Փաստ ինֆո

Թուրքիան և Ադրբեջանը ոչնչի առաջ չեն կանգնելու, միայն համարժեք ուժային պատասխանը կզսպի նրանց, այլ տարբերակ չկա: «Փաստինֆո»-ի հետ զրույցում հայտարարել է ԱԺ նախկին պատգամավոր Արման Աբովյանը:

Ադրբեջանը վերսկսել է իր սադրանքները թե՛ Հայաստանի, թե՛ Արցախի ուղղությամբ: Ադրբեջանական ագրեսիայի հետևանքով վերջերս Գեղարքունիքում հայ զինվոր էր վիրավորվել, իսկ Խրամորթում՝ խաղաղ բնակիչ:

Չնայած այն հանգամանքին, որ հայ-ադրբեջանական սահմանին արդեն տևական ժամանակ է՝ ինչ իր գործունեությունն է սկսել ԵՄ դիտորդական առաքելությունը, բայց նույնիսկ սա չի զսպում թշնամու սադրանքները:

«Փաստինֆո»-ի հետ զրույցում Արման Աբովյանը համոզմունք հայտնեց, որ որևէ դիտորդական առաքելություն չի զսպելու Թուրքիային և Ադրբեջանին, որոնց վերջնական նպատակը Հայաստանի տարածքով ընդհանուր սահման ունենալն է.

«ԵՄ դիտորդական առաքելություն կլինի, թե մեկ ուրիշ, չեն կանգնեցնելու թուրք-ադրբեջանական տանդեմին, ինչպես չկանգնեցրեց եվրոպական պետությունների հայտարարություններն առ այն, որ Ադրբեջանը օկուպացրել է Հայաստանի տարածքը: Նրանք հետևողականորեն իրականացնում են իրենց դոկտրինի դրույթներն առ այն, որ գնալու են դեպի ՀՀ մասնատում՝ վերջնակետ համարելով երկրների միջև ընդհանուր սահման ձևավորելը, կանվանեք դա միջանցք, կամ ուրիշ բան, կարևոր չէ:

Միայն ու միայն համարժեք ուժային պատասխանը նրանց կկանգնեցնի, մեկ էլ՝ Ալիևի ընտանիքի երկու հաշվի սառեցումը բրիտանական բանկերում «կուռկուռի ձագ կդարձնի»,-ասաց Աբովյանը՝ հիշեցնելով, որ Ալիևն ինքն է հայտարարել է, թե իր համար որևէ փաստաթուղթ արժեք չունի, և միայն ուժի գործոնն է որոշիչ:

Ինչ վերաբերում է Արցախում ադրբեջանական սադրանքներին՝ Արման Աբովյանը նշում է՝ սրա նպատակը ռուս խաղաղապահներին վարկաբեկելն է և նրանց առաքելությունը նսեմացնելը.

«Սրանով է պայմանավորված նաև նրանց կողմից տարածվող այն ֆեյք տեղեկությունները, թե հայկական կողմը Արցախից և ՀՀ տարածքից գնդակոծում է: Ինչպես նաև նրանց պետական լրատվամիջոցների այն պնդումները, թե Արցախի վերջին հանրահավաքը ռուս խաղաղապահներն էին կազմակերպել »,-ասաց նա:

Արման Աբովյանը մի կարևոր փաստի վրա ևս ուշադրություն է հրավիրում, որ ադրբեջանական կողմի այս սադրանքները զուգադիպեցին ԱՄՆ պետքարտուղարության այն հայտարարության հետ, որ ԱՄՆ-ն Ադրբեջանի կողմն է՝ Իրանի հետ ենթադրվող հակամարտության դեպքում.

«Թե՛ Արևմուտքի, թե՛ Ալիևի թե՛ Թուրքիայի նպատակը ռուս խաղաղապահների ներկայությունը նվազեցնելն է մեր տարածաշրջանում, իսկ դրան կարելի է հասնել միայն ռուս խաղաղապահների պատասխանատվության գոտում սադրանքներ հրահրելով:

Ադրբեջանն ուզում է ցույց տալ, որ ռուս խաղաղապահները չեն կարողանում վերահսկել իրավիճակը, բայց փաստ է, որ ռուս խաղաղապահների ներկայությունը միակ երաշխիքն է, որ այնտեղ հայ բնակչությունը չի կոտորվի »,-ասաց Աբովյանը, միևնույն ժամանակ նկատելով, որ այս պահին ռուսական կողմը փորձում է հակակշիռների վրա խաղաղալ և միանշանակ չարձագանքել ադրբեջանական կողմի սադրանքներին, ինչն էլ իր հերթին առիթ է տալիս Ադրբեջանին, որ սադրանքները ուժգնացնի.

«Բայց այս պրոցեսն անվերջ չի կարող շարունակվել, ինչ-որ պահի ռուս խաղաղապահները կոշտ կարձագանքեն, քանի որ իրենց այլընտրանք չի թողնում Ադրբեջանը, անելանելի վիճակի մեջ են դնում խաղաղապահներին»,-նշեց զրուցակիցը:

Աղբյուր` Փաստինֆո