Փաստ ինֆո

Երեկ ադրբեջանական դիրքից արձակված կրակոցներից մարմնական վնասվածքներ ստացած Արցախի Խրամորթ գյուղի բնակիչ  Ա. Հայրապետյանի վիճակը բավարար է։ Այդ մասին «Փաստինֆո»-ի հետ զրույցում ասաց Խրամորթի գյուղապետ Զորիկ Աբրահամյանը։

«Երեկվա դեպքից հետո կրակոցներ էլ չեն եղել։ Ուղղակի, ադրբեջանցիների սադրանքները վերջ չունեն։ Ամեն անգամ խաղաղապահներին վստահեցնում են, թե էլ չի կրկնվելու, բայց պարբերաբար կրակում են մեր ուղղությամբ։ Երեկ գյուղատնտեսական աշխատանքներ կատարող գյուղացիների ուղղությամբ որ կրակել են, խաղաղապահները հենց տրակտորի մոտ են եղել։ Մենք մտածում ենք՝  բանակցությունները գոնե մի դրական արդյունք տան, բայց թշնամին անընդհատ սադրանքների է դիմում»,-ասաց Աբրահամյանը։

Արցախ ներխուժած ու 2021թ․ մարտից անմիջապես Ասկերանի շրջանի  Խրամորթ գյուղի հարևանությամբ տեղակայված ադրբեջանական ստորաբաժանումները բացի հրադադարի ակնհայտ խախտումներից, տևական ժամանակ է, որ նաև հոգեբանական ուժեղ գրոհի են անցել։

«Իրենց հիմնն ու մուղամներն են անընդհատ միացնում։ Գիշերվա ժամը երկուսին մեկ էլ ոռնոցները գցում են, երեխաներին քնահարամ անում։ Ճիշտ է, մեր դուխը տեղն է, շատ դժվար է մեզ կոտրելը, բայց ամեն դեպքում, գիշերվա կեսին ձենները որ գցում են, ո՞նց կարող է մարդկանց անհանգստություն չպատճառեն»,-ասում է Խրամորթի գյուղապետը։

Աբրահամյանը շեշտում է՝ թշնամին որ միացնում է իրենց մուղամը, մենք էլ մեր երգերն ենք միացնում։

«Որոշել ենք՝ մենք էլ մեր երգերը միացնենք։ Տեսանք, որ մեր չմիացնելով բան չի փոխվում․ մեկ է, իրենք պարբերաբար իրենց մուղամով փորձում են ընկճել մեզ, մենք էլ իրենց պատասխանն ենք տալիս»,-ասաց Աբրահամյանն ու հավելեց՝ խրամորթցիներն իրենցից կախվածն անում են, բայց ադրբեջանցիներն իրենց սադրանքները  շարունակելու են, քանի դեռ միջազգային հանրությունը շարունակում է չտեսնելու տալ նրանց՝ Արցախը հայաթափելու, էթնիկ զտման ենթարկելու հետևողական քաղաքականությունը։

Հիշեցնենք, որ երեկ՝ ժամը 16:30-ի սահմաններում, Խրամորթ գյուղի բնակիչներ 27-ամյա Ս.Վանյանը և 45-ամյա Ա. Հայրապետյանը նշված գյուղի վարչական տարածքի «100 հեկտար» կոչվող տեղանքում «Տ-150» մակնիշի տրակտորով գյուղատնտեսական աշխատանքներ իրականացնելիս մերձակա տարածքում տեղակայված ադրբեջանական մարտական դիրքից նրանց ուղղությամբ կրակ է արձակվել։

Կրակոցներից ջարդվել է տրակտորի դիմային և հետևի հողմապակիները։ Ջարդված դիմապակու կտորները դիպչել են Ա. Հայրապետյանի դեմքին`պատճառելով մարմնական վնասվածքներ:

Վերջինս տեղափոխվել է հանրապետական բժշկական կենտրոն։

Աղբյուր` Փաստինֆո