջանը կրկին սադրանքների է դիմում Արցախի ուղղությամբ, ավելին՝ թիրախավորում է հենց խաղաղ բնակչությանը: Ադրբեջանական սադրանքների հետևանքով վերջերս Խրամորթում խաղաղ բնակիչ էր վիրավորվել:

Մեր այն դիտարկմանը, որ խաղաղ բնակչության դեմ իր ագրեսիայով Ադրբեջանն ինքը, փաստացի, հիմք չի ստեղծում, որպեսզի ռուս խաղաղապահների ներկայությունն Արցախում ավելի կարևորվի, այսպիսով նաև մեծացնելով Ռուսաստանի նշանակությունը մեր տարածաշրջանում՝ Հայկ Խալաթյանը հակադարձեց՝ նշելով, որ Ալիևն ամենևին շահագրգռված չէ, որ Արցախում ռուս խաղաղապահները մնան, քանի որ միակ բանը, որ խանգարում է նրան, որպեսզի ամբողջությամբ փակի Արցախի հարցը՝ ռուս խաղաղապահներն են:

Ավելին՝ նրա կարծիքով՝ եթե ռուս խաղաղապահները դուրս գան, որևէ այլ խաղաղապահ չի գալու Արցախ.

«Եթե որևէ պատճառով ռուս խաղաղապահները դուրս բերվեն Արցախից, ապա Ադրբեջանը թույլ չի տալու, որ այլ խաղաղապահներ տեղակայվեն այնտեղ: Սրա մասին վկայում են նաև վերջին սադրանքները հայ-ադրբեջանական սահմանին, չնայած ԵՄ դիտորդական խումբն այնտեղ մոնիտորինգ է անում, բայց դա որևէ կերպ չի խոչընդոտում Ադրբեջանին: Նա վստահ է, որ ներկայիս աշխարհաքաղաքական պայմաններում ԵՄ-ն կամ Արևմուտքը չեն գնա որևէ կոշտ քայլի, լավագույն դեպքում որոշ հայտարարություններ անեն ու վերջ»,-ասաց Հայկ Խալաթյանը:

Աղբյուր` Փաստինֆո