Փաստ ինֆո

Թուրքիայի իրավապահ մարմինները հայտնել են, որ Ստամբուլում տեղի ունեցած ահաբեկչության գործով 46 մարդ է բերման ենթարկվել։

Նշենք, որ կիրակի օրը՝ նոյեմբերի 13-ին, Թուրքիայի ժամանակով 16:20-ին Ստամբուլի Թաքսիմի կենտրոնական հրապարակին հարող «Իսթիքլալ» պողոտայում տեղի է ունեցել հզոր պայթյուն ։ Ներկայիս տվյալներով՝ պայթյունի հետևանքով մահացել է 6, վիրավորվել 81 մարդ։ Տեղի ունեցածի հիմնական վարկածը համարվում է ահաբեկչությունը։

Թուրքիայի նախագահ Ռեջեփ Թայիփ Էրդողանն Ինդոնեզիա մեկնելուց առաջ մամուլի ասուլիսի ժամանակ հայտարարել էր, որ պայթյունի դեպքից «ահաբեկչության հոտ է գալիս»։ Նա նշել էր, որ, ըստ նախնական տվյալների, այդ գործում մի կին է ներգրավված եղել։

Թուրքիայի հեռուստաալիքը հայտնել էր, որ Ստամբուլի ոստիկանությունը գրեթե թեժ հետքերով մի կնոջ է ձերբակալել, որը պայթուցիկ սարքով պայուսակ է թողել Իսթիքլալ փողոցում։ «Ձերբակալությունների շնորհիվ հաջողվել է խուսափել նոր զոհերից։ Այժմ հետաքննությունը պետք է պարզի, թե ով է կանգնած Ստամբուլում տեղի ունեցած ահաբեկչության կազմակերպման հետևում»,-, հեռուստաընկերության եթերում ասել է անվտանգության փորձագետ Ջոսքուն Բաշբուղը։

Կասկածյալ կնոջ երթուղուն հնարավոր է եղել հետևել փողոցում տեղադրված բազմաթիվ տեսախցիկների շնորհիվ։ Նրա վարձակալած բնակարանում հայտնաբերվել է ատրճանակ և դրա համար նախատեսված պարկուճներ։

Պայթյունի գլխավոր կասկածյալը և ևս 21 անձինք, ովքեր կարող են ներգրավված լինել հարձակման մեջ, տեղափոխվել են Ստամբուլի անվտանգության վարչություն, որտեղ էլ տեղի է ունենում նրանց հարցաքննությունը։

Ստամբուլում տեղի ունեցած պայթյունի մեջ կասկածվողը Սիրիայի քաղաքացի Ահլամ Ալբաշիրն է,- գրում է ՌԻԱ Նովոստին` հղում անելով թուրքական մամուլին։

Նա խոստովանել է, որ կապեր ունի Քրդստանի բանվորական կուսակցության հետ։

Աղբյուր` Փաստինֆո