Փաստ ինֆո

Ադրբեջանում քննարկումներ են սկսվել Նախիջևանի ինքնավար կարգավիճակի լուծարման հետ կապված: «Փաստինֆո»-ի հետ զրույցում ասել է ադրբեջանագետ, պատմական գիտությունների թեկնածու Տաթևիկ Հայրապետյանը՝ շեշտելով, որ սրանք դեռևս ընդամենը խոսակցություններ են, սակայն որևէ գործընթաց դեռևս չկա:

Տաթևիկ Հայրապետյանը կարծում է, որ Նախիջևանի ինքնավար կարգավիճակի լուծարմամբ Ադրբեջանը փորձում է կանխել նման քննարկումներն Արցախի մասով.

«Երբ Նախիջևանի պետական անվտանգության ծառայությունը լուծարվեց, դրանից հետո խոսակցություններ սկսեցին տարածվել, որ, առհասարակ, Ադրբեջանում նպատակ ունեն լուծարել Նախիջևանի ինքնավար կարգավիճակը և փոխել այն: Սրա համար տարբեր հիմնավորումներ են բերում, բայց, իմ դիտարկմամբ, իրենք ընդհանրապես փորձում են այսպիսով ցույց տալ, որ առհասարակ, Ադրբեջանի կազմում ինքնավար կարգավիճակ չի կարող լինել, որպեսզի հետագայում նաև կանխեն նմանօրինակ քննարկումները Արցախի հետ կապված, թեև Արցախն իրեն որևէ կերպ չի պատկերացնում Ադրբեջանի մաս՝ որևէ կարգավիճակով»,-ասաց Հայրապետյանը:

Փորձագետը նշում է, որ վերջերս հայտարարությամբ է հանդես եկել նաև Ադրբեջանի պետական անվտանգության ծառայությունը, թե «վերջին շրջանում «Իրանի՝ Նախիջևանի ժողովրդական շարժում» անվամբ կեղծ կազմակերպությունը մի շարք սոցիալական ցանցերում հրապարակել է տեղի բնակչության անունից Իրանի կառավարությանը հասցեագրված կեղծ դիմում».

«Այս հայտարարությունը ինքնին շատ տարօրինակ էր, քանի որ նրանք շեշտում էին, որ Նախիջևանը Ադրբեջանի մաս է և այլն: Անհասկանալի է նաև, որ «իքս» կազմակերպության արած հայտարարությանը նման բուռն արձագանք են տալիս, միգուցե, լուրջ մտավախություններ կան իրենց մոտ: Առնվազն մտածելու տեղիք է տալիս այս ամենը, ակնհայտ է, որ գործընթացներ կան, որոնք դրդում են նրանց խոսակցությունների, թեև Ադրբեջանի իշխանական պատգամավորները մեկնաբանել են, թե նման քննարկում չկա»,-ասաց նա:

Աղբյուր` Փաստինֆո