Փաստ ինֆո

Ապօրինի ծագում ունեցող գույքի բռնագանձման մասին օրենքի ընդունումից ավելի քան երկու տարի անց դեռևս որևէ դատական ակտ չկա՝ այսպես կոչված ապօրինի գույքի բռնագանձման վերաբերյալ։

Նշենք, որ Օրենքն ուժի մեջ է մտել 2020թ մայիսի 23-ից։ Այս ընթացքում իրավապահները բազմիցս հայտարարել են մի շարք նախկին պաշտոնատար անձանց գույքի վերաբերյալ ստուգումներ իրականացնելու, ենթադրյալ ապօրինի ծագման գույքի բռնագանձման վարույթներով նրանց դատախազություն հրավիրելու, հայցադիումներ ներկայացնելու, վարույթի շրջանակներում որպես հայցի ապահովման միջոց գույքի վրա դրված արգելանքների մասին։ Մասնավորապես, հայտնի է, որ ապօրինի գույքի բռնագանձման շրջանակներում արգելանքներ են դրվել ՀՀ նախկին ոստիկանապետ Վովա Գասպարյանի և նրա մերձավորների, ՀՀ ՊՆ նախկին նախարար Սեյրան Օհանյանի և նրա տիկնոջ՝ Ռուզաննա Խաչատրյանի, Երևանի նախկին քաղաքապետ, տրանսպորտի և կապի նախկին նախարար Գագիկ Բեգլարյանի և նրան փոխկապակցված անձանց, ՀՀ երրորդ նախագահ Սերժ Սարգսյանի թիկնազորի նախկին պետի՝ Վաչագան Ղազարյանի՝ «Սերժի Վաչոյի» գույքի վրա։ Դատախազությունն ուսումնասիրում էր նաև ՀՀ երրորդ նախագահ Սերժ Սարգսյանի եղբոր՝ հետախուզման մեջ գտնվող Լևոն Սարգսյանի, նրա դստեր, որդու, պետական գույքի կառավարման վարչության նախկին պետ, ԱԺ նախկին նախագահ Գալուստ Սահակյանի որդու՝ Արման Սահակյանի, բնապահպանության նախկին նախարար Արամ Հարությունյանի գույքերի օրինականությունը։ Վերջերս հայտնի դարձավ, որ դատախազությունը բարձրացրել է նաեւ նախկին ու ներկա օլիգարխ Խաչատուր Սուքիասյանի ընտանիքին պատկանող գույքի օրինանականության հարցը։

Դատախազությունից «Փաստինֆո»-ի հարցմանն ի պատասխան հայտնել են, որ այս պահի դրությամբ 21 հայցադիմում է ներկայացվել դատարան, որոնք բոլորը գտնվում են նախնական դատական քննության փուլում, այսինքն՝ վերջնական դատական ակտեր դեռևս չկան։
Ավելին, կոռուպցիայի դեմ պայքարում այս գործընթացի տապալումը, կամ առնվազն խոսքից բացի գործնականում որեւէ հաջողություն գրանցած չլինելը քողարկելու համար տեղեկատվությունը գաղտանագրվել է։ «Դատալեքս» դատական-տեղեկատվական համակարգում՝ ներկայացված հայցադիմումների «ճակատագրի» մասին տեղեկատվությունը սահմանափակված է, թեև գործերը հիմնականում, իրավապահների հավաստամամբ, քննվում են դռնբաց ռեժիմով։ ԲԴԽ-ից «Փաստինֆո»-ի հետ զրույցում պատճառաբանեցին, թե գաղտնի տեղեկություններ պարունակող գործերի հասանելիությունը կարող է սահմանափակվել։ Խոսքն, ամենայն հավանականությամբ, բանկային գաղտնիք պարունակող տեղեկությունների մասին է, սակայն այս փուլում, երբ դեռևս գործերը գտնվում են նախնական դատական քննության փուլում, ավելին, որոշ գործերով նույնիսկ նախնական դատական նիստեր չեն կայացել, հետևաբար, գաղտնի տեղեկություններ՝ որպես այդպիսին տեղադրված չեն կարող լինել համակարգում, հասկանալի չէ ինֆորմացիայի սահմանափակ լինելու հանգամանքը։ Առավել եւս՝ երբ պնդում են, թե դատական նիստերը լինելու են դռնբաց, ապա այդ դեպքում ինչու է դատալեքսում դրանց վերաբերյալ տեղեկությունը սահմանափակ։ Ակնհայտ է, որ փորձ է արվում սահմանափակել հրապարակայնությունը, ինչը հիմք է տալիս ենթադրելու, որ իշխանությունները կասկածում են իրենց թմբկահարած գործընթացի արդյունավետության վրա։

Հեղինակ՝ Իզաբել Սահակյան

Աղբյուր` Փաստինֆո