Փաստ ինֆո

«Որքան ժամանակն անցնում է, այնքան մեր վիճակն էլ ավելի է բարդանում, առնվազն այն իմաստով, որ Ադրբեջանն ամրապնդվում է իր վերահսկողության տակ գտնվող դիրքերում։ Նախորդ տարվա մայիսի 12-ին Ադրբեջանը ներխուժել էր Սոթք-Խոզնավար հատվածը, որտեղ ամրապնդեց իր դիրքերը, ապա նույն տարվա նոյեմբերին հերթական ագրեսիան սանձազերծեց եւ որոշակի առաջխաղացում ունեցավ, հետո նորից փորձեց ամրապնդվել այդտեղ եւ էլ ավելի ուժեղացնել իր դիրքերը, իսկ վերջին ագրեսիան տեղի ունեցավ սեպտեմբերի 13-ին։ Թե ինչ է տեղի ունենում եւ ինչ սպառնալիքներ է պարունակում այս ամենը, մենք Ալիեւի հայտարարություններից չէ, որ պետք է հասկանանք»,- «Փաստինֆո»-ի հետ զրույցում ասաց ռազմական փորձագետ, «Հենակետ» վերլուծական կենտրոնի ղեկավար Վիտալի Մանգասարյանը՝ անդրադառնալով Իլհամ Ալիեւի նախօրեին արած հայտարարություններին։

Ադրբեջանի նախագահն օկուպացված Շուշիում երեկ հայտարարել էր, թե իրենց վերահսկողության տակ գտնվող դիրքերից դիտարկում են Գորիսը,Կապանը, Ջերմուկը, Սեւանա լիճը։ Նա կրկին սպառնալիքներ է հնչեցրել Հայաստանի հասցեին ու Փաշինյանից պահանջել այսպես կոչված Զանգեզուրի միջանցքը բացել։

Մանգասարյանի խոսքով, Ադրբեջանը փորձում է, տարբեր հատվածներում ամրապնդվելով, վերահսկողությունը մեծացնել մեր ռազմավարական նշանակության ենթակառուցվածքների, ջրային պպաշարների եւ այլ ռեսուրսների նկատմամբ ու այդպես վերահսկողությունը մեծացնել նաեւ բնակավայրերի նկատմամբ։

«Վերջին 30 տարիներին շատ դժվար է հիշել, թե քաղաքների ուղղությամբ ռմբակոծություն երբ է եղել, բայց վերջին շրջանում մենք տեսանք, որ Ջերմուկի, Գորիսի, Կապանի ուղղությամբ են ոտնձգություններ իրականացնում՝ փորձելով ճնշում գործադրել ու երկարատեւ ժամանակահատվածում հայաթափել այդ բոլոր բնակավայրերը, որպեսզի հարմար պահի էլ ավելի հեշտությամբ կարողանան լուծել իրենց առջեւ դրված խնդիրը, այն է՝ այդ հատվածներում տեղակայվել, հաստատվել »-բացատրում է Մանգասարյանը։

Ռազմական փորձագետն ընդգծում է՝ Ադրբեջանի համար այդ դիրքերում ամրապնդվելը ռեալ պլացդարմ է՝ հետագա մարտական գործողությունների ժամանակ մեկնարկային մեծ առավելություն ունենալու համար։ «Հատկապես այդ հատվածներում ապրողները շատ լավ պատկերացնում են վտանգի աստիճանը, որ, եթե նախկինում տասնյակ կիլոմետրեր հեռավորության վրա էր գտնվում թշնամին եւ հրաձգային ու միջին տրամաչափի հրանոթային զինատեսակներն այդ հատվածներին հասանելիություն չունեին, որովհետեւ հեռավորությունը մեծ էր, հիմա արդեն փոքր տրամաչափի ու հրաձգային զինատեսակներով անընդհատ փորձելու են ճնշումներ գործադրել, ինչը մենք տեսնում ենք ՊՆ-ի հայտարարություններից։ Նրանք հարմար պահի կրակելու են նաեւ բնակավայրերի ուղղությամբ եւ այդ օրը, ցավոք, հեռու չէ»-վերլուծում է ռազմական փորձագետը։

Վիտալի Մանգասարյանն արձանագրում է, որ հատկապես պատերազմից հետո իշխանությունը ոչինչ չի արել ուժեղացնելու դիրքերը։ Հակառակը, տարածում է այնպիսի թեզեր, թե մենք թույլ ենք, ի վիճակի չենք պատերազմել թուրք-ադրբեջանական տանդեմի հետ․ «Եթե մենք հասկանում ենք, որ թշնամին այսօրվա հաջողություններն օգտագործելու է հեռահար երկարաժամկետ ու միջնաժամկետ կտրվածքում ավելի մեծ հաջողությունների հավակնելու համար, պետք է դրա առաջն առնենք ի սկզբանե՝ պարտվողական մոտեցման փոխարեն։ Այդպես նրանք մինչեւ մայրաքաղաք կհասնեն։ Այդ հոգեբանությունը, պարտվողական քաղաքականությունը պետք է փոխել ու հասարակության շրջանոււմ դեպի զինված ուժերը հավատ ներշնչենք, բայց այս իշխանության կողմից մենք նման քաղաքականություն չենք տեսնում»։

Ռազմական փորձագետը շեշտում է՝ այս փուլում Ադրբեջանը պատրաստվում է հաջորդ խոշոր բախմանը։ Ադրբեջանը ռեաբիլիտացիոն մեծածավալ աշխատանքներ է իրականացնում իր զինված ուժերում, իսկ այդ ամենը հարմար պահի, հարմար աշխարհաքաղաքական իրողությունների պարագայում մեր դեմ է աշխատելու։

«Այստեղ երկրորդ տարբերակ լինել չի կարող, թիրախը մենք ենք եւ այդ ամենը աշխատելու է մեր դեմ՝ հարմար պահի»-զգուշացրեց մասնագետը։

Աղբյուր` Փաստինֆո