Փաստ ինֆո

Ալիևի ագրեսիվ հռետորաբանությունը Ռուսաստանի և Իրանի դեմ հենված է թուրքական բացահայտ աջակցության և իսրայելական՝ ոչ բացահայտ աջակցության վրա։ «Փաստինֆո»-ի եթերում հայտարարել է թյուրքագետ, պ.գ.դ., պրոֆեսոր Ռուբեն Մելքոնյանը:

Փորձագետը նկատել է, որ արևելքում քաղաքական խաղի կանոնները մի շարք իրողություններ են ենթադրում: Դրանցից մեկն այն է, որ այստեղ խաղաղություն կամ փոփոխություն լինում է միայն լծակների, ուժի պարտադրանքի միջոցով։ «Հայաստանի և Ադրբեջանի միջև սահմանը հարաբերականորեն եղել է խաղաղ, երբ Ադրբեջանը զգացել, է, որ Հայաստանի դեմ ոտնձգությունը պատժվելու է տասնապատիկ»,- արձանագրել է Ռ. Մելքոնյանը:

Ի հեճուկս մեր տարածաշրջանում ընդունված խաղի կանոնների՝ Հայաստանի իշխանությունների հայտարարությունը, թե մտադիր են խաղաղության դարաշրջան բացել՝ փորձելով հարաբերություններ հաստատել Ադրբեջանի ու Թուրքիայի հետ՝ պատճառաբանելով, թե չունենք այնքան մարտունակ բանակ, որը կարող է պաշտպանել մեր հայրենիքը։ Ռ. Մելքոնյանի կարծիքով, Հայաստանի և այդ երկու երկրների միջև տեղի ունեցողը կարգավորում չէ, քանի որ կարգավորումը տեղի է ունենում երկու կողմերի շահերը հաշվի առնելով: Իսկ այն, ինչի հիմա է տեղի ունենում, բանախոսը բնութագրեց որպես կապիտուլյացիայի շարունակություն, կամ չընդհատվող կապիտուլյացիա, երբ ադրբեջանական պահանջները, որոնք նաև պաշտպանություն են ստանում Թուրքիայի կողմից, շարունակում են պարտադրվել Հայաստանին և՛ բանակցությունների սեղանին, և՛ մեր քաղաքացիների ամենօրյա կյանքում:

Թյուրքագետի կարծիքով, հայ-թուրքական հարաբերություններում առկա բարդույթներն ու բարդությունները խորքային առումով չեն վերացել։ Ըստ սոցհարցումների՝ մեր հասարակության գերակշիռ մասը շարունակում է դեմ լինել Թուրքիային և դրա հետ հարաբերությունների կարգավորմանը։ Թուրքական հասարակության սոցհարցումների համաձայն՝ հայերը և հույները թշնամու կերպարի շրջանակներում առաջին հնգյակում կամ եռյակում են։ Որպես հարևանի թեկնածու ևս, հայը թուրքական հասարակության համար ընդունելի չէ։

Անդրադառնալով տարածաշրջանային գործընթացներին, բանախոսը նշեց, որ Ալիևի ագրեսիվ հռետորաբանությունը Ռուսաստանի և Իրանի դեմ հենված է թուրքական բացահայտ աջակցության և իսրայելական՝ ոչ բացահայտ աջակցության վրա։

«Ռուսաստանի արձագանքին այս պահին թերահավատորեն եմ վերաբերվում, բայց Իրանի նման պետականության պարագայում նման «մեղքերը» չեն ներվում։ Այսինքն, տարածաշրջանն ու աշխարհը կանգնած են նոր և շատ ավելի մեծ ռազմական պայթյունի շեմին»,- նշեց թյուրքագետը։

«Թուրքիայի քաղաքական ոճը վաբանկ գնալու, քաղաքական անպատժելիության կերպարի մեջ մտնելու, համաշխարհային գրված և չգրված որևէ օրենքին չենթարկվելու, կարմիր գծեր չունենալու կերպարն է, որը Թուրքիան իրականացնում է։ Ադրբեջանը կրկնօրինակում է նույն ոճը։ Ադրբեջանը դուրս է եկել վերահսկողությունից և վաբանկ է գնում, որը կավարտվի կա՛մ դաժան պատժով, կա՛մ դրա դերակատարման էական ավելացմամբ։ Հուսանք, կլինի առաջին տարբերակը»,- եզրափակեց Ռ. Մելքոնյանը։

Մանրամասները՝ տեսանյութում։

Աղբյուր` Փաստինֆո