Փաստ ինֆո

«Այս ամբողջ պրոցեսները եւս մեկ անգամ գալիս են ապացուցելու այն իրողությունը, որ բանակցողի փոփոխման հրատապ կարիք կա եւ որ այս իրավիճակը չէր առաջանա, եթե չլիներ Նիկոլ Փաշինյանի անողնաշար ու անկազմակերպ արտաքին քաղաքականությունը»,- «Փաստինֆո»-ին ասաց Ադրբեջանի հարցերով փորձագետ Գառնիկ Դավթյանը՝ անդրադառնալով Թուրքիայի նախագահ Էրդողանի հայտարարությանը, թե Փաշինյանին պարզ և հստակ փոխանցեցել է Անկարայի դիրքորոշումը Թուրքիայի և Ադրբեջանի հետ Հայաստանի երկխոսությունների փոխկապակցվածության վերաբերյալ եւ, որ Երևանից քայլեր է ակնկալում։

Ալիեւի եւ Էրդողանի բոլոր հայտարարությունները փորձագետը փոխկապակցված է համարում եւ շեշտում է, որ այս պրոցեսների մասով Նիկոլ Փաշինյանի հայտարարություններին պետք է վերաբերվել իրականության եւ կեղծիքի դիտանկյունից։ Թե ինչու է Ադրբեջանի ու Թուրքիայի հայտարարություններին մշտապես լոյալ վերաբերվող Փաշինյանը փոխել հռետորաբանությունը, Գառնիկ Դավթյանը բացատրում է հանգամանքով, որ նրա՝ կեղծ խաղաղության օրակարգը փակուղում է հայտնվել կամ սեփական թակարդում, որտեղ բացի ենթարկվելուց որեւէ այլ տարբերակ Փաշինյանը չունի։

«Մենք ասում էինք, որ Ադրբեջանի հետ հնարավոր չէ խաղաղություն, քանի դեռ կա թուլացած Հայաստան, որից Ադրբեջանը անընդհատ զիջումներ է պահանջում ու ստանում, օրինակ, այն տարածքների օկուպացիայի տեսքով, որոնք նախկինում մեր մտքով անցնել չէին կարող։ Փաշինյանի հայտարարություններն այսօրվա կառավարության նիստին իրենց բացատրությունն ունեն՝ Հայաստանի հանրության շրջանում լուրջ դժգոհություն կա՝ կեղծ խաղաղության օրակարգի հետ կապված, ինչը հենց Նիկոլի գլխին կոտրվեց սեպտեմբերյան պատերաազմի ժամանակ, որի հետեւանքով 200-ից ավելի զոհ ունենացանք։ Այսինքն, մենք ունենք տոտալ ձախողում եւ Փաշինյանին այլ բան չէր մնում, քան այսօրվա հայտարարությունը, որովհետեւ մարդը կույր եւ խուլ պետք է լինի դա չհասկանալու համար։ Տեսնելով, որ այլ տարբերակ չկա սեփական կաշին փրկելու համար, Փաշինյանն այդ հայտարարություններով, այսպես ասած, քաղաքական կռուտիտի դաշտ է մտել եւ ասում է, թե տեսեք, ես ոչ միայն խաղաղության դարաշրջան բացելու դաշտ եմ մտել, այլեւ փորձում եմ այն խափանողների հստակ անունները տալ »,-ասաց փորձագետը։

Մասնագետը նկատում է, որ Ալիեւի ռազմական հռետորաբանությունը, հենց օրինակ, նախորդ տարվա համեմատ ավելի է խստացել եւ այնտեղ հստակ մեղադրանք ու ակնարկ է հնչում Փաշինյանից ակնկալվող գործողությունների վերաբերյալ։

«Փաստացի ստացվում է, որ Փաշինյանի բանավոր պայմանավորվածությունները չեն կարող երկար ժամանակով հետաձգվել, իսկ Ալիեւը ուժով է ստիպելու դրանք իրականացնել»։

Դավթյանը հիշեցնում է, որ Ադրբեջանը 30 տարի շարունակ անընդհատ խոսել է մինչեւ անգամ Երեւանի ադրբեջանական լինելու մասին եւ ոչ միայն լուրջ քարոզչական աշխատանք է տարել, այլեւ պաշտոնական մակարդակի հայտարարություններ արել այդ մասին, ինչը նշանակում է, որ կա նաեւ պետական քաղաքականություն ։

Ինչ վերաբերում է ուժային կենտրոնների միջեւ շարունակվող մրցավազքին, բնական է, որ Արեւմուտքը փորձում է Փաշինյանին վերցնել իր թեւի տակ։

«Այս պրոցեսները եւս մեկ անգամ փաստում են, որ Նիկոլ Փաշինյանը՝ իր բոլոր պայմանավորվածություններով, կամ պետք է գնա գրողի ծոցը կամ մենք չենք ունենա պետականություն»,-ասում է Գառնիկ Դավթյանը՝ հավելելով, որ Փաշինյանն այսօր կառավարության նիստին փորձում էր իր համար քաղաքական ապահովագրություն ստեղծել, որ հետագայում կարողանա արդարանալ ու ասել, որ միայն խաղաղությունից չի խոսել, այլ նաեւ զգուշացրել է»,-եզրափակեց մասնագետը։

Հիշեցնենք, որ Փաշինյանն այսօր պատասխանել է օկուպացված Շուշիից հնչած Ալիեւի հոխորտանքներին։

Աղբյուր` Փաստինֆո