Փաստ ինֆո

Կւսակցական հայրենասերները դեռ երկար ճանապարհ ունեն անցնելու մինչև հասկանան, որ քաղաքական սխալների և հիմարությունների քննադատությունը (այսինքն՝ վերլուծությունն ու մտքի աշխատանքը) այդ իրենց ասած «ավելի լավ անելու (գործելու)» պարտադիր նախապայմանն ու նախադրյալն է։ Ֆեյսբուքյան գրառմամբ նման դիտարկում է արել պատմաբան Արմեն Այվազյանը։ «Կա հայրենասիրության մի թերի և արատավոր տեսակ՝ կուսակցական հայրենասիրությունը (հայկական պայմաններում այս երևույթը կարելի է կոչել նաև կլանային կամ թայֆայական հայրենասիրություն)։ Հայրենասերների այդ խումբը հակառակորդ ճամբարում տեսնում է բոլոր սխալները, թերությունները, հանցագործությունները, դավաճանություններն ու հիմարությունները։ Բայց երբ ճիշտ նույն սխալները, թերությունները, հանցագործությունները, դավաճանություններն ու հիմարությունները կատարում է իր կուսակցությունը կամ քաղաքական խմբավորումը՝ բերանը ջուր է առնում, գլուխն էլ հողի մեջ մտցնում։

Հայաստանում վերջին երեք տասնամյակն այդ տխուր իրավիճակի տիպիկ դրսևորումների ոսկե դարաշրջանն էր։ Հիմա էլ նույնն է։ Քարը գլուխը՝ թե միայն լռեին ու գլուխները հողի մեջ պահեին, բայց չէ՝ մի բան էլ դեռ բարձրաձայն վրդովվում են, թե «ինչու՞ եք մեր գեշ քայլերն ու արարքները քննադատում, դրա փոխարեն, եթե կարող եք, գնացեք դուք ավելի լավ արեք»։ Այս անշաղկապ ու անտրամաբանական հոխորտանքն իր հերթին ցույց է տալիս, որ կուսակցական հայրենասերները դեռ երկար ճանապարհ ունեն անցնելու մինչև հասկանան, որ քաղաքական սխալների և հիմարությունների քննադատությունը (այսինքն՝ վերլուծությունն ու մտքի աշխատանքը) այդ իրենց ասած «ավելի լավ անելու (գործելու)» պարտադիր նախապայմանն ու նախադրյալն է։ Կուսակցական հայրենասերներին ամենից առավել հետաքրքրում է խմբավորման (թայֆայի) պետական ռեսուրսներին տիրապետելու հարցը, իսկ թե ինչ ազգային-պետական-հանրային նպատակներ իրագործելու համար՝ դա արդեն նրանց ուղեղում զբաղեցնում է յոթերորդ տեղը, որքան էլ իրենք հակառակը փորձեն պնդել։

Ավելի հստակեցնելու հարկ չկա, որովհետև, կարծում եմ, բոլորին ծանոթ ու համատարած երևույթի մասին եմ խոսում։

Խոշոր հաշվով, այս երևույթը հայկական ազգային պետության բացակայության հետևանք է։ Հայկական քաղաքական դաշտը թայֆայբազներից պետք է մաքրել, այլապես Էշը տեղից երբեք էլ չի շարժվի»,-գրել է նա։

Աղբյուր` Փաստինֆո